«Manakoła asvojvała dastatkova doŭha». Unučka Łukašenki dała pieršaje intervju
Hetaj vosieńniu na «Biełaruś 1» vyjšła telešou «Hieroi». Adnoj ź viadučych stała Darja Łukašenka — unučka Alaksandra Łukašenki i dačka Dźmitryja. Darja paŭstała pierad telehledačami ŭ vobrazie, jaki nahadvaje hierainiu filma «Zornyja vojny» — pryncesu Leju. Dziaŭčyna raskazała «Sputniku», jak prachodzili zdymki.
Darja Łukašenka ŭ vobrazie viadučaj
Darja kaža, što jaje hierainiu zavuć Justa. Heta vytvornaje ad Justycyi — staražytnarymskaj bahini pravasudździa. Tamu jaje zadača — tłumačyć praviły, abjaŭlać etapy: kali pačynajecca etap, kali jon zaviaršajecca.
«Pra kastynh mahu skazać, što heta byŭ adzin z samych składanych etapaŭ za ŭvieś čas zdymak prajekta. Było vielmi chvalujuča, ja viedała, što na kastynh pryjduć bolš padrychtavanyja ludzi, bolš prafiesijnyja, u jakich užo jość vopyt na telebačańni. Ja rychtavałasia, viadoma ž, da hetaha. Hałoŭny režysior daŭ zadaču navučycca vykarystoŭvać roznyja elektronnyja devajsy — heta elektrarolikavyja kańki, na jakija prosta stanovišsia (tam niama nijakich macavańniaŭ), i manakoła. Z rolikami było lahčej, viadoma. A manakoła ja dastatkova doŭha asvojvała. Ale ŭ vyniku ŭsio atrymałasia», — kaža dziaŭčyna.
Taksama, pa jaje słovach, treba było kamientavać sami hulni — heta taksama byŭ asobny etap padrychtoŭki: «Ja viedała, što treba padrychtavacca być kamientataram, tamu ja prahladała Youtube-roliki z padobnymi šou. Hladzieła, jak tam pavodziać siabie viadučyja, i na asnovie hetaha ŭžo vybudoŭvała svaje pavodziny».
Jana zaznačaje, što joj zrabili dastatkova zručny raskład: «Ja pryjazdžała na zdymačnuju placoŭku bližej da viečara, tamu ŭ mianie zastavaŭsia čas na vučobu. Ale davodziłasia sumiaščać — i ja nie skažu, što heta było lohka. Ale ciažkaści zahartoŭvajuć charaktar, tamu heta byŭ cikavy dośvied».
Asnoŭnaja ideja hetaha prajekta ŭ tym, kab nie prosta prapahandavać pažarna-ratavalny sport, a kab pakazać, jak dzieci i padletki stanoviacca sapraŭdnymi hierojami. I nie tolki chłopcy z bujnych haradoŭ, ale z usioj Biełarusi, z kožnaha maleńkaha horada.
Taksama Darja raskazała, što vučycca na ekanamičnym fakultecie ŭniviersiteta. Jakoha — nie ŭdakładniła. Pakul zdymak niama, jana addaje čas vučobie. Ale jana nie vyznačyłasia, kim choča stać.
«Na siońniašni momant ja nie mahu skazać, kim ja budu naohuł. Napeŭna, prosta chaciełasia b stać jak minimum dobrym čałaviekam. A ŭ dalejšym… žyćcio pakaža. Ja chaču prosta raźvivacca, u roznych śfierach siabie pasprabavać, daviedacca, što mnie sapraŭdy padabajecca, i ŭ budučyni być prosta cikavaj asobaj, dobrym čałaviekam, jaki budzie dapamahać inšym ludziam», — padkreślivaje dziaŭčyna.
Jana taksama kaža, što baćki i ŭsie rodnyja jaje vielmi mocna padtrymlivali na etapie zdymak: «Jany mnie davali, viadoma ž, parady, mudryja parady. Pastajanna była padtrymka ad mamy, jakaja sa mnoj jeździła na zdymki. Padtrymlivała piedahoh — Dzina Hieorhijeŭna, jakaja navučyła mianie maŭlenčamu mastactvu. My ź joj zajmalisia na praciahu dvuch siezonaŭ — vosień, zima i troški viasny — da pačatku zdymak, kab «padredahavać» majo maŭleńnie, zrabić jaho bolš pryhožym».
A voś kumiraŭ siarod miedyjaasobaŭ u jaje niama. Časam, kali niešta hladzić, jana adznačaje cikavyja momanty, znachodzić prykłady, jak treba ŭ niejkich situacyjach dziejničać, jak słovy pravilna padbirać.
u budučyni być dobrym čałaviekam? a zaraz što zaminaje im być?
fantamasa jon nahadvaje, a nie pryncesu. pryncesa Leja pryhožaja... dobraja