Cichanoŭskaja razam z členami pierachodnaha kabinieta sustrełasia z polskim premjeram
Śviatłana Cichanoŭskaja siońnia pradstaviła premjer-ministru Polščy Matevušu Maravieckamu Abjadnany pierachodny kabiniet i jaho čalcoŭ Taćcianu Zareckuju, Alinu Koŭšyk, Paŭła Łatušku i Alaksandra Azarava. Sustreča adbyłasia padčas Varšaŭskaha forumu pa biaśpiecy 4 kastryčnika, piša «Radyjo Svaboda».
Matevuš Maraviecki i Śviatłana Cichanoŭskaja
Cichanoŭskaja raskazała Maravieckamu pra padrychtoŭku płana «Pieramoha», jany abmierkavali pytańnie rehistracyi kabinieta ŭ Polščy, a taksama kanfierencyju ABSIE, jakaja maje adbycca ŭ śniežni ŭ Łodzi. Išła havorka taksama pra sinchranizavanyja sankcyi Zachadu, kab u režymu nie było mahčymaści ich abychodzić i zarablać na niejkich schiemach.
Padčas sustrečy havaryłasia taksama pra pytańni identyčnaści i kultury. Pradstaŭnica ŭ spravie nacyjanalnaha adradžeńnia Alina Koŭšyk kazała pra biełaruskija sadki i škoły ŭ Polščy, u adkaz joj było paviedamlena, što polski bok całkam padtrymlivaje jaje inicyjatyvy.
Akramia taho, siońnia Śviatłana Cichanoŭskaja naviedała ofis arcybiskupa Varšavy kardynała Kazimieža Nyča. Razmova na sustrečy išła pra toje, kab adkryć u Polšy biełaruskuju parafiju i dapamahčy biełarusam-katalikam jak u Biełarusi, tak i ŭ Polščy. Arcybiskup paabiacaŭ, što budzie słužyć biełaruskuju słužbu na pačatku adventa.
Akramia taho, Cichanoŭskaja praviała ŭ Varšavie sustrečy ź ministram zamiežnych spraŭ Charvatyi, ambasadaram ZŠA ŭ ABSIE Majkłam Karpienteram, a taksama amierykanskim sienataram-demakratam Krystafieram Miorfi.
Patrabavańnie vyvadu rasijskich vojskaŭ ź Biełarusi, bolšy sankcyjny cisk na režym i padtrymka hramadzianskaj supolnaści Biełarusi — heta try rečy, praź jakija, pavodle Cichanoŭskaj, ZŠA moža dapamahčy našaj krainie.
Čytajcie taksama:
Cichanoŭskaja sustrełasia ź ministram unutranych spraŭ Polščy, jon padtrymaŭ jaje pierachodny kabiniet
