Trapić u Polšču praź Litvu stała składaniej. U čym prablema?
Stała viadoma pra vypadki, kali ŭładalnikam nacyjanalnaj polskaj vizy typu D litoŭskija pamiežniki admaŭlajuć va ŭjeździe. «Naša Niva» raźbirałasia, čamu tak adbyvajecca.
Nie mohuć nazvać, dzie pracujuć
Składanaści ź pierasiačeńniem biełaruska-litoŭskaj miažy ŭźnikali tolki ŭ tych, chto maje nacyjanalnuju polskuju pracoŭnuju vizu typu D, ale nie moža dakazać, što jedzie na pracu.
Jak raskazaŭ «Našaj Nivie» litoŭski pahraničnik punkta propusku «Miadzininkaj», patrabavańnie dakazać metu pajezdki źjaŭlajecca całkam zakonnym, i ŭ im niama ničoha novaha. Ale ciapier takaja pavyšanaja ŭvaha da biełarusaŭ z pracoŭnymi polskimi vizami źviazana z tym, što apošnim časam istotna pavialičyŭsia patok ludziej, jakija nibyta jeduć na pracu ŭ Polšču praź Litvu.
«Raniej takich vypadkaŭ było nie tak šmat, tamu na heta nichto nie źviartaŭ dadatkovaj uvahi. Ale z časam my zaŭvažyli, što takich tranzitnych padarožnikaŭ stanavicca ŭsio bolš.
Pa tym, jak časta jany pierasiakajuć miažu i jak doŭha znachodziacca na terytoryi ES, možna zrazumieć, što častka ź ich da Polščy navat nie dajazdžaje. Abo dakładna nie moža tam paśpiavać pracavać, bo amal uvieś čas znachodzicca ŭ Biełarusi, a pajezdki ŭ ES nosiać karotkaterminovy charaktar».
Pa słovach pamiežnika, pry dadatkovaj praviercy vystviatlajecca, što častka tych, chto maje pracoŭnuju polskuju vizu, nie tolki nie moža dakumientalna paćvierdzić fakt pracy ŭ Polščy, ale i nie moža navat nazvać, dzie kankretna tam pracuje.
«Tamu ciapier litoŭski bok budzie bolš pilna pryhladacca da takich ludziej i patrabavać dakazać metu pajezdki. Kali čałaviek, naprykład, maje pry sabie pracoŭny dahavor ad polskaj firmy, to jon moža biez prablem jechać praź Litvu tranzitam u Polšču. Dla tych, chto sapraŭdy tam pracuje, a nie tolki maje vizu, ničoha nie źmianiłsia».
Ź inšymi typami šenhienskich i nacyjanalnych viz pakul prapuskajuć biez dadatkovych patrabavańniaŭ.
Čamu litoŭskija pamiežniki zacikavilisia mienavita takim typam viz?
Sprava ŭ tym, što z ulikam biahučaj situacyi, kali atrymać vizu ŭ ES dla biełaruskich hramadzian stała vialikaj prablemaj, pracoŭnaja polskaja viza zastałasia adnoj z najbolš dastupnych.
U Biełarusi, a taksama ŭ samoj Polščy jość šerah kampanij-pasrednikaŭ, jakija dapamahajuć biełarusam adkryć vizy takoha typu.
Zaprašeńnie na pracu ad imia polskaj firmy pasredniki pradajuć pa canie kala 200 dalaraŭ, čakać taki dakumient daviadziecca kala 2-3 tydniaŭ. Ale pracoŭny dahavor, jaki mohuć zapatrabavać na miažy ŭ hety lik nie ŭvachodzić. Zapis na padaču taksama apłačvajecca asobna. Hruba kažučy, za 200 dalaraŭ vam pradajuć tolki padstavu dla atrymańnia vizy.
Jak praviła, «lipavy» pracoŭny dahavor daje mahčymaść adkryć vizu terminam na hod z mahčymaściu znachodžańnia ŭ Polščy 365 dzion.
Pasredniki śćviardžajuć, što ŭ vypadkach, kali čałaviek nie jeździć nadta časta praź miažu, to, jak praviła, nijakich dadatkovych pytańniaŭ pry pierasiačeńni hranicy ŭ pamiežnikaŭ nie ŭźnikaje.
Ale za asobnuju płatu prapanujuć nabyć pracoŭny dahavor ad firmy, jakaja zrabiła zaprašeńnie.
Čytajcie taksama: Jeŭraparłamient padtrymaŭ ustupleńnie Charvatyi ŭ Šenhien
Daśledavańnie: U Litvu pierajechali kala 40 tysiač biełarusaŭ
