Zatrymali jašče dvuch biełarusaŭ, jakija pryjechali na radzimu z Polščy
Zerkalo.io sa spasyłkaj na pravaabaroncaŭ i karystalnikaŭ sacsietak paviedamlaje pra zatrymańnie dvuch biełarusaŭ, jakija niekalki hadoŭ žyvuć u Polščy i dapamahajuć suajčyńnikam, jakija tam apynulisia. Abodva niadaŭna pryjechali na radzimu ŭ hości da svajakoŭ.
Barys Elkin. Fota: «Viciebskaja viasna»
Adzin z zatrymanych biełarusaŭ — pradprymalnik ź Viciebska Barys Elkin, jaki zajmajecca budaŭničym biznesam u Polščy i čas ad času pryjazdžaŭ na radzimu da svajakoŭ.
1 žniŭnia jaho zatrymali ŭ Viciebsku, a ŭ domie praviali pieratrus. Pryčyny zatrymańnia dakładna nie viadomyja, paviedamlaje «Viciebskaja viasna».
U 2004 hodzie ŭ Viciebsku pradprymalniki ŭčynili haładoŭku suprać stvoranych miascovymi ŭładami pieraškodaŭ dla handlu, Barys Elkin byŭ adnym ź jaje arhanizataraŭ. Paśla 2010 hoda jon pierajechaŭ u Polšču i staŭ suzasnavalnikam kampanii Bel.Pol.Bud.spzoo, jakaja najmaje na pracu biełarusaŭ i dapamahaje ŭciekačam z Ukrainy.
Pavodle infarmacyi krynic «Viciebskaj viasny», biznesmiena mahli zatrymać za fotazdymki ź biełaruskaj nacyjanalnaj simvolikaj u sacsietkach, jakija kvalifikujucca siłavikami jak niesankcyjanavany pikiet.
Druhi biełarus, Raman Hałuza, rodam z Žabinki, žyŭ u Polščy apošnija 9 hadoŭ. 19 lipienia jon pryjechaŭ na radzimu i źnik: pra jaho miescaznachodžańnie ničoha nie było viadoma, a pošukava-ratavalny atrad «Juho-Zapad» u sacsietkach abjaviŭ jaho pošuk.
2 žniŭnia ŭ akaŭntach pašukavikoŭ źjaviłasia infarmacyja, što Hałuza žyvy i jaho miescaznachodžańnie ŭstanoŭlenaje — bieź jakich-niebudź padrabiaznaściaŭ.
A adzin ź biełaruskich błohieraŭ, jaki žyvie u Polščy, raskazaŭ u Instagram, što Raman znachodzicca ŭ SIZA KDB.
U Polščy Hałuza skončyŭ univiersitet, atrymaŭ hramadzianstva, zajmaŭsia vałanciorstvam — u tym liku dapamahaŭ biełaruskim uciekačam. Paśla 19 lipienia, kali jon pierasiek polska-biełaruskuju miažu, vyśvietlić niešta pra jaho los nie ŭdavałasia — nie dapamahła navat napisanaja babulaj zajava ŭ milicyju.
Pa słovach aŭtara publikacyi ŭ Instagram, zatrymańnie Ramana mahło być zahadzia spłanavanaje biełaruskimi siłavikami.
