Pałata pradstaŭnikoŭ u druhim čytańni pryniała zakon ab zavočnym śledstvie i sudach
Pałata pradstaŭnikoŭ u druhim čytańni zaćvierdziła prajekt zakona ab źmienie Kryminalna-pracesualnaha kodeksa. Jon praduhledžvaje źjaŭleńnie ŭ Biełarusi zavočnaha kryminalnaha pieraśledu i suda pa takich spravach, piša Reform.by.
Fota: BiełTA
«Zakonaprajektam u Nacyjanalny kryminalny praces uvodzicca instytut «śpiecyjalnaj vytvorčaści» šlacham ustanaŭleńnia va KPK paradku dasudovaj vytvorčaści i sudovaha razhladu kryminalnych spraŭ u dačynieńni da abvinavačanaha, jaki znachodzicca pa-za miežami Respubliki Biełaruś, ab złačynstvach suprać miru i biaśpieki čałaviectva, suprać dziaržavy, a taksama šerahu inšych złačynstvaŭ, ździajśnieńnie jakich ciahnie pahrozu nacyjanalnaj biaśpiecy», — paviedamiła pres-słužba Pałaty pradstaŭnikoŭ.
Raniej paviedamlałasia, što hetaja śpiecyjalnaja vytvorčaść mahčymaja, kali abvinavačany ŭchilajecca ad jaŭki ŭ orhan, jaki viadzie rasśledavańnie, a ŭ jaho vydačy admoŭlena, albo na praciahu šaści miesiacaŭ nie atrymany adkaz na zapyt ab vydačy. Pastanovu ab pačatku vytvorčaści zmohuć vydavać hienprakuror, albo staršyni SK ci KDB sa zhody hienprakurora.
Taksama prajektam źmianieńniaŭ u KPK praduhledžanyja źmieny ŭ śfiery vytvorčaści pa pierahladzie prysudaŭ, vynačeńniaŭ, pastanoŭ, jakija nie ŭstupili ŭ zakonnuju siłu (apielacyjnaja vytvorčaść) i vytvorčaści pa pierahladzie prysudaŭ, aznačeńniaŭ, pastanoŭ (nahladnuju vytvorčaść), jakija ŭstupili ŭ zakonnuju siłu.
Ciapier zakonaprajekt pavinny ŭchvalić u Saviecie Respubliki, a dalej jaho pieradaduć na podpis Alaksandru Łukašenku.
Nahadajem, namieśnik staršyni SK Anatol Vasiljeŭ tłumačyŭ, što zavočnyja sudy dazvolać pryciahnuć da adkaznaści biełarusaŭ, jakija «viaduć destruktyŭnuju dziejnaść z-za miažy». Upieršyniu ab zavočnym pryciahnieńni da kryminalnaj adkaznaści zahavaryli vosieńniu 2021 hoda. Pry zavočnych sudach nad biełarusami, jakija vyjechali z krainy, prapanoŭvałasia kanfiskoŭvać u dachod dziaržavy ich majomaść, što zastałasia ŭ Biełarusi. Ci transfarmavalisia zajavy ab kanfiskacyi ŭ normy zakonaprajekta, nieviadoma. Hienprakuratura ŭ ramkach rasśledavańnia spravy ab hienacydzie taksama vykazvała žadańnie padvierhnuć zavočnamu sudu asob, jakich jana ličyć adkaznymi za akty hienacydu padčas VAV.
