Kitaj patraciŭ na «Adzin pojas, adzin šlach» tryljon dalaraŭ. Ale atrakcyjon niečuvanaj ščodraści, zdajecca, zakryvajecca
Kitaj vydatkavaŭ 1 tryljon dołaraŭ na pašyreńnie svajho ŭpłyvu ŭ Azii, Afrycy i Łacinskaj Amierycy praź infrastrukturnuju prahramu «Adzin pojas, adzin šlach». Zaraz, pa słovach ludziej, jakija ŭdzielničajuć u pracesie pryniaćcia palityčnych rašeńniaŭ, Piekin pracuje nad kapitalnym pierahladam prablemnaj inicyjatyvy, piša WSJ.
Zapavolvańnie hłabalnaj ekanomiki ŭ spałučeńni z rostam pracentnych stavak i vysokaj inflacyjaj pastavili krainy ŭ ciažkaje stanovišča ŭ płanie vypłaty daŭhoŭ Kitaju. Dziasiatki miljardaŭ dalaraŭ kredytaŭ akazalisia nieefiektyŭnymi, i šmatlikija prajekty raźvićcia spynilisia. Mnohija ekanamisty i inviestary kazali, što kitajskaja praktyka kredytavańnia vyklikała pazykovyja kryzisy ŭ Šry-Łancy i Zambii.
Amal dziesiacihodździe ŭłady cisnuli na kitajskija banki, kab jany vydavali bolš kredytaŭ. Ale zaraz kitajskija čynoŭniki abmiarkoŭvajuć bolš kansiervatyŭnuju prahramu, jakaja va ŭnutranych dyskusijach atrymała nazvu «Adzin pojas, adzin šlach 2.0». Hetaja prahrama maje bolš stroha aceńvać novyja prajekty dla finansavańnia.
Kiraŭnik Kitaja Si Czińpin adnojčy nazvaŭ inicyjatyvu «prajektam stahodździa», ale stała vidavočna, što prahrama słaba ŭličvaje źmieny suśvietnaha paradku. Na listapadaŭskaj sustrečy z vysokapastaŭlenymi čynoŭnikami Si adznačyŭ, što mižnarodnaje asiarodździe dla «Pojasa i šlachu» stanovicca «ŭsio bolš składanym», i padkreśliŭ nieabchodnaść uzmacnieńnia kantrolu za ryzykami i pašyreńnia supracoŭnictva.
Kitajskija banki ŭžo rezka skaracili kredytavańnie novych prajektaŭ u krainach ź nizkim uzroŭniem dachodu, zasiarodziŭšysia na ačystcy isnujučych kredytnych partfielaŭ.
Pa słovach ekanamistaŭ, amal 60% zamiežnych pazyk Kitaja ciapier naležać krainam ź finansavymi ciažkaściami, u paraŭnańni z 5% u 2010 hodzie.
Kitaj pačaŭ supracoŭničać ź inšymi kredytorami, kab ablehčyć situacyju biahučaj pazykovaj bahny. Dla hetaha Piekinu pryjšłosia admovicca ad svajho daŭniaha supracivu supracoŭnictvu ź mižnarodnymi instytutami, takimi jak Paryžski kłub.
Hety praces moža prymusić kitajskija banki pryniać straty, suprać čaho jany daŭno vystupajuć. Na praciahu mnohich hadoŭ Piekin addavaŭ pieravahu padaŭžać terminy pahašeńnia prablemnych kredytaŭ. Hetaja stratehija ryzykuje padoŭžyć prablemy z zapazyčanaściu, a nie vyrašyć ich.
Piekin taksama źmienšyŭ hradus rytoryki ŭ dziaržaŭnych ŚMI. U toj čas jak raniej jon rekłamavaŭ ekanamičnyja pieravahi kitajskaha kredytavańnia dla krain-atrymalnikaŭ, zaraz jon robić akcent na kiravańni ryzykami i palapšeńni mižnarodnaha supracoŭnictva. Kitaj sprabuje skarektavać kurs.
Ale ŭ čym prablema? Bolš za 10 hadoŭ tamu Kitaj ubačyŭ mahčymaść dla svaich dziaržaŭnych finansavych instytutaŭ pašyryć achop i atrymać lepšuju addaču ad svaich hrašovych srodkaŭ praź inviestycyi za miažoj.
Ułady zaklikali kredytoraŭ finansavać takija prajekty, jak šachty i čyhunki, kab dać mahčymaść krainam, jakija raźvivajucca, i majuć pryrodnyja resursy, lepš zabiaśpiečvać kitajski rynak i stvarać pracoŭnyja miescy dla kitajskich padradčykaŭ.
Paśla prychodu da ŭłady ŭ 2012 spadar Si pašyryŭ hetyja namahańni i prasoŭvaŭ inicyjatyvu ŭ ramkach svajho płana pa pašyreńni kitajskaha ŭpłyvu i stvareńni rynkaŭ dla kitajskich tavaraŭ.
U 2015 hodzie, kali abvał fondavaha rynku ŭ Kitai źniziŭ unutrany popyt, Piekin vykarystaŭ inicyjatyvu dla ekspartu tavaraŭ, jakich u krainie było praźmierna, takich jak stal i tekstyl. Kitajskija banki časta patrabavali ad krain, jakija atrymlivali vyhadu ad ich finansavańnia, zaklučać damovy z kitajskimi pastaŭščykami i vytvorcami.
Usiaho za dziesiać hadoŭ, pavodle MZS, Kitaj vydatkavaŭ kala 1 tryljona dołaraŭ u vyhladzie kredytaŭ i inšych srodkaŭ na prajekty raźvićcia amal u 150 krainach, takich jak Ekvador i Anhoła. Kitaj upieršyniu staŭ najbujniejšym aficyjnym kredytoram u śviecie.
Pavodle analitykaŭ, amierykanskija dziaržaŭnyja ŭstanovy zaraz vyłučajuć hrantaŭ i pazyk u 2 razy mienš za kitajcaŭ.
Kredytavańnie vyklikała pretenzii ŭ Vašynhtonie nakont taho, što Kitaj pierahružaje krainy darahimi daŭhami.
Da 2017 hoda kiraŭniki kitajskich bankaŭ skardzilisia ŭ Piekin na toje, što ich prosiać finansavać prajekty, u jakich mała pierśpiektyŭ prybytku. Niekatoryja kredytory pahražali spynić padtrymku peŭnych prajektaŭ, kali tolki rehulujučyja orhany nie dazvolać im rastłumačyć, što hetyja pazyki byli zroblenyja «ŭ adpaviednaści z palitykaj», tamu banki nie buduć nieści adkaznaść za defołty.
Kitajskija banki, jakich stymulavali ŭłady, davali kredyty krainam z abmiežavanymi mahčymaściami ich pahašeńnia. U Šry-Łancy partovy prajekt, padtrymany kitajskimi hrašyma, nie zdoleŭ stvaryć dastatkovuju kolkaść trafiku dla absłuhoŭvańnia doŭhu.
Pakistan adstavaŭ pa apłacie elektraenierhii z novych kitajskich enierhietyčnych prajektaŭ, što pryviało da deficytu elektraenierhii.
Mnohija krainy-pazyčalniki taksama nazapasili zapazyčanaść u pryvatnych rynkavych kredytoraŭ, jakija takim samym čynam pavialičyli kredytavańnie krain, jakija raźvivajucca.
Kitajskija kredytory pačali prałanhavać staryja kredyty i razdavać novyja, kab utrymać prablemnych pazyčalnikaŭ. Jany padoŭžyli hrafiki płaciažoŭ i praciahnuli lhotnyja pieryjady, kab jašče bolš palehčyć ciažkaści z apłataj, chacia hetaha časta było niedastatkova.
Pakistan atrymaŭ kala 23 miljardaŭ dalaraŭ u vyhladzie novych kredytaŭ z kitajskich krynic u pieryjad z 2017 pa minuły hod — heta finansavańnie, pryznačanaje dla ŭmacavańnia valutnych reziervaŭ i kredytnych rejtynhaŭ krainy, kab vydatki na absłuhoŭvańnie doŭhu nie vyraśli. Pakistanu ŭsio roŭna pryjšłosia źviarnucca pa dapamohu da Mižnarodnaha valutnaha fondu.
Kitajskija banki časta nastojvali na tym, kab pazyčalniki abiacali vyklučyć kitajskija pazyki z restrukturyzacyi ŭ styli Paryžskaha kłuba. Hety padychod harantavaŭ by, što ŭ vypadku defołtu daŭhi Kitaju buduć vypłačanyja ŭ pieršuju čarhu. Ale amal try čverci kitajskich kredytnych kantraktaŭ vyklučajuć taki padychod.
Uletku 2020 hoda spatrebiłasia šeść tydniaŭ kruhłasutačnych pieramovaŭ pamiž G-20, Paryžskim kłubam i Kitajem, kab prymusić Piekin dasiahnuć techničnaha pahadnieńnia ab dałučeńni da ahulnaj kancepcyi. Spadaru Si spatrebiłasia jašče niekalki tydniaŭ, kab padpisać.
Kitaj pahadziŭsia sychodziačy ź pierakanańnia, što kitajskim kredytoram budzie lepš abaraniać svaje intaresy, kali jany buduć kaardynavać svaje dziejańni ź inšymi kredytorami. Dla niekatorych u Piekinie ahulnaja kancepcyja stała «vyratavańniem tvaru» i vychadam z daŭniaha supraciŭleńnia ŭstupleńniu ŭ Paryžski kłub.
Ministerstva finansaŭ Kitaja, jakoje vałodaje častkami bujnych kitajskich kredytoraŭ, takich jak «Kitajski bank raźvićcia», pa-raniejšamu aścierahajecca dazvalać bankam nieści straty pa svaich kredytach, asabliva ŭ toj čas, kali banki znachodziacca pad pilnaj uvahaj z-za hłybokaha spadu na kitajskim rynku nieruchomaści.
Niekatoryja pradstaŭniki Narodnaha banka Kitaja zaklikajuć ułady być bolš hnutkimi ŭ pieramovach ab restrukturyzacyi daŭhoŭ. Jany zaklikajuć kitajskija ŭłady da dziejańniaŭ va ŭmovach chutkaha pavyšeńnia staŭki Fiederalnaj reziervovaj sistemy ZŠA. Pavyšeńnie staŭki ŭ ZŠA vyklikaje rost koštu dołara i robić absłuhoŭvańnie zamiežnych daŭhoŭ daražejšym dla krain, jakija raźvivajucca.
Kitaj praciahvaje pieramovy z udziełam kredytoraŭ u Čadzie, Efiopii i Zambii, jakija niekatoryja kitajskija čynoŭniki razhladajuć jak test dla novaha padychodu.
Kitajskija kredytory pieršapačatkova admovilisia ŭdzielničać u pieramovach ab restrukturyzacyi daŭhoŭ Zambii paśla taho, jak u kancy 2020 hoda jana abjaviła defołt pa mižnarodnych ablihacyjach na 3 miljardy dołaraŭ. Usio źmianiłasia niekalki miesiacaŭ tamu, kali Kitaj razam z Francyjaj staŭ sustaršynioj kamiteta kredytoraŭ Zambii.
Hetym letam kamitet chutka dasiahnuŭ pahadnieńnia ab vyłučeńni 1,4 miljarda dołaraŭ ekstranaha finansavańnia MVF. Ciapier viaducca pieramovy ab zaklučeńni ŭhody pa restrukturyzacyi źniešniaha doŭhu Zambii ŭ pamiery 17 miljardaŭ dalaraŭ, tracina jakoha naležyć 18 kitajskim kredytoram.
Poŭnaje adstupleńnie ad «Adnaho pojasu, adnaho šlachu» małaimavierna. Si, jaki imkniecca padoŭžyć svajo panavańnie na treci termin, pa-raniejšamu ličyć, što inicyjatyva adyhryvaje važnuju rolu ŭ prasoŭvańni roli Kitaja na suśvietnaj arenie, sychodziačy z apošnich jahonych vystupaŭ.
Niahledziačy na ŭsie prablemy, za apošniaje dziesiacihodździe inicyjatyva zdoleła pryciahnuć bolš krain u arbitu Piekina, i mnohija krainy-recypijentki hałasavali ŭ AAN tak: jak i Kitaj. Mienšaja dastupnaść kitajskich kredytaŭ moža pryvieści da taho, što Kitaju budzie składaniej kanviertavać pazyki ŭ palityčnuju łajalnaść.
