Pa «spravie BiełaPAN» znoŭ adnaviłasia śledstva, sudovy praces prypynieny jak minimum na dva miesiacy
Jak paviedamlaje telehram-kanał «Pozirk», adnosna kaho adnavilisia pracesualnaja dziejańni, pakul nie viadoma.
Pa «spravie BiełaPAN» u zakrytym režymie sudziać Irynu Leŭšynu, Andreja Alaksandrava, Dźmitryja Navažyłava i Irynu Złobinu.
Hałoŭnuju redaktarku i dyrektarku BiełaPAN Irynu Leŭšynu i jaje papiarednika na pasadzie dyrektara Dźmitryja Navažyłava zatrymali 18 žniŭnia 2021 hoda, a Andreja Alaksandrava, jaki zajmaŭ pasadu namieśnika dyrektara BiełaPAN u 2014—2018 hadach, i jaho dziaŭčynu Irynu Złobinu zatrymali 12 studzienia 2021 hoda.
Im dahetul byli vystaŭlenyja abvinavačvańni pa nastupnych artykułach:
— Andreja Alaksandrava i Irynu Złobinu abvinavačvajuć pavodle č. 2 art. 342 KK u padrychtoŭcy «nie mienš za 260 asob dla ŭdziełu ŭ hrupavych dziejańniach, jakija hruba parušajuć hramadski paradak» z 14 žniŭnia 2020 hoda da 12 studzienia 2021 hoda. Tak traktujecca apłata administracyjnych štrafaŭ, rachunkaŭ za pasłuhi advakataŭ, apłata charčavańnia za čas znachodžańnia ludziej «na sutkach»;
— ich taksama abvinavačvajuć pa č. 1 art. 356 KK u dapamozie ByHelp i jaje pradstaŭnikam u dziejnaści, «nakiravanaj na pryčynieńnie škody nacyjanalnaj biaśpiecy Respubliki Biełaruś»;
Andreja Alaksandrava, Dźmitryja Navažyłava i Irynu Leŭšynu abvinavačvajuć u stvareńni ekstremisckaha farmavańnia ź liku rabotnikaŭ ZAT «BiełaPAN» i inšych asob, a taksama kiravańnie takim farmavańniem pavodle č. 1 art. 361-1 KK. Infarmacyjnaja kampanija BiełaPAN była pryznanaja ekstremisckim farmavańniem 12 listapada 2021 hoda.
Andreja Alaksandrava i Dźmitryja Navažyłava — va ŭchileńni ad vypłaty infarmacyjnym ahienctvam padatkaŭ pavodle č. 2 art. 243 KK RB. Škoda acienienaja ŭ 450 tysiač rubloŭ.
