Jak možna stracić hramadzianstva i jak paśla jaho viarnuć
Saviet Respubliki 21 śniežnia ŭchvaliŭ zakonaprajekt ab pazbaŭleńni hramadzianstva «ekstremistaŭ». Ciapier jaho pavinien padpisać Łukašenka. U Departamiencie pa hramadzianstvie i mihracyi patłumačyli niekatoryja padrabiaznaści novaŭviadzieńnia.
Adzin z punktaŭ abnoŭlenaha Zakona «Ab hramadzianstvie» — mahčymaść vynosić vyklučnyja rašeńni ab pravavym statusie asob, jakija znachodziacca za miežami krainy. Pry najaŭnaści rašeńnia suda, jakoje nabyło moc, tyja, kaho sudzili za tak zvanuju «ekstremisckuju dziejnaść» abo za tak zvanuju «škodu intaresam Biełarusi», mohuć raźvitacca sa svaim pašpartam i hramadzianstvam, znachodziačysia za miežami krainy.
Načalnik Departamienta pa hramadzianstvie i mihracyi MUS RB Alaksiej Biahun u kamientary «Narodnaj haziecie» nastojvaje, što «novy zakon ab hramadzianstvie praduhledžvaje ŭ pieršuju čarhu nie pazbaŭleńnie, a stratu hramadzianstva z pryčyny ździajśnieńnia złačynstvaŭ ekstremisckaha i terarystyčnaha charaktaru suprać dziaržavy».
Pavodle jaho, u takich vypadkach rašeńniem suda asoba pryznajecca vinavataj, u tym liku zavočna, i «pavinna panieści adpaviednaje pakarańnie».
Fakt znachodžańnia abvinavačanaha za miežami Biełarusi nie vyzvalaje jaho ad hetaj pracedury. Kančatkovaje rašeńnie pa pytańni pazbaŭleńnia hramadzianstva prymaje Łukašenka.
Pašpart čałavieka pryznajecca niesapraŭdnym. Zrabić novy pašpart za miažoj, papiaredžvaje Biahun, budzie niemahčyma.
«Asoby, jakija znachodziacca za miežami Biełarusi i stracili hramadzianstva, u dalejšym zmohuć viarnucca nazad. Ale im varta pamiatać, što fakt straty nie vyzvalaje takich ludziej ad kryminalnaj adkaznaści, za vyklučeńniem vypadkaŭ zakančeńnia termina daŭnaści złačynstva. Paśla adbyćcia pakarańnia i pahašeńnia sudzimaści možna budzie pretendavać na atrymańnie vidu na žycharstva, pražyŭšy na terytoryi Biełarusi piać hadoŭ. I tolki paśla hetaha možna budzie chadajničać ab poŭnaj naturalizacyi va ŭstanoŭlenym paradku — heta adbyvajecca tolki paśla padpisańnia adpaviednaha ŭkaza prezidenta», — tłumačyć Biahun.
«Dziaržava nikoha nie pazbaŭlaje hramadzianstva ŭ adnabakovym paradku — ludzi sami svaimi złačynnymi dziejańniami zapuskajuć praceduru jaho straty. Sapraŭdy, jaki ty hramadzianin, kali ŭsimi siłami spryjaješ usialakim atakam na svaju krainu, tym bolš znachodziačysia za jaje miežami?» — znachodzić apraŭdańnie źmienam u zakanadaŭstvie, jakija supiarečać Kanstytucyi, Alaksiej Biahun.
Čytajcie taksama:
Što rabić biełarusam, jakich dziaržava moža pazbavić hramadzianstva? Parady advakata
U Biełarusi pačali źbirać źviestki ab tych, chto maje dazvoły na žycharstva i karty palaka?
Kavaleŭski: My budziem dabivacca adpaviednaha pravavoha statusu dla biełarusaŭ, pazbaŭlenych režymam hramadzianstva
