U Brazilii raździalili sijamskich bliźniataŭ, jakija zraślisia čarapami
U Brazilii daktaram udałosia raździalić sijamskich bliźniat, złučanych čarapami — tak zvanych kraniapahaŭ. Padrychtoŭka da apieracyi išła z šyrokim užyvańniem virtualnaj realnaści, paviedamlaje Bi-bi-si.
Trochhadovyja Biernarda i Artur Lima byli praapieravanyja ŭ Rya-de-Žaniejra pad kiraŭnictvam daktaroŭ ź dziciačaj balnicy Hrejt-Ormand-stryt u Łondanie.
Daktary patracili miesiacy na toje, kab znajści najbolš biaśpiečny sposab padziełu, praviarajučy hipotezy na virtualnych madelach anatomii chłopčykaŭ, stvoranych na asnovie kampjutarnaj tamahrafii i mahnitna-rezanansnaj tamahrafii.
Chirurh Nur ul Avasie Džyłani nazvaŭ apieracyju «praduktam kaśmičnaj ery». Jon skazaŭ, što ŭpieršyniu chirurhi, jakija znachodzilisia ŭ roznych krainach, pracavali razam u adnym i tym ža «pakoi virtualnaj realnaści».
Usiaho dvajniaty Lima pieranieśli siem apieracyj. Apošniaja doŭžyłasia bolš za 27 hadzin, i ŭ joj brali ŭdzieł amal 100 miedykaŭ.
Džyłani taksama adznačyŭ, što virtualnaja realnaść dazvoliła chirurham niekalki razoŭ prajści apieracyju, nie padviarhajučy dziaciej ryzycy.
Sam chirurh pravioŭ u apieracyjnaj 27 hadzin z usiaho čatyrma 15-chvilinnymi pierapynkami na ježu.
Paśla padziełu ŭ Biernarda i Artura rezka padskočyli arteryjalny cisk i puls. Heta adbyvajecca z usimi sijamskimi bliźniatami paśla paśpiachovaha padziełu. Ale praz čatyry dni jany znoŭ apynulisia ŭ adnoj pałacie, im dali mahčymaść uziacca za ruki, i pakazčyki narmalizavalisia.
Dvajniaty dobra papraŭlajucca ŭ balnicy. U dalejšym im treba budzie šaścimiesiačnaja reabilitacyja.
Doktar Džyłani źjaŭlajecca zasnavalnikam kliniki Gemini Untwined (prykładny pierakład «padzielenyja bliźniaty»), u jakoj jon užo apieryravaŭ sijamskich dvajniat z Pakistana, Sudana, Izraila i Turcyi.
Razam ź im u apieracyi ŭdzielničaŭ doktar Habryel Mufarež, zahadčyk adździaleńnia dziciačaj chirurhii ŭ Instytucie niejrachirurhii imia Paŭła Nimiejera ŭ Rya-de-Žaniejra.
Baćki bliźniat pryvieźli ich u instytut dva z pałovaj hady tamu, i tam jany naziralisia ŭvieś hety čas.
Pa statystycy sijamskija dvajniaty naradžajucca ŭ adnym vypadku z 50-60 tysiač. Usiaho 5% ź ich źjaŭlajucca kraniapahami.
