«Davajcie padtrymlivać i raspaŭsiudžvać svajo». Pradprymalnik Źmicier Zavadski stvaraje biełaruski markietpłejs
Aktyvist i pradprymalnik Źmicier Zavadski voś užo paŭhoda pracuje nad stvareńniem biełaruskaha markietpłejsa za miažoj. Jon raspavioŭ Radyjo Unet pra toje, čamu heta važna, adkazaŭ na pytańni, čamu ŭ biełaruskim markietpłejsie budzie ruskaja mova, i paprasiŭ dapamohi ŭ tych, chto maje mahčymaści i žadańnie.
Źmicier Zavadski
«Kali ja praz palityčnuju aktyŭnaść musiŭ źjechać ź Biełarusi, sutyknuŭsia z tym, što niama dobraj biełaruskaj internet-kramy. I tamu ja ź minimumam srodkaŭ i dośviedu ŭ elektronnaj kamiercyi vyrašyŭ zrabić mahčymym dla biełarusaŭ nabyvać tavary ź biełaruskaj movaj, dać mahčymaść pradprymalnikam realizoŭvać svaje tavary pa ŭsim śviecie, kudy zaraz musili vyjechać ludzi ź Biełarusi», — havoryć Źmicier Zavadski.
Jon ličyć, što ŭ ciapierašnich varunkach usio, što spryjaje raźvićciu biełaruskaj movy, biełaruskaj kultury, biełaruskaha pradprymalnictva i ŭvohule svabodnaha duchu — heta vielmi važna. Siarod tych, kaho Źmicier bačyć u liku karystalnikaŭ markietpłejsu, jaki jon stvaraje, nie tolki biełarusy, jakija vyjechali z radzimy abo žyvuć u Biełarusi, ale i ŭvohule ŭsie, chto budzie viedać pra Biełaruś i biełarusaŭ abo stvarać niešta pa-biełarusku.
U fejsbuku Źmicier źviarnuŭsia da tych, chto moža dapamahčy jamu ŭ jahonym pačynańni, i siarod inšaha tam prośba padtrymać ź pierakładam nie tolki na biełaruskuju, ale i na ruskuju movu. Voś jak Źmicier Zavadski tłumačyć patrebu ruskaj movy na biełaruskim markietpłejsie:
«Maja meta — maksimalna šyroka raspaŭsiudzić toje, što maje dačynieńnie da biełaruskaha i Biełarusi. Tamu, kali b u mianie była mahčymaść, ja zrabiŭ by hety sajt uvohule na ŭsich movach śvietu. Ale takoj mahčymaści niama, tamu my pačynajem z troch movaŭ — biełaruskaj, anhlijskaj i ruskaj. Asnoŭnaja mova na sajcie, biezumoŭna, budzie biełaruskaja. Bolš taho — tavary, spadziajusia, u bolšaści taksama buduć biełaruskamoŭnyja.
Ale, na žal, situacyja takaja, što navat biełaruskamoŭnyja ludzi, šukajučy ŭ internecie niejkija tavary, šukajuć ich mienavita pa-rusku. Zrazumieła, čamu heta adbyvajecca — bo niama našych kramaŭ, jakija b prapanoŭvali tavary pa-biełarusku. I zaraz hetych ludziej pošukaviki nakiroŭvajuć na rasijskija sajty.
Ale ja chaču, kab, kali navat čałaviek zadaŭ u pošuk niešta pa-rusku, jon moh patrapić na biełaruski sajt. Bo, kali krama robić vieb-staronku vyklučna biełaruskamoŭnuju, to jana nie spryjaje pašyreńniu biełaruskich tavaraŭ, a abmiažoŭvajecca niejkim vuzkim kołam».
Źmicier pryvodzić prykład z ukrainskaj rečaisnaści. Kraina znachodzicca ŭ varožych stasunkach z Rasijaj, ale sajt prezidenta Ukrainy pracuje na ŭkrainskaj, ruskaj i anhlijskaj movach. Źmicier tłumačyć heta tym, što takim čynam navat tym, chto pa-rusku šukaje ŭ huhle «priezidient Ukrainy», vydajecca nie tolki rasijskaja prapahanda, ale i ŭkrainski paradak dnia i ŭkrainskaja pazicyja.
Pačynaŭ Źmicier svaju pracu adzin, ale ŭ apošnija dni ŭ jaho źjavilisia pamočniki. I ŭžo praca vykananaja na 80%. Ale jon prosić achvočych dapamahčy ŭ niekatorych spravach:
«Zaraz my šukajem padtrymku ŭ pierakładzie na biełaruskuju movu, pryčym nie tolki sajta, ale i roznych ubudavańniaŭ i prykładańniaŭ, jakija vykarystoŭvajucca ŭ elektronnaj kamiercyi. Taksama vielmi nieabchodnyja kansultacyi jurystaŭ. Asabliva tych, jakija aryjentujucca ŭ mižnarodnym handli, bo isnujuć peŭnyja abmiežavańni ŭ handli pamiž krainami, u tym liku ź Biełaruśsiu. Časam patrebnaja i padtrymka prahramistaŭ dla taho, kab nadziejna abaranić sajt, na jakim buduć pryvatnyja źviestki».
Kali Vy majecie mahčymaści i žadańnie dapamahčy Źmitru Zavadskamu ŭ jahonaj spravie, to jon zaprašaje źviartacca da jaho praz jahonuju staronku ŭ fejsbuku.
«Davajcie padtrymlivać svajo. Davajcie sami arhanizoŭvacca, jak my heta sprabavali ŭ 2020-m hodzie i ŭ nas dastatkova dobra atrymałasia. Davajcie praciahvać!» — kaža Źmicier Zavadski.
