Telegram stvaryŭ aŭkcyjon karotkich damienaŭ. Pahladzieli, za kolki pradajuć biełaruskija
Niadaŭna Telegram zapuściŭ mahčymaść kuplać i pradavać karotkija i paznavalnyja imiony karystalnikaŭ dla asabistych akaŭntaŭ, publičnych hrup i kanałaŭ. Aŭkcyjon na najlepšyja imiony karystalnikaŭ prachodzić u pramym efiry na fragment.com.
«Naša Niva» praaanalizvała śpisy imionaŭ z aŭkcyjonu i znajšła tam niekalki biełaruskich. Za kolki ich pradajuć?
Zdajecca, adnymi z samych darahich damienaŭ u biełaruskim siehmiencie stali try — @falconclub, @bsuir i @minsk. Pieršy pastaŭleny na aŭkcyjon sa startavaj canoj 494 dalary, druhi pradajecca za 450, a treci kaštuje kala 369. Pakul aŭkcyjon nie zavieršany.
Akramia taho, prapanujucca karotkija juziernejmy dla barachołak roznych rehijanalnych haradoŭ Biełarusi — takija zvyčajna kaštujuć u rajonie 15 dalaraŭ.
Uvohule na kuplu-prodaž vystaŭlena šmat karotkich imionaŭ, samymi papularnymi ź jakich źjaŭlajucca suśvietnyja brendy kštałtu @amazon (damien pradadzieny bolš jak za 438 tysiač dalaraŭ), @dior, @armani (ich kupili za bolš jak 192 tysiačy dalaraŭ kožny) i inšyja. Taksama popytam karystajucca prostyja ŭniviersalnyja nazvy — @auto, @bank, @girl i inšyja. Vielmi šmat sustrakajecca abaznačeńniaŭ kazino, spartovych stavak i prodažu kryptavalut.
Samym darahim juziernejmam, jaki zaraz vystaŭleny na aŭkcyjonie, źjaŭlajecca damien @news (suma pieravyšaje 1 miljon i 200 tysiač dalaraŭ), a z pradadzienych — @auto (taksama bolš jak miljon dalaraŭ).
Aficyjny kanał miesiendžara adznačaje, što prava ŭłasnaści na hetyja kalekcyjnyja imiony karystalnikaŭ zamacavana ŭ niaźmiennaj knizie TON chutkaj i maštabavanaj sietki błokčejn. Uładalniki mohuć dadać niekalki psieŭdanimaŭ u asabisty ŭlikovy zapis, hrupu abo kanał.
«Upieršyniu ŭ historyi sacyjalnych sietak ludzi całkam vałodajuć svaimi imionami karystalnikaŭ. Daŭnija karystalniki Telegram, jakija vykarystoŭvali karotkija imiony, što jany zarehistravali na rańniaj stadyi, ciapier mohuć atrymać vyhadu z rostu płatformy, pradajučy svaje juziernejmy na sumlennych, prazrystych, całkam decentralizavanych aŭkcyjonach», — adznačyli ŭ kampanii.
