Majecie vakansiju? Rumas viarnuŭsia z Rasii i šukaje pracu ŭ Minsku
Jak stała viadoma «Našaj Nivie», były premjer-ministr Biełarusi Siarhiej Rumas kančatkova viarnuŭsia na radzimu paśla sprobaŭ začapicca za pracu ŭ Łondanie, Kijevie i Rasii. Cyrymanijalnaja pasada ŭ Raśsielhasbanku nie adpaviadaje finansavym čakańniam bankira.
Paśla abłavy na siabroŭ i strachovačnaha vyjezdu ź Biełarusi ŭ lutym 2021-ha były premjer Siarhiej Rumas paśpieŭ pažyć u Łondanie, Kijevie i Maskvie.
Čytajcie taksama: Stała viadoma, dzie znachodzicca Siarhiej Rumas i ŭ čym sens pretenzij da jaho
Zatrymacca ŭ Łondanie ŭ Rumasa nie vyjšła, bo znajści tam prymalnuju pracu, chaj navat i biełaruskamu eks-premjeru, prablematyčna: patrebna zachodniaja kvalifikacyja, viedańnie movaŭ. Tudy ž dadajecca vialiki košt na pražyćcio i zvykłaść da peŭnaha ładu žyćcia, jaki nie chočacca źnižać.
Paśla Łondana Rumas padaŭsia ŭ Kijeŭ, dzie znajšoŭ prajektnuju pracu. Jašče ŭviesnu 2021-ha jon kazaŭ «Našaj Nivie», što maje ŭ Kijevie prajekty. Razam z hetym jon atrymaŭ pasadu ŭ Raśsielhasbanku — staŭ siabram naziralnaj rady. I pierajechaŭ u Maskvu.
Čytajcie taksama: Rumas abjaviŭsia ŭ Minsku. Što było dalej?
Ale hetaja pasada — cyrymanijalnaja. Asablivych zarobkaŭ tam nie płaciać. Rumas žyŭ za košt raniejšych zapasaŭ i, jak viadoma «Našaj Nivie», ciapier jon šukaje pracu ŭ Minsku.
Kryminalnaja sprava suprać jahonych siabroŭ i byłych mieniedžaraŭ Banka raźvićcia nie zakranaje niepasredna byłoha premjera — jon nie prachodzić pa joj padazravanym, chacia na samym pačatku ŭ jaho doma i prajšoŭ vobšuk.
Ci zakrytaja sprava, «Naša Niva» nie viedaje.
