Staršakłaśnikam pavialičać kolkaść hadzin biełaruskaj i ruskaj moŭ i pamienšać zamiežnaj
Ministerstva adukacyi ŭžo zaćvierdziła novyja navučalnyja płany, paviedamiŭ ministr adukacyi Andrej Ivaniec ŭ efiry telekanała ANT.
U pryvatnaści, u 10—11-ch kłasach dadasca kolkaść hadzin biełaruskaj i ruskaj moŭ. «Adnoj hadziny ŭ tydzień niedastatkova. Z nastupnaha hoda dadasca jašče kolkaść hadzin ruskaj i biełaruskaj litaratury, bo avałodać movaj biez čytańnia litaratury składana i praktyčna niemahčyma», — ličyć ministr.
Adnačasova pamienšycca kolkaść hadzin na vyvučeńnie zamiežnaj movy. «Kali my pavialičvajem u navučalnym płanie niejkija zaniatki, to dzieści my pavinny zabrać ich. Siońnia my bačym, što zamiežnaja mova znachodzicca ŭ piramidzie značna vyšej za inšyja pradmiety. Tamu kolkaść hadzin anhlijskaj movy trochi pamienšycca», — raskazaŭ Andrej Ivaniec.
Jon adznačyŭ, što anhlijskaj movy ŭ 10—11-ch kłasaŭ usio roŭna budzie bolš na bazavym uzroŭni, čym ruskaj i biełaruskaj: «Ja ŭpeŭnieny, lubuju zamiežnuju movu čałaviek, niachaj heta budzie školnik, student, darosły, vyvučyć ciaham svajho žyćcia, kali jamu heta budzie nieabchodna. A kali ŭ škole nie navučym ruskaj i biełaruskaj movie, to hetamu nichto nie navučyć».