Akupacyjnyja ŭłady admaŭlajuć płany Rasii pakinuć Zaparožskuju AES
Akupacyjnaja administracyja horada Enierhadar, dzie znachodzicca Zaparožskaja AES, ranicaj u paniadziełak zajaviła, što rasijskija vojski nie płanujuć zdavać najbujniejšuju ŭ Jeŭropie atamnuju elektrastancyju, zachoplenuju jašče ŭ lutym.
«ŚMI aktyŭna raspaŭsiudžvajuć fejki pra toje, što Rasija nibyta płanuje vychad z Enierhadara i pakidańnie ZAES. Hetaja infarmacyja nie adpaviadaje rečaisnaści», — havorycca ŭ paviedamleńni akupacyjnaj administracyi, apublikavanym u jaje telehram-kanale.
Napiaredadni artykuł pra mahčymy adychod, u pryvatnaści, napisała ahienctva Reuters. Pra heta abviaścili ŭkrainskija ŭłady. Kiraŭnik dziaržaŭnaj kampanii «Enierhaatam» Piotr Kocin havaryŭ ab prykmietach taho, što rasijskija vajskoŭcy rychtujucca pakinuć elektrastancyju.
«U apošnija tydni my atrymlivajem faktyčna infarmacyju, što źjavilisia prykmiety taho, što jany, mahčyma, źbirajucca pakinuć ZAES», — skazaŭ Kocin u efiry ŭkrainskaha telebačańnia. Pry hetym kiraŭnik «Enierhaatama» adznačyŭ, što pakul jašče rana havaryć pra raspačataje adstupleńnie. «Možna skazać, što rasijskija vajskoŭcy rychtujucca da takoha varyjanta», — skazaŭ Kocin.
