Ad unitazaŭ da aŭtazapčastak. Jakija tavary zavoziacca ŭ Biełaruś pa šerych schiemach i kolki na hetym zarablajuć pasiaredniki
Siem dalaraŭ za paru abutku, 30 za ŭnitaz i 140 za ladoŭniu — takija hrošy hatovyja płacić ludziam, jakija pieraviazuć tavar z Polščy ŭ Biełaruś. «Naša Niva» raźbirałasia, kolki zarablajuć čaŭnaki z pryhraničnych rajonaŭ i jak ciapier pracujuć šeryja schiemy.
Čarha z polskaha boku ŭ punkcie propusku Ciarespal-Brest. Fota: telehram-kanał «Warshawka» — PP «Varšavskij most»
Bytavaja technika i nie tolki
Sa źniaćciom kavidnych abmiežavańniaŭ na piarasiačeńnie miežaŭ pačaŭ nabirać abaroty čaŭnočny biznes. Jaho raźvićciu spryjajuć jak sankcyi z boku Zachada, tak i pasłableńni z boku biełaruskich uładaŭ, bo sama dziaržava zacikaŭlena ŭ tym, kab tavary traplali ŭ krainu. Jašče ŭ krasaviku časova pavysili limity biaspošlinnaha ŭvozu tavaraŭ z 500 jeŭra i 25 kiłahramaŭ da 1000 jeŭra i 31 kiłahrama. Takoje rašeńnie patłumačyli žadańniem «padtrymać hramadzian va ŭmovach sankcyjnaha cisku i paźbiehnuć deficytu tavaraŭ pieršaj nieabchodnaści i tavaraŭ krytyčnaha impartu».
Takija samyja normy dziejničajuć i dla pasyłak.
Pieravozkaj tavaraŭ ź ES u Biełaruś (čaściej za ŭsio z Polščy) u asnoŭnym zajmajucca žychary Bresta i Hrodna.
Znajści tavar dla pieravozki nie składana — dla hetaha dastatkova adšukać admysłovyja čaty ŭ telehramie, dzie bieźlič takich abjaŭ. Karystalniki apisvajuć tavar, jaki treba pieravieźci praź miažu, i sumu ŭznaharody za vykananuju pracu. Tak, naprykład, za pieravozku noŭtbuka płaciać ad 90 da 120 dalaraŭ, a za dastaŭku ajfona — 50-70$ u zaležnaści ad koštu smartfona.
Da 150 dalaraŭ za pieravozku televizara
Tavary dla pieravozki padzialajucca na dva typy — «prachadnyja» i «nieprachadnyja». Pad prachadnymi razumiejucca rečy koštam da 1000 jeŭra i vahoj da 31 kh. Kali tavar pieravyšaje choć adzin z vyšejpieraličanych pakazčykaŭ, za jaho ŭvoz daviadziecca płacić pošlinu. Usie vydatki pa spłacie mytu biare na sabie ŭłaśnik hruzu.
Uznaharoda za dastaŭku televizara składaje 100-150 dalaraŭ u zaležnaści ad dyjahanali i cany. Za pieravoz varačnaj paneli z hrylem možna atrymać 80 dalaraŭ, za dastaŭku ladoŭni — 140. Za hulniavyja prystaŭki dajuć 40-60 dalaraŭ.
Adznačym, što biez spłatu mytu biełarusy majuć prava ŭvieźci nie bolš za adnu adzinku z pradmietaŭ bytavoj techniki. Vyklučeńnie — mabilnyja telefony, ich dazvalajuć uvozić dźvie štuki ciaham hoda.
Kali kazać ahułam, to pradmiety bytavoj techniki źjaŭlajucca adnoj z samych papularnych katehoryj tavaraŭ, jakija traplajuć na naš rynak z vykarystańniem padstaŭnych asob. Hetaja tema daloka nie novaja, bo techniku z Polščy anałahičnym čynam uvozili i raniej, ale ŭsio źmianiłasia 1 studzienia 2019 hoda, kali ŭ Biełarusi ŭ čarhovy raz pamienšyli limity biazmytnaha ŭvozu tavaraŭ. Ale, jak bačym, z pavyšeńniem normaŭ, taki vid biznesu znoŭ nabyŭ aktualnaść.
Aficyjnaja statystyka heta paćviardžaje. Pavodle apytańnia Biełstata, asnoŭnyja vidy tavaraŭ, jakija ŭvoziacca ŭ Biełaruś — televizary (u siarednim na 467 dalaraŭ ZŠA na adnaho čałavieka), kampjutarnaja technika i srodki suviazi (462 dalary), elektryčnaja bytavaja technika (319 dalaraŭ).
Niahledziačy na toje, što z momantu adkryćcia miežaŭ i pavyšeńnia limitaŭ prajšło litaralna niekalki miesiacaŭ, šeryja imparciory ŭžo paśpieli naładzić praces.
Inšaja papularnaja katehoryja tavaraŭ dla šeraha ŭvozu — adzieńnie i abutak. Častka takich tavaraŭ idzie z afarmleńniem Tax Free, častka — biez. Hetyja rečy jak praviła, pravoziacca ŭ Biełaruś praź zialony kalidor, pakolki nie padlahajuć abaviazkovamu dekłaravańniu. Za pieravozku pary abutku płaciać ad 4 da 7 dalaraŭ. Za adzinku adzieńnia ŭ siarednim płaciać ad 2 da 5 dalaraŭ, kali havorka nie idzie pra zimovyja kurtki i inšyja habarytnyja rečy.
Častku tavaraŭ, jakija nie patrabujuć afarmleńnia Tax Free, razdajuć nie tolki praz telehram, ale i bolš tradycyjnym šlacham — u admysłovych miescach pa toj bok miažy.
Treciaja davoli papularnaja katehoryja tavaraŭ — aŭtamabilnyja zapčastki. Pryčym u adroźnieńnie ad bytavoj techniki i adzieńnia zapčastki — heta chutčej trend 2022 hoda. Pakolki praz sankcyi ŭ nas pačaŭ naziracca deficyt zapčastak i raschodnikaŭ.
Daražej za ŭsio apłočvajecca pieravoz pakryšak. Za dastaŭku adnoj šyny ŭ zaležnaści ad pamieru płaciać ad 12 da 30 dalaraŭ. Taksama z Polščy pieradajuć šmat ramianioŭ HRM, kamplektaŭ sčapleńnia, matornych alejaŭ i inšych detalaŭ. Pry žadańni čaŭnok ź lohkaściu moža nabrać tolki adnych aŭtazapčastkak na 20-30 dalaraŭ.
Adnak śpis tavaraŭ, jakija ŭvoziać u Biełaruś takim čynam, nie abmiažoŭvajecca hetymi tryma katehoryjami. Siarod inšaha z Polščy masava viazuć padhuźniki, pralnyja paraški, kavu i navat syr i miasa ŭ vakuumnaj upakoŭcy. Za pieravozku kiłahrama syru čaŭnaku dajuć 3 dalary, za miasa — 4 dalary.
Biznes nie dla ŭsich
Abaznanyja patłumačyli «Našaj Nivie», što asnoŭnuju častku tavaraŭ praź miažu pieravoziać ludzi, jakija zajmajucca hetym ledź nie na prafiesijnaj asnovie, pakolki «zalotnym» takija prapanovy nie zaŭsiody cikavyja.
Reč u tym, što ŭ šerahu vypadkaŭ čałaviek musić nabyć tavar u kramie za svaje hrošy pa canie bruta (z PDV), u toj čas jak zamoŭščyk pieravozki raźličvajecca za tavar pa canie neta (biez PDV) plus apłočvaje ŭznaharodu za vykananuju rabotu. Hrošy ŭ vyhladzie PDV čaŭnok viartaje ŭ kramie, kali nastupny raz jedzie ŭ Polšču. Praz heta atrymlivajecca, što dla taho, kab zarablać na pierakidcy tavaraŭ, treba mieć abarotnyja hrošy.
Zajmacca takim biznesam niavyhadna biełarusam, u kaho jość VNŽ ci hramadzianstva adnoj z krain ES. Bo jany, pakolki źjaŭlajucca rezidentami ES, nie majuć prava afarmlać Tax Free.
Kudy dalej idzie ŭvieś hety tavar?
Rečy, jakija traplajuć u Biełaruś u abychod sankcyj i mytnych pošlin, paźniej pastupajuć u prodaž. Pradajuć ich u roźnicu i optam. Šmat takoha tavaru na aptovym rynku ŭ Hrodnie, kudy pa jaho pryjazdžajuć drobnyja handlary z usich kutkoŭ krainy, u tym liku ź Minska.
Techniku, uviezienuju z vykarystańniem šerych schiem, pradajuć u internet-kramach. Popyt na niekatoryja vidy tavaraŭ nazirajecca i z boku drobnych rasijskich pradprymalnikaŭ.
Usie hetyja schiemy tak ci inakš pracavali raniej, ale z raźvićciom lehalnaha biznesu ŭ krainie i paralelnym panižeńniem limitaŭ na ŭvoz taki sposab impartu tavaraŭ apošnimi hadami pierastaŭ mieć vialikuju papularnaść. Ciapier ža ŭ niejkim sensie kraina viartajecca da taho, što było raspaŭsiudžana ŭ 90-ja i nulavyja hady.
Čarha z polskaha boku ŭ punkcie propusku Babroŭniki-Bierastavica. Fota: telehram-kanał PP «Bieriestovica-Bobrovniki»
Ludzi z šerahu čaŭnakoŭ zarablajuć niemałyja pa biełaruskich mierkach hrošy na pryhraničnym biznesie. Pa ich słovach, navat tyja, chto jeździć u Polšču nie čaściej, čym raz na tydzień, za miesiac (4 pajezdki) moža zarabić kala 400-500$ biez dadatkovych ryzyk u vyhladzie pieravyšeńnia limitaŭ na ŭvoz cyharet i ałkaholu. U vypadkach, kali havorka idzie nie pra «padpracoŭku» na miažy, a pra asnoŭny zaniatak, miesiačny zarobak čaŭnaka pierakročvaje adznaku ŭ 1000 dalaraŭ.
Kab zarabić na miažy, nie abaviazkova mieć asabisty aŭtamabil, hałoŭnaje — mieć dziejnuju vizu. U čatach chapaje ludziej, jakija šukajuć pasažyraŭ, jakija nie byli za miažoj bolš za 7 dzion i majuć prava pravozić tavaraŭ na 1000 jeŭra vahoj da 31 kh. Takim pasažyram płaciać pa 70 dalaraŭ. Takaja pajezdka zajmaje šmat času, pakolki čerhi na miežach zastajucca vialikimi. Čaŭnaki kažuć, što na kruh moža syści ad 15 da 27 hadzin.
«Naša Niva» — bastyjon biełaruščyny
PADTRYMAĆČytajcie taksama:
Hramadzianam Polščy z 1 lipienia dazvolili biaźvizavy ŭjezd u Biełaruś
Limit dla pasyłak u 22 jeŭra admianiajecca
