U domie dla partyjnaj elity ŭ centry Minska pradajuć kvateru Prytyckaha. Jak tam usiaredzinie i što pa košcie?
U «domie šaści premjeraŭ» kala płoščy Pieramohi na prodaž vystavili kvateru za 890 tysiač dołaraŭ. U joj mebla i technika premijalnych brendaŭ, a taksama skulptura z kałonami. A jašče niekali ŭ joj žyŭ Siarhiej Prytycki, piša realt.by. Voś jak jana vyhladaje znutry.
Piacipaviarchovy cahlany dom 1967 hoda pabudovy znachodzicca na zavułku Braniavym, 4. U im žyli šeść byłych staršyniaŭ Savieta ministraŭ BSSR: Mikałaj Aŭchimovič, Cichan Kisialoŭ, Alaksandr Aksionaŭ, Uładzimir Brovikaŭ, Michaił Kavaloŭ i Viačasłaŭ Kiebič. Žyli tut i inšyja partyjnyja bosy BSSR.
Vystaŭlenaja na prodaž kvatera znachodzicca na druhim paviersie i maje płošču 160 kvadratnych mietraŭ, ź ich 93 mietry — žyłaja. Jana niekali naležała staršyni Prezidyuma Viarchoŭnaha Savieta BSSR Siarhieju Prytyckamu, u honar jakoha nazvanaja vulica ŭ Minsku i nie tolki.
Kruhłasutačnaja achova i videanazirańnie jość jak vakoł doma, tak i na terytoryi dvara.
«Vielmi cichi i spakojny dvor, zaŭsiody jość miesca dla parkoŭki», — havorycca ŭ paviedamleńni.
U padjeździe ŭsiaho 8 kvater.
U kvatery, što pradajuć, — novy dyzajnierski ramont. U azdableńni «vykarystanyja samyja darahija materyjały, takija jak naturalny marmur, oniks, parkiet».
Vitalnia zajmaje 35 kvadratnych mietraŭ. U joj raźmieščanyja šafa-kupe i skulptura z kałonami.
Haścioŭnia zajmaje 33 kvadratnyja mietry. Tut jość jak zona adpačynku, tak i pracoŭnaja prastora.
Usia mebla ŭ vitalni — italjanskaja Carpanelli z 19 vidami dreva, uzorami i emallu z žemčuhu.
Spalnia zajmaje 27 kvadratnych mietraŭ. Tam jość harderobnaja, uvachod u asabisty vanny pakoj i na łodžyju.
Usia mebla spalni — italjanskaj fabryki Cappellini z pazałotaj.
Kuchnia — 21 kvadratny mietr. Harnitur — italjanskaj fabryki MEGAROS. Materyjał kuchni — masiŭ višni, uklučajučy ŭnutranyja palicy. Azdableńnie vykanana pazałotaj.
Usia kuchnia abstalavanaja niamieckaj bytavoj technikaj AEG.
Dziciačy pakoj zajmaje 17 kvadratnych mietraŭ. Interjer u im užo praściej.
U kvatery dva sanvuzły. Jość bałkon i łodžyja.
Za kvateru prosiać 890 tysiač dalaraŭ (5549 za mietr). Mahčymy handal.
