Na budaŭnictvie kompleksu «Minsk Śviet» rabočy ŭpaŭ z vyšyni
Čarhovaje nadzvyčajnaje zdareńnie adbyłosia siońnia na budaŭničym abjekcie ŭ žyłym kompleksie «Minsk Śviet». Jak paviedamiła aficyjny pradstaŭnik Minskaha ŭpraŭleńnia Śledčaha kamiteta Kaciaryna Harlinskaja, nočču 5 śniežnia paciarpieŭ 57-hadovy armaturščyk.
Mužčyna vykonvaŭ raboty na vyšyni druhoha paviercha, pry pierachodzie na susiedniuju siekcyju jon adšpiliŭ strachovačny tros i ŭpaŭ z vyšyni. Rabočy atrymaŭ cialesnyja paškodžańni, jon špitalizavany.
Na miescy zdareńnia śledča-apieratyŭnaja hrupa pravodzić ahlad i apytańnie vidavočcaŭ. Pakul kryminalnaja sprava nie zaviedzienaja — Śledčy kamitet pravodzić pravierku ŭsich abstavin taho, što adbyłosia.
Heta ŭžo daloka nie pieršaje nadzvyčajnaje zdareńnie na budaŭnictvie «Minsk Śvietu». Tolki ŭ 2022 hodzie tam zarehistravanyja 4 vypadki vytvorčaha traŭmatyzmu, try ź jakiich skončylisia śmierciu paciarpiełych budaŭnikoŭ. U 2021 hodzie taksama było 4 takija vypadki, ź jakich dva — sa śmiarotnym vynikam.
Sud pa fakcie adnaho z takich vypadkaŭ, jaki adbyŭsia ŭ śniežni minułaha hoda, zaviaršyŭsia niekalki miesiacaŭ tamu. Vinavatym u śmierci rabočaha, jaki ŭpaŭ z 16-ha paviercha, pryznali hałoŭnaha inžyniera budaŭničaj arhanizacyi, jakomu pryznačyli 2,5 hoda «chatniaj chimii». Na dumku suda, jon nie zabiaśpiečyŭ naležnaj biaśpieki praviadzieńnia rabot.
