SBU raskryła rasijskuju ahienturnuju sietku z udziełam deputata Viarchoŭnaj Rady
Słužba biaśpieki Ukrainy zajaviła ab raskryćci ahienturnaj sietki Hienštaba Rasii, u jakuju ŭvachodziŭ deputat Viarchoŭnaj Rady Andrej Dziarkač. Jana pavinna była stvaryć šerah pryvatnych achoŭnych pradpryjemstvaŭ, jakija płanavali vykarystoŭvać pry zachopie Ukrainy.
Andrej Dziarkač. Fota: «Vikipiedyja»
Pa śćviardžeńni SBU, raspracoŭka sietki viałasia daŭno, adnak niejtralizavali jaje na pačatku vajny, kali byŭ zatrymany pamočnik deputata Ihar Kaleśnikaŭ, jaki źjaŭlaŭsia suviaznym i finansavym kurjeram. Jon pakazaŭ, što Dzierkača zavierbavali jašče ŭ 2016 hodzie. Ź im pracavała asabista kiraŭnictva HRU.
Na stvareńnie pryvatnych achoŭnych pradpryjemstvaŭ rasijski bok vydzialaŭ bujnyja sumy, pa 3-4 młn dalaraŭ. Pavodle zadumy, hetyja pradpryjemstvy pavinny byli zabiaśpiečvać prachodžańnie rasijskaj techniki i padtrymku vojskaŭ padčas zachopu haradoŭ.
Kaleśnikaŭ taksama raskazaŭ, što pry zachopie Kijeva płanavałasia vykarystoŭvać dźvie bryhady śpiecnaza i siły śpiecapieracyj, jakija pavinny byli zajści z boku Biełarusi, chutka prasunucca da Kijeva, zachapić uradavy kvartał i sabrać «Narodnaje vieča» ŭ Viarchoŭnaj radzie, jakoje b prahałasavała za stvareńnie novaha ŭrada.
Na realizacyju svaich płanaŭ Rasija vydzialała pa 3-4 młn dalaraŭ raz na niekalki miesiacaŭ. Značnaja častka srodkaŭ, jak śćviardžajecca, asieła ŭ asabistych kišeniach Dzierkača.
54-hadovy Andrej Dziarkač niaźmienna zasiadaje ŭ Viarchoŭnaj Radzie ŭžo amal čverć stahodździa, z 1998 hoda. Jon pradstaŭlaŭ u parłamiencie Sacyjalistyčnuju partyju Ukrainy, Partyju rehijonaŭ. U 2014 hodzie hałasavaŭ za «dyktatarskija» zakony Viktara Janukoviča. Na apošnich vybarach u 2019 hodzie abrany ŭ Radu pa adnamandatnaj akruzie ŭ Sumskaj vobłaści.
U 2019 hodzie Dziarkač prasłaviŭsia tym, što vystaviŭ abvinavačvańni na adras ciapierašniaha prezidenta ZŠA Džo Bajdena, jaki, ź jahonych słoŭ, atrymlivaŭ niezakonnyja dachody ad łabisckaj dziejnaści na karyść firmy Burisma, jakaja pracavała va Ukrainie. Hodam paźniej Dziarkač zajaŭlaŭ, što vałodaje kampramietujučymi aŭdyjazapisami pieramovaŭ eks-prezidenta Ukrainy Piatra Parašenki z prezidentam RF Uładzimiram Pucinym.
U vieraśni 2021 hoda Ministerstva finansaŭ ZŠA ŭviało suprać Dziarkača sankcyi z-za, jak śćviardžałasia, sprobaŭ paŭpłyvać na zychod amierykanskich prezidenckich vybaraŭ 2020 hoda. U amierykanskich dakumientach Dziarkač nazvany šmathadovym ahientam rasijskich śpiecsłužbaŭ.
Baćka Andreja Dzierkača, Leanid Dziarkač, byŭ kiraŭnikom SBU ŭ 1998—2001 hadach, padčas prezidenctva Leanida Kučmy, jaki adznačyŭsia mnohimi kryminalna-palityčnymi skandałami. A dačka Dzierkača, žurnalistka Taćciana Cierachava — žonka syna byłoha śpikiera ŭkrainskaha parłamienta Uładzimira Litvina.
