Stali viadomyja padrabiaznaści spravy bankira Kaściučenki
Pra padrabiaznaści kryminalnaj spravy, razhledžanaj 29 lipienia Minskim haradskim sudom, paviedamiŭ Viarchoŭny sud.
Sudździa Kaciaryna Bandarenka
Pavodle paviedamleńnia, pa spravie prachodzili try čałavieki, nazvanyja tolki pa inicyjałach. Ale dvoje z hetych inicyjałaŭ dobra rasšyfroŭvajucca, jany fihuravali ŭ našym papiarednim materyjale pra hetuju spravu — Siarhiej Kaściučenka (K-ko S.A.) i Alaksandr Mukavozčyk (M.). Proźvišča treciaha fihuranta — Žukoŭski (Ž.), i jon źjaŭlaŭsia, pavodle materyjałaŭ śledstva, namieśnikam Kaściučenki.
Abvinavačanyja ŭchilalisia ad padatkaŭ pry dapamozie stvoranaha TAA «S», dvoje kiraŭnikoŭ jakoha, pad inicyjałami Ja. i K-v A.N., byli «ŭviedzienyja ŭ zman». Złačynnyja dziejańni rabilisia ciaham doŭhaha času, z 1 śniežnia 2007 hoda pa 22 studzienia 2021 hoda, «u parušeńnie Pałažeńnia ab Parku vysokich technałohij, šlacham naŭmysnaha zanižeńnia padatkovaj bazy, u tym liku z dapamohaj uniasieńnia ŭ padatkovyja dekłaracyi zahadzia iłžyvych źviestak».
Ahulnaja suma, ź jakoj nie płacilisia padatki — 1 518 103,92 rubla, heta značyć, u asabliva bujnym pamiery.
U vyniku ŭsie abvinavačanyja byli pryznanyja vinavatymi.
Kaściučenka asudžany da pazbaŭleńnia voli na termin 3 hady 6 miesiacaŭ sa štrafam u pamiery 3 000 bazavych vieličyń u sumie 96 000 rubloŭ z pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, na termin 5 hadoŭ.
Mukavozčyk i Žukoŭski pazbaŭlajucca voli na termin 3 hady i musiać vypłacić štraf u pamiery 3 000 bazavych vieličyń u sumie 96 000 rubloŭ z pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, na termin 5 hadoŭ kožnamu.
Prysud jašče moža być abskardžany i apratestavany ŭ Viarchoŭnym sudzie.
Čytajcie taksama:
Šok u bankach: Siarhieju Kaściučenku, stvaralniku Pryjorbanka, dali try z pałovaj hoda kałonii. Datyčny Baskaŭ?
