«Ciapier ja razumieju, što heta vierch cynizmu». Jak falsifikavali «spravu ciukoŭ»
Hod tamu, 1 vieraśnia, MUS adrapartavała ab zatrymańni hrupy minčukoŭ, jakija razmalavali «pratesnymi nadpisami» bolš jak 80 ciukoŭ ź sienažom na poli pad Dziaržynskam. Akcyju inicyjavaŭ praz telehram «nieviadomy chłopiec», jakoha potym nie akazałasia siarod fihurantaŭ spravy, zatrymlivali ŭsich žorstka: z aŭtamatami, dronami i źbivańniami. Praź piać miesiacaŭ sudździa Staŭbcoŭskaha rajona Viktoryja Sudnik asudziła šaściarych čałaviek da hoda kałonii za «chulihanstva», a šmatdzietnaj maci pryznačyła paŭtara hoda «chatniaj chimii». Fihuranty hučnaj spravy ŭžo adbyli terminy, adnak pytańni nakont jaje ŭsio jašče zastalisia. Asudžanaja da hoda źniavoleńnia pa hetaj spravie Alena Dziadziula, jakaja vyzvaliłasia ŭ traŭni z homielskaj žanočaj kałonii, raspaviała «Viaśnie» pra toje, jak i chto falsifikavaŭ rezanansnuju «spravu ciukoŭ».
Skrynšot ź videa MUS
U hrupie byŭ vośmy čałaviek, jakoha nie akazałasia siarod zatrymanych
Vina fihurantaŭ spravy paćviardžałasia na sudzie pakazańniami śviedak — supracoŭnikaŭ milicyi i kałhasa, aktam śpisańnia, u jakim pra farbu nie było ničoha skazana, pryznańniem viny adnaho abvinavačanaha. Jašče na sudzie abvinavačanyja zajaŭlali, što akcyju, pa sutnaści, arhanizavaŭ «nieviadomy chłopiec», jaki ŭ telehramie prapanavaŭ abvinavačanym razmalavać ciuki pad Dziaržynskam. Na sudzie jaho apisvali jak 27-hadovaha chłopca ŭ čornaj vopratcy i mascy.
«Mabyć, heta byŭ padstaŭny supracoŭnik milicyi», — kazaŭ na sudzie palitviazień.
Pavodle abvinavačanych, u mašynie «nieviadomy chłopiec» raspaviadaŭ «niejkija svaje historyi, pavodziŭ siabie krychu dziŭna, vielmi padlizvaŭsia, sprabavaŭ padsunucca bližej», i heta «krychu ŭstryvožyła» adnu z abvinavačanych. Zhodna ź jejnymi słovami, mienavita jon napisaŭ joj zahadzia, što jany pajeduć na Pcič pa inšych. Jon skazaŭ, što tam buduć usie ludzi, a što kankretna tam pavinna być, jana nie viedała.
Siarod zatrymanych jaho nie akazałasia.
«Ja tak i nie razumieju: ci heta byŭ naš čałaviek i ŭ jaho atrymałasia źbiehčy, ci heta byŭ supracoŭnik milicyi, jaki z nami jechaŭ u mašynie», — kaža paśla vyzvaleńnia Alena Dziadziula.
Na sudzie jaho nie dapytvali ŭ jakaści śviedki. Jon taksama nie fihuravaŭ u materyjałach spravy.
Były palitviazień pa hetaj spravie Maksim Dubieška ŭ intervju vydańniu «Zierkało» raskazaŭ:
«Jany [siłaviki] byli ŭ kursie, dzie my znachodzimsia, kolki nas, dzie stajać našy mašyny. Pačali kryčać: «Ruki za hałavu!» Pakłali tvaram u ziamlu, paznačyli farbaj patylicy i zapiaści, razmalavali našu vopratku. Niejki čałaviek u pinžačku źniaŭ nas na videa i pieradaŭ u RAUS. Paźniej hetyja ludzi ŭ spravie nie fihuravali naohuł, jak byccam ich i nie było. Arhanizatara hetaha mierapryjemstva siarod zatrymanych nie akazałasia. Ščyra, ja navat nie razhladaŭ varyjant, što chtości moža chaatyčna sabrać ludziej z roznych čataŭ i naŭmysna zładzić pravakacyju. Navošta? Akazvajecca, jość navošta: kab jon moh dać spravazdaču, atrymać list z padziakaj ci pavyšeńnie pa słužbie».
Abvinavacili ŭ psavańni sienažu, ale nie farbavańnie ciukoŭ pryviało da hetaha
Zhodna ź viersijaj abvinavačvańnia, usiaho abvinavačanyja nanieśli farbavalnikam čyrvonaha i čornaha koleraŭ vyjavy roznaha źmiestu na 82 pački sienažu, jakija naležali AAT «Krutahorje-Pietkavičy», tym samym paškodziŭšy pački, ź jakich 82 ciuki ź sienažom z pryčyny parušeńnia technałohii zachoŭvańnia pryjšli ŭ nieprydatny dla dalejšaha vykarystańnia stan, to-bok byli źniščanyja. U vyniku była nibyta pryčynienaja majomasnaja škoda arhanizacyi na ahulnuju sumu 1512 rubloŭ.
Na sudovym pasiadžeńni było ahučana niekalki pryčynaŭ psavańnia sienažu, a mienavita:
- Parušeńnie hiermietyčnaści rułonaŭ,
- Paryŭ ahrastrejč-plonki,
- Ad nieraŭnamiernaha nahravańnia sienažu i pierapadaŭ tempieratury;
- Parušeńnie terminaŭ dla fiermientacyi sienažu;
- Nasyčeńnie 12 słajoŭ ahrastrejč-plonki farbavalnym rečyvam;
- Traplańnie vilhaci ŭ sianaž;
- Kołatyja paškodžańni rułonaŭ;
- Parušeńnie śviatłoprazrystaści plonki.
Siarod ich niama naniasieńnia farby. Sapraŭdnaja pryčyna psavańnia sienažu tak i nie była vyjaŭlenaja.
Ciuki sapsavalisia ad fizičnych paškodžańniaŭ. Što ŭ dakumientach?
U materyjałach spravy jość vysnova DU «Dziaržynskaja rajonnaja vieterynarnaja stancyja» №144a/282a ad 16 listapada 2021 hoda, u jakoj vyznačana, što ŭsie 72 rułony paškodžanyja ćvillu, majuć hnajavy, hniłasny pach. U hetych dakumientach paznačana pryčyna psavańnia sienažu — paryŭ ahrastrejč-plonki. Pra farbavalnyja rečyvy niama anivodnaha zhadvańnia.
Taksama niama ni słova pra farbu ŭ akcie śpisańnia AAT «Krutahorje-Pietkavičy», jaki byŭ padpisany ŭžo paśla pačatku suda. Tam było adznačana, što ciuki sapsavalisia ad fizičnych paškodžańniaŭ, choć palitviaźniam nie vystaŭlali abvinavačańnie ŭ paryvach ci parezach. Na sudzie adzin śviedka naŭprost zajaviŭ, što akt padpisany paśla pačatku suda.
«U ich pakazańniach prasočvajecca biezhaspadarlivaść i biezadkaznaść». A što kazali supracoŭniki AAT na sudzie?
Na sudzie byli dapytanyja siem supracoŭnikaŭ AAT «Krutahorje Pietkavičy». Padčas pracesu stała viadoma, što dvoje abvinavačanych pa spravie prapanavali śledčym całkam vykupić razmalavanyja ciuki ci abmyć ich (bo ŭ adnaho abvinavačanaha svaja klininhavaja kampanija), ale prapanovy navat nie pieradali dyrektaru kałhasu.
«Było zrazumieła, što im skazali raskazać na sudzie, što ciuki papsavalisia ad farby, a jakim čynam, jany navat nie damovilisia: adzin kazaŭ, što niapravilna śviatło traplaje, inšy — farbaj plonka papsavałasia, treci — svaju viersiju», — zaŭvažaje Alena Dziadziula.
«Sud nie maje padstavaŭ sumniavacca ŭ abjektyŭnaści pakazańniaŭ śviedak, bo jany paśladoŭnyja, nie znachodziacca ŭ supiarečnaści pamiž saboj i inšymi dokazami, zdabytymi na stadyi papiaredniaha rasśledavańnia i ŭ sudovym pasiadžeńni. Padstavaŭ u śviedak ahavorvać abvinavačanych niama», — havorycca ŭ prysudzie suda. |
Hałoŭny zaatechnik A. A. Huštuk na sudzie ŭ svaich pakazańniach adznačyŭ niekalki pryčynaŭ psavańnia sienažu. Voś što jon kazaŭ na pracesie:
«Kali pačali skormlivać, ubačyli, što jany sapsavanyja», «byli padranyja, źniatyja častki plonki», «mahli parvacca na traliku», «byli razarvanyja», «ad farby nie, pleśnieje ad vilhaci», «mahli być i inšyja ŭździejańni na ciuki».
«Z pakazańniaŭ Huštuka stanovicca zrazumieła, što sapraŭdnaj pryčyny psavańnia rułonaŭ ź sienažom jon pakazać nie moža, ale sprabuje schavać svaju biezhaspadarlivaść», — kaža Alena Dziadziula.
Bryhadzir Chamienka ŭ svaich pakazańniach pramaŭlaje nastupnaje: «na jakaść upłyvaje hiermietyčnaść», «praz try dni ŭsie ciuki byli biełyja». Z hetych pakazańniaŭ stanovicca zrazumieła, što sapsavacca sianaž moža tolki pry parušeńni hiermietyčnaści rułonaŭ, što i paćviardžajecca technałohijaj narychtoŭki.
«Jakim čynam była parušanaja hiermietyčnaść rułonaŭ farbavalnymi rečyvami, u sudovym pasiadžeńni nie było pradstaŭlena, i ekśpiertyzy nie pravodzilisia», — źviartaje ŭvahu byłaja palitźniavolenaja.
Hałoŭnaja ekanamistka T. V. Tarantuchina na sudzie adznačyła, što na poli ź sienažom nie była i rułony nie bačyła, a tolki robić zdahadku, što naniasieńnie farbavalnaha rečyva na plonku parušyć jejnuju śviatłoprazrystaść. Vidavočna, što ekanamistka z pryčyny zajmanaj pasady i nie moža dać acenku psavańniu sienažu.
Viadučy inžynier S. A. Tryhub raskazaŭ na sudzie, što na rułonach byli kołatyja paškodžańni, ale jon ich nie fiksavaŭ i nikudy pra heta nie dakładvaŭ. Bryhadzir D. A. Chamienka kazaŭ na pracesie: «Ciuki byli pierakulenyja malunkami ŭniz», «u pieršy dzień paśla rasfarboŭvańnia ich pierakulili».
Dyrektar AAT «Krutahorje-Pietkavičy» Juryj Klimaš hruntavaŭ svaje pakazańni na dakładach svaich supracoŭnikaŭ. Na sudzie jon śćviardžaŭ, što sianaž z razmalavanych ciukoŭ nielha było vykarystoŭvać dla padściłki žyviołam, bo «farbavalnik moh prasačycca ŭ siena i atrucić žyviołaŭ, jakija žujuć padściłku». A trava, jakaja nie nasyciłasia ekskremientami žyvioł, nie niasie ničoha karysnaha pry kampastavańni, tolki pavialičvaje abjom, tamu ŭsie ciuki źniščanyja.
«Pry aznajamleńni z materyjałami spravy vidać, što ŭ pakazańniach śviedak prasočvajecca biezhaspadarlivaść i biezadkaznaść supracoŭnikaŭ AAT «Krutahorje-Pietkavičy». Što i źjaŭlajecca padstavaj pierakładańnia viny ŭ źniščeńni majomaści na mianie i astatnich abvinavačanych»,— robić vysnovy Alena Dziadziula.
Zranku paśla taho, jak usich zatrymanych 1 vieraśnia dastavili ŭ Dziaržynski RAUS, pavodle byłoj palitźniavolenaj, u adździele aburalisia, što ciuki z «pratesnymi nadpisami» ŭsio jašče znachodziacca na poli:
«Tam my čakali da ranicy. Čuli, jak jany [supracoŭniki] panikavali i kryčali, što ciuki dahetul nie prybranyja z pola. A tam torf, miakkaja ziamla, tamu technika nie mahła padjechać da ich».
Pakazańni milicyjantaŭ na sudzie adroźnivajucca ad aficyjnaj viersii MUS
Hod tamu, unačy 1 vieraśnia, na poli niepadalok ad Dziaržynska padčas razmaloŭvańnia «pratesnymi malunkami» ciukoŭ siena byli zatrymanyja siem čałaviek. Alena raspaviadała, što siłaviki ich ŭžo čakali na poli i «techniki było, jak na praśpiekcie, bolš za dziesiać adzinak dakładna». Choć pavodle materyjałaŭ spravy, ich zatrymlivali ŭsiaho try milicyjanty.
«Supierhieroi prosta! Byli dva vidy supracoŭnikaŭ: chutčej za ŭsio, AMAP i SACHR. Jany byli z aŭtamatami, nad nami lotali drony. Kala ciukoŭ chłopcaŭ bili, na vopratcy malavali kryžy našymi bałončykami, kryčali. Mnie taptali ruku nahoj… Dziakuj bohu, što ziamla była miakkaja. Heta było jak u filmie žachaŭ — ruka sychodzić pad ziamlu».
Navat pakazańni dapytanych milicyjantaŭ na sudzie adroźnivalisia ad aficyjnaj viersii MUS.
«Hetaja cyničnaść sudździ mianie ździviła». A sudździa što?
31 studzienia 2022 hoda sudździa Staŭbcoŭskaha rajona Viktoryja Sudnik vyniesła prysudy pa rezanansnaj «spravie razmalavanych ciukoŭ z sałomaj». Siem palitviaźniaŭ pa spravie pryznany vinavatymi pavodle č. 2 art. 339 Kryminalnaha kodeksa (chulihanstva hrupaj asobaŭ). Usim, akramia Kaciaryny Aryka, Sudnik pryznačyła hod kałonii va ŭmovach ahulnaha režymu — Andreju Aryku, Maksimu Dubiešku, Alaksandru Babko, Volzie Dubovik, Alenie Dziadziuli, Iharu Myśliŭcu.
Kaciarynu asudzili na paŭtara hoda «chatniaj chimii» i vyzvalili ŭ zale suda.
Viadoma, što Viktoryja Sudnik pracuje ŭ sudzie Staŭbcoŭskaha rajona z 2016 hoda. Što charakterna, 31 śniežnia 2021 hoda jana była pierapryznačanaja zahadam Łukašenki na pasadu sudździ, a ŭžo praź miesiac Sudnik vyniesła palityčna matyvavanyja prysudy adrazu siami palitviaźniam.
Fihurantka «spravy ciukoŭ» raspaviadaje:
«Ciapier ja razumieju, što heta vierch cynizmu: vyvieści na sudzie da taho, što sprava sfalsifikavana, i potym asudzić ludziej na hod źniavoleńnia. Nakolki možna być žorstkim i cyničnym čałaviekam? Słuchajučy i razumiejučy, što dakumienty sfalsifikavany, što śviedki błytajucca ŭ pakazańniach i chłusiać, vynieści taki prysud. Hetaja cyničnaść sudździ mianie ździviła. Ja nie mahu zrazumieć hetaje rašeńnie sudździ…»
Byłaja palitźniavolenaja adznačaje, što prysud sudździa začytała technična — emocyj nie było bačna praz supraćvirusnuju masku na tvary. Pavodle Aleny, pačała sudździa vyvučać spravu vielmi padrabiazna. Śviedak u sudzie dapytvali dva poŭnyja dni. Z pryčyny adpačynku dyrektara kałhasa sud adkłali na tydzień.
«Mnie raskazali, što sudy Dziaržynska, Žodzina, Minski rajonny sud admovilisia nas sudzić. Ale pahadziŭsia Staŭbcoŭski sud. Na pieršych dniach suda siadzieli vielmi surjoznyja «pałkoŭniki», jakija aburalisia, što vielmi doŭha sudziać nas i što jany štodnia buduć jeździć ź Minska. Bližej da kanca sud paskoryŭsia i chutka vynieśli prysud. Mabyć, ukaz źvierchu pryjšoŭ. Na apošnich pracesach hetych «pałkoŭnikaŭ» užo nie było», — raspaviadaje Alena.
«Maje dziejańni nijakim čynam nie mahli paškodzić ciuki ź sienažom». Padača apielacyi
Usie supiarečnaści pa spravie Alena Dziadziula vykazała ŭ apielacyjnaj skarzie.
«Ja jašče raz chaču zajavić, što maje dziejańni nijakim čynam nie mahli paškodzić ciuki ź sienažom, naniasieńnie farby na ŭpakovačny materyjał, a mienavita na ahrastrejč-plonku ŭ 12 słajoŭ, pryvieści da hnijeńnia i ćvili sianažu niemahčyma. Usie dokazy ŭ sudzie hruntujucca tolki na mierkavańniach śviedak i ich zdahadkach. Pavodle zakanadaŭstva Respubliki Biełaruś mierkavańni, zdahadki, sumnieŭnyja vykazvańni nie mohuć źjaŭlacca dokazami», — pisała jana ŭ apielacyi.
Ale sudovaja kalehija Minskaha abłasnoha suda pad staršynstvam sumnaviadomaha sudździ Siarhieja Jepichava pakinuła jaje biez zadavalnieńnia.
Čytajcie taksama:
«Na poli ich bili, na vopratcy malavali kryžy, mnie taptali ruku nahoj» — eks-palitźniavolenaja Alena Dziadziula raspaviała pra «spravu ciukoŭ»
