ISW: Va Ukrainie ŭ najbližejšyja tydni ŭzraście temp bajavych dziejańniaŭ na froncie
Ahulny temp vajennych apieracyj Uzbrojenych sił Ukrainy i rasijskich akupacyjnych vojskaŭ uzdoŭž linii frontu ŭ apošnija dni zapavoliŭsia z-za paharšeńnia ŭmoŭ nadvorja. Ale, vierahodna, jon paskorycca ŭžo pačynajučy z nastupnych niekalkich tydniaŭ. Bo tempieratura pavietra va Ukrainie pastupova padaje, i ziamla na pieradavoj pramiarzaje, adznačajuć analityki amierykanskaha Instytuta vyvučeńnia vajny (ISW).
«Ukrainskija i rasijskija paviedamleńni z važnych pryfrantavych rajonaŭ na ŭschodzie i poŭdni Ukrainy, uklučajučy Svatava, Bachmut i Vuhladar, śviedčać pra toje, što apieracyi abodvuch bakoŭ u ciapierašni čas abciažaranyja z-za daždžoŭ i vialikaj hrazi», — havorycca ŭ zvodcy.
Ale paśla źnižeńnia tempieratury pa ŭsioj Ukrainie i zamiarzańnia ziamli temp bajavych dziejańniaŭ paskorycca, pakolki abodva baki padvysiać mabilnaść.
Pavodle źviestak sinoptykaŭ, tempieratura ŭ rajonach na paŭnočnym uschodzie Ukrainy, naprykład, uzdoŭž linii Svatava — Kramiannaja, z 28 listapada pa 4 śniežnia ŭpadzie amal da nula ci nižej jaje dzionnaha maksimumu.
«Vierahodna, ziamli spatrebicca niekalki dzion pry stabilnych nizkich tempieraturach, kab zaćviardzieć, a heta aznačaje, što naziemnyja ŭmovy, chutčej za ŭsio, dazvolać pavialičyć tempy apieracyj pa ŭsioj Ukrainie na praciahu vychadnych 3—4 śniežnia i na nastupnym tydni», — adznačyli analityki ISW.
Razam z tym adznačajecca, što pakul niezrazumieła, ci płanuje niejki z bakoŭ adnaŭleńnie bujnych nastupalnych abo kontrnastupalnych apieracyj u najbližejšy čas.
