Vakansija mary: u Kanadzie prapanujuć 78 tysiač dalaraŭ na hod za toje, kab jeści doma cukierki
Kanadski vytvorca cukierak maje vielmi sałodkuju prapanovu dla łasunoŭ z volnym časam. Zadańnie prostaje: častujsia doma cukierkami i atrymoŭvaj za heta sapraŭdny zarobak.
Fota: pixabay.com
Kanadskaja kampanija Candy Funhouse pradaje ŭ internecie roznyja kandytarskija vyraby — ad šakaładnych batončykaŭ da žvački i łakrycy. Niadaŭna firma abviaściła, što šukaje «dyrektara pa sałodkim», i apisańnie vakansii pryvabiła tysiačy pretendentaŭ, piša CNN.
Vakansija praduhledžvaje pracu doma i zarobak pamieram 78 tysiač amierykanskich dalaraŭ na hod (to-bok 100 tysiač kanadskich). Dyrektar pa sałodkim budzie mieć nastupnyja abaviazki: vieści pasiadžeńni rady pa sałodkim, być hałoŭnym dehustataram… i inšyja viasiołyja rečy.
Kanadcy apublikavali vakansiju ŭ lipieni, i na siońnia jany atrymali ŭžo niekalki tysiač zajavak ad pretendentaŭ. Kiraŭnik Candy Funhouse Džamał Chiedžazi raskazaŭ, što kampanija navat atrymoŭvała videazajaŭki ad cełych siemjaŭ, jakija prapanoŭvali padzialić unutry siamji jak abaviazki pa dehustacyi, tak i zarobak. Ale Chiedžazi razumieje, čamu ludziam tak padabajecca vakansija: «Ujavicie sabie svaje najlepšyja ŭspaminy, źviazanyja z sałodkim, i toje, što ciapier heta ŭsio budzie akružać vas kožny dzień na pracy».
Vakansija adkrytaja dla pretendentaŭ uzrostam ad piaci hadoŭ, chacia takim maleńkim kandydatam, napeŭna, dla pracy spatrebicca dazvoł baćkoŭ. Šmat baćkoŭ źniali na videa toje, jak ich dzieci zapaŭniajuć zajaŭku na pracu ŭ Candy Funhouse, i apublikavali heta ŭ siecivie.
Chiedžazi taksama abvierh paviedamleńni z sacsietak pra toje, što dyrektar pa sałodkim budzie pavinien źjadać 3500 cukierak i inšych słodyčaŭ za miesiac (mienavita stolki vidaŭ sałodkaha pradaje kampanija). Kiraŭnik Candy Funhouse patłumačyŭ, što ŭ takim vypadku havorka budzie iści pra 117 słodyčaŭ štodzień, a heta zanadta šmat.
U Japonii pradali adnu višańku za 300 dalaraŭ. Jak takoje mahčyma?
Čamu šviedy jaduć cukierak pa kiłahramie na siamju ŭ tydzień, a zuby ŭ ich adny z najlepšych u Jeŭropie
