Novy «Vialiki Kamień», zapłanavany ŭradam pad Baranavičami, prapanujuć zrabić Tatarstanu
Premjer-ministr Raman Hałoŭčanka padčas vystupleńnia na biznes-forumie «Tatarstan — Biełaruś» paćvierdziŭ upieršyniu ahučanyja ŭ žniŭni namiery ŭrada zasnavać pad Baranavičami anałah stvoranaha pad Smalavičami kitajskaha industryjalnaha parka «Vialiki Kamień». Pa jaho słovach, tolki i zastajecca, što dapracavać narmatyŭnuju bazu pad hetyja mety. A Tatarstan razhladajecca jak asnoŭny partnior.
Hałoŭčanka adznačyŭ, što stvareńnie takoha parka — adzin sa sposabaŭ uklučeńnia małoha i siaredniaha biznesu ŭ vytvorčyja łancužki. Maŭlaŭ, navat dla małych vytvorčaściaŭ na pačatkovym etapie patrebnyja vialikija kapitalnyja ŭkładańni. Tamu pavinny być hatovyja infrastruktura i miesca, kudy pradprymalniki mohuć «za try try dni zajechać, padpisać usie dakumienty, pastavić abstalavańnie i pačynać pracavać».
«My ciapier adpracoŭvajem taki piłotny prajekt u Baranavičach. Pakul nie mahu skazać dakładna, ale, chutčej za ŭsio, pačniom realizoŭvać jaho tam. Moža, jon budzie nie taki vialiki pa abjomie, ale my padabrali miesca zychodziačy z taho, što tam jość pracoŭnyja resursy adpaviednyja, vielmi zručnyja transpartnyja kamunikacyi: aŭtamabilnyja, čyhunačnyja», — patłumačyŭ ideju premjer.
Dla hetaha kamiercyjnaha prajekta biełaruski bok šukaje prydatnuju kampaniju ŭ Tatarstanie, jakaja ŭžo maje vopyt pracy ŭ takich pramysłovych zonach z asablivym režymam. Biełaruś ža, pa słovach Hałoŭčanki, sa svajho boku akaža ŭsiu patrebnuju dapamohu z punktu hledžańnia kapitalnych układańniaŭ.
Čytajcie taksama:
Urad źbirajecca rabić u Baranavičach «Vialiki Kamień» dla biełaruskich pradprymalnikaŭ
