Cichanoŭskaja na Kijeŭskim forumie pa biaśpiecy: Impieryja pavinna być razburanaja. My pavinny razburyć hetuju turmu — razam
Lidar biełaruskich demakratyčnych sił Śviatłana Cichanoŭskaja 1 śniežnia vystupiła ŭ videafarmacie na mižnarodnym Kijeŭskim forumie biaśpieki. U skazanaj pa-biełarusku pramovie, prezientavanaj jak prahramnaja, jana zapeŭniła ŭkraincaŭ u padtrymcy ich suvierenitetu, vykazała ŭpeŭnienaść, što tolki demakratyčnaja Biełaruś zdoleje nadać harantyi biaśpieki Ukrainie, i raskazała pra biełaruskija inicyjatyvy, arhanizavanyja z pačatku vajny.
«U našych razmovach z ukrainskimi palitykami, dypłamatami, ekśpiertami, žurnalistami ŭsie pahadžajucca z tym, što padkantrolnaja impieryjalistyčnamu Kramlu Biełaruś budzie krynicaj pahrozy dla volnaj Ukrainy.
Tamu jość jasnaść u tym, što Ukraina zacikaŭlenaja ŭ tym, kab Biełaruś była demakratyčnaj. Biez vyzvaleńnia Biełarusi ad dvuch dyktataraŭ Ukraina zastaniecca pad pahrozaj revanšyzmu impieryi. Tolki demakratyčnaja Biełaruś zdoleje nadać harantyi biaśpieki Ukrainie.
Mienavita praz udzieł Łukašenki raspačałasia hetaja ahresija. Biez dostupu da Kijeva z terytoryi Biełarusi hetaja vajna nie pačałasia b uvohule ci vyhladała b zusim pa-inšamu.
A značyć, vyvad Biełarusi z vajny stanie tym faktaram, jaki zrobić niemahčymym jaje praciah dla Rasii. Tamu nam tak krytyčna važna dziejničać suprać dyktataraŭ-ahresaraŭ razam.
My ŭžo zaraz šmat uzajemadziejničajem z ukrainskimi ŭładami pa vyrašeńni praktyčnych pytańniaŭ: infarmacyjny abmien, kaardynacyja dziejańniaŭ pa baraćbie z prapahandaj, vyrašeńnie prablem, ź jakimi sutyknulisia biełarusy, jakija zastalisia va Ukrainie paśla pačatku vajny.
Ja pierakananaja, što razam urad Ukrainy i demakratyčnaja Biełaruś zmohuć damahčysia bolšaha praz kaardynacyju, uzhadnieńnie, spałučeńnie našych resursaŭ. My stvaryli Abjadnany Pierachodny Kabiniet Biełarusi — hałoŭny vykanaŭčy orhan, čyjoj hałoŭnaj zadačaj siońnia źjaŭlajecca abarona niezaležnaści našaj krainy i adnaŭleńnie suvierenitetu.
Bolej za toje,
naša supracoŭnictva nad siońniašniaj paviestkaj pavinna raźvicca ŭ poŭnafarmatnaje partniorstva paśla pieramohi nad dvuma dyktatarskimi režymami. Kali adnosiny Biełarusi i Ukrainy nie buduć zamykacca tolki na handli i inviestycyjach, ale buduć zachodzić i ŭ śfieru rehijanalnaj biaśpieki, mižnarodnaj palityki i abarony.
Impieryja pavinna być razburanaja. My pavinny razburyć hetuju turmu — razam», — takim byŭ asnoŭny źmiest pramovy Śviatłany Cichanoŭskaj.
