Rasija pryhraziła Bałharyi razryvam dypłamatyčnych adnosin, kali jana nie admovicca ad vysyłki rasijskich dypłamataŭ
Ambasadarka Rasii ŭ Bałharyi Eleanora Mitrafanava zajaviła, što Maskva razhladaje mahčymaść razryvu dypłamatyčnych adnosin z Safijaj u vypadku, kali bałhary nie admieniać rašeńnie ab vysyłcy 70 rabotnikaŭ rasijskich dypłamatyčnych pradstaŭnictvaŭ. Pra heta Mitrafanava zajaviła ŭ čaćvier u efiry bałharskaha telekanała BNT, paviedamlaje «Jeŭrapiejskaja praŭda».
Pasolstva Rasii ŭ Bałharyi. Fota: fejsbuk
Adkazvajučy na pytańnie, jakim budzie adkaz Rasii na vysyłku dypłamataŭ, Mitrafanava skazała: «Maskva prymie vielmi kardynalnyja kroki. Heta (vysyłka) nie moža prajści niezaŭvažanym». Na ŭdakładnieńnie, pra što idzie havorka, Mitrafanava zajaviła: «Dypłamatyčnyja adnosiny mohuć być razarvanyja! Maskva prymie rašeńnie».
Akramia taho, bałharskija ŚMI ŭ čaćvier paviedamili, što Rasija nakiravała Bałharyi notu z patrabavańniem admianić rašeńnie ab vysyłcy rasijskich dyplamataŭ pa padazreńni ŭ špijanažy. Paźniej isnavańnie takoha zvarotu paćvierdziŭ i MZS Bałharyi.
U nocie śćviardžajecca, što rašeńnie pavinna być pierahledžana da paŭdnia 1 lipienia, inakš «pierad rasijskim kiraŭnictvam budzie nieadkładna uźniataje pytańnie ab zakryćci pasolstva Rasijskaj Fiederacyi ŭ Respublicy Bałharyja».
MZS Bałharyi pieradaŭ notu kancylaryi premjera i čakaje dalejšych dziejańniaŭ.