Trahiedyja ŭ Asipovičach: maci dvuch dziaciej paviesiłasia paśla zatrymańnia dyrektara chlebazavoda
Asipovičy abmiarkoŭvajuć ćmianuju historyju suicydu namieśnicy dyrektara miascovaha chlebazavoda Natalli P., jakaja, majučy siamju, dvaich dziaciej i ŭłasny dom, zasiliłasia ŭ noč pierad svaim pryznačeńniem na miesca aryštavanaha dyrektara. Mnohija ličać, što na niabožcycu akazvaŭsia cisk i ciapier na jaje paviesiać čužyja hrachi.
My nie viedajem usich detalaŭ hetaj historyi, bo tyja ludzi, jakija dakładna ŭ kursie zdareńnia, aścierahajucca za svajo žyćcio i paźbiahajuć adkazaŭ na pytańni.
Ale my viedajem partrety dvuch asnoŭnych hierojaŭ trahiedyi.
Zahinułaj Natalli P. było 44 hady. Bolšuju pałovu žyćcia — 25 hod — jana adpracavała na Asipovickim chlebazavodzie, dajšoŭšy z samych nizoŭ da namieśnika dyrektara pa kamiercyjnych pytańniach.
Natalla na fonie budynka lubimaj pracy
U jaje byli svoj dom, muž, mašyna, dźvie niepaŭnaletnija dački, starejšaja — 2004 hoda naradžeńnia.
«Śviaty čałaviek, jaki ŭsiaho bajaŭsia i ni razu nie vynies z pradpryjemstva torta», — apisvajuć jaje kalehi.
Kali na zavod pryjšła pravierka z ABEZ (adździaleńnia pa baraćbie z ekanamičnymi złačynstvami) i vyvieła dyrektara — Alaksandra Kraŭčanku — u kajdankach, Natalla P. razhladałasia jak asnoŭny pierajemnik papiarednika.
«Za dzień da suicydu jaje vyklikali ŭ rajvykankam i pradstavili da pasady, uručyli hramatu, jana pahadziłasia, — kaža jaje kaleha. — A ranicaj jaje znajšli niežyvoj».
Što zdaryłasia? Tut treba raskryć asobu inšaha fihuranta historyi: Alaksandra Kraŭčanki.
U jaho bijahrafii jość kryminalnyja pavaroty, jakija, na dziva, nie tolki nie skančalisia sudom, ale i nie stanavilisia pieraškodaj dla praciahu pracy ŭ dziaržsiektary na kiraŭničych pasadach, źviazanych z hrašyma.
Tak, z tym ža chlebam — budučy dyrektaram asipovickaha «Chlebapradukthandlu» (paralelna — deputatam Asipovickaha rajonnaha savieta deputataŭ) Kraŭčanka zajmaŭsia tym, što amal uvieś 2010 hod fiktyŭna adpuskaŭ pradukcyju ŭ adras fiermierskaj haspadarki «Haspadar», jakoj kiravaŭ jahony baćka, pa fakcie ž zbyvaŭ usio pryvatnikam za najaŭnyja, a hrošy traciŭ na ŭłasnyja patreby.
I tak — jak vynikaje z materyjałaŭ kryminalnaj spravy — nakraŭ na 1 miljard i 290 miljonaŭ tahačasnych rubloŭ ($426 tysiač).
Ci sieŭ jon za heta? Nie. My nie viedajem čamu, taksama nie viadoma, ci byŭ u vyniku sud. Žychary rajona schilnyja bačyć razhadku ŭ šyrokich plačach čyrvonaha dyrektara.
Baćka Kraŭčanki ŭ 2004-m byŭ sudzimy za machinacyi ŭ tym ža «Haspadary», a dla Alaksandra hetaja kampanija stała pryčałam na časy žyćciovych niaŭdač — u roznyja hady jon pracavaŭ tam jak minimum trojčy.
Alaksandr zarabiŭ na dom u Asipovičach na 247 «kvadrataŭ», kvateru na 72 mietry i ŭčastak pad budaŭnictva doma tam ža. Ułaśnikam jašče adnaho niedabudavanaha doma ŭ Asipovičach jon staŭ zhodna z damovaj dareńnia ŭ 2020-m.
Imavierna, usio dobra składvajecca dla jaho i na hety raz: pa infarmacyi našych surazmoŭcaŭ, napačatku maja Kraŭčanku vypuścili ź SIZA. Pry čym tut śmierć jahonaj namieśnicy, Natalli P.?
«Paśla zaviadzieńnia kryminalnaj spravy jana taksama chadziła na dopyty, ale na jaje samu ničoha nie było — inačaj by jaje nie tolki nie pradstavili da pasady dyrektara, ale i zatrymali b razam ź im.
Što adbyvałasia, dalej nichto, aproč samych blizkich, nie viedaje.
Čutki takija, što były dyrektar pačaŭ pierakidać usich sabak na jaje, u spravie «apracoŭki» adznačyŭsia i advakat zatrymanaha (my nie viedajem jaho imia. — «NN»), rola śledčych orhanaŭ nieviadomaja. U vyniku, paśla pieryjadu padaŭlenaści, jana nibyta zajaviła mužu, što joj «treba cicha syści». Jon padumaŭ, što heta pra zvalnieńnie, a ranicaj znajšoŭ jaje niežyvoj. Heta adbyłosia ŭ krasaviku», — paviedamili nam kalehi.
Pa ich infarmacyi, raniej zatrymany Kraŭčanka ŭžo na voli. Paćvierdzić heta ź inšych krynic ciažka — dačka Kraŭčanki ŭvohule abviarhaje, što jon zatrymlivaŭsia, i havaryć pra los baćki nie choča.
Numary samoha Kraŭčanki niedastupnyja.
