Baskietbalistku, jakaja zarablaje najbolš u śviecie, asudzili ŭ Rasii da 9 hadoŭ źniavoleńnia
Uviečary 4 žniŭnia Chimkinski sud Maskvy adpraviŭ amierykanku Brytni Hrajnier u rasijskuju kałoniju. Hrajnier, jakuju ličać adnoj z najvialikšych baskietbalistak našaha času, atrymała taki termin za kartrydžy z vadkaściu dla kureńnia, u jakich źmiaščaŭsia i hašyšny alej.
Fota: AR Photo / Alexandr Zemlianichenko
Spartsmienku zatrymali ŭ lutym 2022 hoda. Tady Hrajnier, jakaja vystupała za jekacierynhburhski kłub UHMK, prylacieła ŭ Rasiju, i na tamožni ŭ jaje rečach znajšli zabaronienaje ŭ Rasii rečyva — hašyšny alej. Z taho času baskietbalistka znachodzicca ŭ SIZA.
Siońnia sud pryznaŭ Hrajnier vinavataj u kantrabadzie narkotykaŭ i vynies joj prysud u 9 hadoŭ źniavoleńnia, a taksama štraf u 1 miljon rasijskich rubloŭ. Jon, darečy, naŭrad ci vykliča ŭ Hrajnier ciažkaści. Amierykanka ličyłasia samaj apłočvalnaj baskietbalistkaj u śviecie i atrymlivała va UHMK zarobak pamieram u 2 miljony dalaraŭ.
Tady, paśla zatrymańnia, pieraśled Hrajnier amal adrazu pryznali palityčna matyvavanym, a amierykanski Dziarždepartamient nazvaŭ Brytni niezakonna zatrymanaj. Heta — važny krok dla taho, kab arhanizoŭvać pieramovy z rasijskimi dypłamatami na temu abmiena amierykanki, i, nakolki viadoma, takija pieramovy ŭžo iduć. Płanujecca abmianiać Hrajnier i inšaha amierykanca Poła Uiłana (adbyvaje 16 hadoŭ za špijanaž) na rasijanina Viktara Buta, jaki atrymaŭ u ZŠA 25-hadovy termin za handal zbrojaj i padtrymku teraryzmu.
Zatrymańnie spartsmienki vyklikała rezanans u śviecie — usio-taki razmova pra dvuchkratnuju alimpijskuju čempijonku i adnu z najlepšych baskietbalistak sučasnaści. U jaje padtrymku vykazalisia zorki amierykanskaha baskietboła, u tym liku i vialiki Lebron Džejms, jaki adznačyŭ: «Na jaje miescy ja b padumaŭ, ci žadaju ja nazad u Amieryku». Žonka Brytni i spartsmieny navat źviartalisia da Bajdena z prośbaj dapamahčy vyratavać Hrajnier.
Vierahodna, reakcyja na siońniašni prysud taksama budzie hučnaj. Užo jość pieršy kamientar ad Džo Bajdena: prezident ZŠA nazvaŭ prysud spartsmiency «nieprymalnym».
«Zrabiła b toje ž samaje». Jak žyvie spartsmienka, što syšła z pjedestała, kali zajhraŭ nie jaje himn
Kryminalist, jaki chacieŭ sustrecca z Pucinym. Čym zapomniŭsia baskietbalist Uładzimir Vieramiejenka, jaki chvalić adpačynak u Krymie?
«Ščerbu ŭvohule nie liču biełarusam». Himnast z «Dziu Salej» Siamion Bukin daŭ pieršaje intervju paśla pierachodu na biełaruskuju movu
