Kampanija Meta adklučyła bolš za tysiaču fejsbučnych i instahramnych trolaŭ
Pra pazbaŭleńnie ad trolaŭ paviedamlajecca ŭ spravazdačy kampanii, piša Radyjo Svaboda. Jany pracavali štodnia «ź nievialikim pierapynkam na abied». Usiaho pakul što vydalili 45 akaŭntaŭ «trolaŭ» u sacyjalnaj sietcy Facebook i 1037 — u Instagram.
Meta pačała rasśledavańnie padazronaj aktyŭnaści paśla publikacyi sajta «Fontanka», jakaja vykryvała «fabryku trolaŭ», publična kaardynavanuju praz telehram-kanał «Kibier front Z».
Padčas rasśledavańnia Meta vyjaviła sproby «zaspamić» pasty ŭ sacyjalnych sietkach Instagram, Facebook, TikTok, Twitter, YouTube, LinkedIn, «VKontaktie» i «Adnakłaśniki».
Mišeniami stanavilisia palityki, žurnalisty, akciory i kamiercyjnyja brendy z usiaho śvietu — usie, chto publična asudžaŭ rasijskaje ŭvarvańnie i padtrymlivaŭ Ukrainu.
Apieracyja mieła vidavočny i ŭtojeny składniki, havorycca ŭ spravazdačy Meta. Publična ŭ telehram-kanale «Kibier front Z», u jakim ciapier bolš za 110 tysiač padpisčykaŭ, rehularna publikavalisia zakliki pierachodzić pa spasyłkach na akaŭnty abo peŭnyja pasty i pakidać pad imi prarasijskija kamientary. Tym ža zajmalisia i falšyvyja akaŭnty, jakimi tajemna kiruje «fabryka trolaŭ», — «vierahodna, kab stvaryć uražańnie, što jaje kraŭdsorsinh byŭ efiektyŭnym».
Vyvučyŭšy aktyŭnaść padazronych kamientataraŭ, u Meta pryjšli da vysnovy, što jany pracavali siem dzion na tydzień «ź nievialikim pierapynkam na abied». Akramia taho, Meta vyjaviła «asobnyja vypadki», kali adzin i toj ža akaŭnt publikavaŭ i prarasijskija, i praŭkrainskija kamientary z roźnicaj u niekalki chvilin. U kampanii vykazali zdahadku, što heta mahło być sprobaj padarvać dziejnaść «fabryki trolaŭ» znutry.
Paśla zakančeńnia rasśledavańnia Meta vydaliła 45 akaŭntaŭ «trolaŭ» u sacyjalnaj sietcy Facebook i 1037 — u Instagram. Taksama jana praciahvaje błakavać ich sproby viarnucca.
