Zasnavalnik Pink Floyd ličyć, što vajnu va Ukrainie raspaliŭ Bajden
Zasnavalnik brytanskaj rok-hrupy Pink Floyd, 78-hadovy Rodžer Uoters, daŭ intervju CNN, u jakim nazvaŭ prezidenta ZŠA Džo Bajdena «padpalščykam vajny».
Adno z pytańniaŭ žurnalista Majkła Śmiarkoniša tyčyłasia turne Uotersa pa Paŭnočnaj Amierycy z šoŭ This is Not a Drill. Padčas vystupleńnia na hihanckim ekranie źjaŭlajucca fotazdymki ludziej, jakich muzykant ličyć «vajennymi złačyncami». U adnym z malunkaŭ uhadvajucca rysy prezidenta ZŠA Džo Bajdena. Fotazdymak supravadžajecca nadpisam «Heta — tolki pačatak».
Na pytańnie viadučaha, što tam miełasia na ŭvazie, Uoters adkazaŭ: «Nu, jon (Bajden) raspalvaje ahoń va Ukrainie, dla pačatku, — heta vielizarnaje złačynstva».
«Čamu b Złučanym Štatam Amieryki nie zaachvocić» prezidenta Ukrainy Uładzimira Zialenskaha da pieramovaŭ, «źniaŭšy nieabchodnaść hetaj žudasnaj, žachlivaj vajny, u jakoj zabita… my nie viedajem kolki… ukraincaŭ i ruskich», — zadaŭ Rodžer Uoters rytaryčnaje pytańnie.
U adkaz žurnalist źviarnuŭ uvahu Uotersa, što toj «usio pierabłytaŭ» i pamyłkova «abvinavačvaje bok, jaki padvierhnuŭsia ŭvarvańniu». Adnak zasnavalnik Pink Floyd praciahvaŭ abaraniać svaju pazicyju, havoračy, što vajna abumoŭlenaja, hałoŭnym čynam, reakcyjaj Maskvy na dziejańni NATA, jakoje padyšło ŭščylnuju da miežaŭ Rasii.
Vykazvańni Uotersa vyklikali, naturalna, vielmi niehatyŭnuju reakcyju ŭ Kijevie i vielmi stanoŭčuju — u Maskvie, miascovyja prapahandysty ŭžo ŭziali jaho ŭ svoj arsienał.
Ničoha asabliva dziŭnaha ŭ takoj pazicyi muzyki, jaki pakinuŭ Pink Floyd jašče ŭ dalokim 1985 hodzie, niama. Jon i raniej rabiŭ zajavy padobnaj skandalnaści. Tak, Uoters, viadomy svajoj aktyŭnaj antyizrailski pazicyjaj, nieadnarazova śćviardžaŭ, što Izrail — heta «rasiscki režym», jaki pravodzić palityku aparteidu i «etničnych čystak». Muzyka taksama źjaŭlajecca aktyŭnym prychilnikam mižnarodnaha ruchu «Boycott, Divestment and Sanctions» (BDS), jaki pravodzić kampanii za bajkot, adklikańnie inviestycyj i sankcyi suprać Izraila.
