Brytanskaja raźviedka: Niahledziačy na kontrnastupleńnie Ukrainy, Rasija budzie staracca nastupać na Danbasie
Minabarony Brytanii publikuje analiz svajoj vajennaj raźviedki, jaki pryśviečany nie ŭkrainskamu kontrnastupu, paviedamleńni ab jakim pastupajuć apošni tydzień, a płanam Rasii na ŭschodzie Ukrainy, paviedamlaje «Bi-bi-si».
Niahledziačy na nieabchodnaść strymlivańnia niadaŭnich ukrainskich nastupalnych dziejańniaŭ, asnoŭnymi namahańniami Rasii va Ukrainie, całkam vierahodna, zastajecca nastupalnaja apieracyja na Danbasie, miarkujuć u brytanskaj raźviedcy.
Asnoŭnymi napramkami rasijskaha nastupu na Danbasie zastajucca Aŭdziejeŭka (pad Danieckam) i Bachmut (60 km na poŭnač). Na hetym učastku rasijskija vajskoŭcy damahlisia najbolšaha pośpiechu, ale jany pa-raniejšamu prasoŭvajucca nie bolš čym na 1 km na tydzień (u kirunku Bachmuta), śćviardžajecca ŭ zvodcy.
Palityčnaj metaj apieracyi ŭ Danbasie amal ź vialikaj vierahodnaściu zastajecca zachop usioj Danieckaj vobłaści, što dazvoliła b Kramlu abviaścić ab «vyzvaleńni Danbasa», miarkujuć aŭtary spravazdačy, choć rasijskija siły nieadnarazova parušali terminy dasiahnieńnia hetaj mety.
Hienštab Uzbrojenych sił Ukrainy 1 vieraśnia śćviardžaŭ, što Uładzimir Pucin zahadaŭ vyjści na administracyjnyja miežy Danieckaj vobłaści da 15 vieraśnia, nahadvaje brytanskaja raźviedka. Jaje ekśpierty ličać dasiahnieńnie hetaj mety małavierahodnym. Jany kažuć, što heta jašče bolš uskładnić płany Rasii pa praviadzieńni refierendumaŭ ab dałučeńni akupavanych terytoryj da Rasijskaj Fiederacyi
