Biełaruskija kłubnicy ŭžo pa 8 rubloŭ. Što pačym na Kamaroŭskim rynku ŭ červieni
Leta na siezonnym rynku — z bahaćciem duchmianych jahad i pastupovym źnižeńniem koštaŭ na ich — užo ŭ samym razhary. Biełaruskija ciapličnyja kłubnicy na pačatku červienia možna adšukać pa canie ad 8 rubloŭ za kiłahram. Z hetaha tydnia na rynku źjaviłasia i hruntavaja jahada z Bresta — 10 rubloŭ za kiło. Ale pradaŭcy zapeŭnivajuć: praz dva tydni kupić možna budzie ŭ razy tańniej, pišuć «Minsk-Naviny».
Na hrečaskija kłubnicy ceny pakul trymajuć. Kiło ŭ siarednim kaštuje tyja ž 10 rubloŭ.
A voś ceny na čarešniu pastupova imknucca ŭniz. Śpiełyja, bliskučyja jahady kaštujuć ad 12 rubloŭ za 1 kh.
Vinahrad kišmiš realna adšukać pa 5 rubloŭ, mandaryny z apielsinami — pa 6, ślivy ‒ u rajonie 10. Manha pradajuć paštučna — za 3,5 rubla. Stolki ž daviadziecca addać za jabłyki, ale, viadoma, za ceły kiłahram.
Ź niesiezonnaha na rynku pradajuć iranskija kavuny. Cana na ŭsich pryłaŭkach, jakija ŭdałosia abyści, adnolkavaja — 5 rubloŭ za kiło.
Kali siarod jahad asablivuju ŭvahu ŭ pakupnikoŭ pryciahvajuć kłubnicy z čarešniaj, to na aharodninnych pryłaŭkach bolš aktyŭna raźbirajuć ahurki i pamidory. Pieršyja prykmietna ŭpali ŭ canie — nabyć biełaruskija kalučyja ahuročki ŭžo možna pa canie ad 1,5 rubla za kiłahram. Jość i daražejšyja varyjanty — za 1,8-2 rubli.
Pamidory rodam ź Biełarusi abyducca nie tak biudžetna. U siarednim za kiło našych tamataŭ prapanujuć zapłacić ad 5 rubloŭ. U stolki ž abyducca i marakanskija čery. A voś za ŭźbiekskija pamidory prosiać udvaja bolš.
Śviežaja kapusta ciapier pradajecca pa 2,5 rubla, bakłažany addajuć za 7, sałodkija piercy — kala 5.
Cana na maładuju bulbu ŭ bolšaści pradaŭcoŭ startuje ad 3 rubloŭ. Buraki možna nabyć pa 5 rubloŭ, morkvu i maładuju cybulu — pa 3. Pučki ščaŭja i kropu pa 100 hramaŭ stojać pa rubli, kinzy — pa 2,5, baziliku — pa 4.
