Ukrainie zdradziŭ adzin z deputataŭ Viarchoŭnaj Rady z frakcyi «Słuha naroda»
Narodny deputat Ukrainy Alaksiej Kavaloŭ z frakcyi «Słuha naroda» vyjechaŭ na akupavanuju rasijanami Chiersonščynu, adkul paviedamiŭ, što supracoŭničaje z akupantami i padtrymlivaje mahčymuju anieksiju rehijona Rasijaj.
Alaksiej Kavaloŭ. Fota: Fejsbuk
«Rasija tut nazaŭždy, ščylnaja intehracyja ŭžo adbyvajecca. Dumaju, što skažu nie tolki pra siabie, ale i inšych udzielnikaŭ sustrečy [z kramloŭskim emisaram Siarhiejem Kiryjenkam] — ludzi vyjšli z uśviedamleńniem, što Rasija nas čuje i razumieje», — napisaŭ Kavaloŭ u Facebook.
Jon taksama raskazaŭ, što akupacyjnaja administracyja razdała ŭkazańni ŭkrainskim fiermieram, što i jak im vyroščvać i kudy vyvozić ichniaje zbožža dla zbytu.
Dziaržaŭnaje biuro rasśledavańniaŭ Ukrainy zaviała ŭ dačynieńni da Alaksieja Kavalova kryminalnuju spravu za kałabaracyjanizm. A ŭ partyi «Słuha naroda» zajavili, što «takija pavodziny niesumiaščalnyja sa zvańniem narodnaha deputata i tym bolš — siabroŭstvam u frakcyi «Słuha naroda».
«Apošnija zajavy Kavalova, zroblenyja ŭ sacsietkach paśla «narady» ŭ Chiersonie z namieśnikam kiraŭnika kramloŭskaj administracyi Kiryjenkam, pierakanaŭča śviedčać pra toje, što naš były kaleha staŭ kałabaracyjanistam ahresara. Jon zdaŭ ukrainski narod, zdaŭ svaich vybarščykaŭ, zdaŭ Ukrainu», — adznačyła pres-sakratar «Słuhi naroda» Julija Palijčuk.
Alaksiej Kavaloŭ byŭ abrany deputatam na vybarach 2019 hoda ŭ adnamandatnaj akruzie na poŭdni Chiersonščyny.
