Hrybaŭskajcie pra telefanavańni Pucinu: Heta zvanki terarystu
Eks-prezident Litvy Dala Hrybaŭskajcie žorstka acaniła zvanki niekatorych lidaraŭ zachodnich krain prezidentu Rasii Uładzimiru Pucinu, nazvaŭšy ich zvankami terarystu, piša Delfi.lt.
Fota: Delfi
«Ja, napeŭna, prosta skažu, pakolki ciapier mahu kazać prosta i adkryta, pakolki nie zajmaju nijakuju pasadu, ja kažu prosta: zvanki terarystu, zabojcy i ahresaru, jany i pavinny aceńvacca jak zvanki terarystu», — skazała Hrybaŭskajcie ŭ intervju LRT.
Eks-kiraŭnica krainy paŭtaryła i vykazanuju raniej dumku ab tym, što Pucina možna spynić tolki na poli bitvy.
«Kali idzie vajna, pieramovy nie viaducca, idzie vajna. Ja z samaha pačatku vajny kazała, što Pucina možna spynić tolki na poli bitvy. A heta značyć, naŭprost udzielničać u hetym, ci jak my nazyvajem foot on the ground (sałdatami na terytoryi Ukrainy, — Delfi) abo šlacham pradastaŭleńnia adekvatnaj, nieabchodnaj, sučasnaj zbroi. Pakul vybrali druhi šlach, ale jon prachodzić sa spaźnieńniami, pastaŭlajuć niedastatkova sučasnuju zbroju, nastupstvy hetaha my bačym. My bačym, što Rasija pavolna, ale prabivajecca va ŭschodniaj častcy napierad, u abodvuch kirunkach, a ŭ tym liku i ŭkraincy niasuć vializnyja straty — jak ludziej, tak i techniki», — skazała Hrybaŭskajcie.
Jana raniej užo nazyvała Rasiju terarystyčnaj dziaržavaj. «My znachodzimsia pobač ź Biełaruśsiu, z Rasijaj, tamu ŭsio adčuvajem adrazu, chutka i realistyčniej, čym dalokija susiedzi, našy partniory na Zachadzie. Tamu paŭtarajecca situacyja — kali ty dalej, ciabie heta nie tyčycca», — skazała jana.
«Kali bačyš charaktar ahresii, uźnikaje paralel z 1939 hodam, pierad Druhoj suśvietnaj vajnoj, kali jeŭrapiejskija krainy, vialikaja ich častka, staralisia paturać ahresaru, nie bačyć toje, što adbyvajecca, addać ahresaru častku Čechasłavakii. My bačym i čujem toj ža lejtmatyŭ u Jeŭropie. Na žal, Jeŭropa nie navučyłasia na svaich ža pamyłkach. My bačym, što tyja ž pamyłki rastuć jak hryby paśla daždžu. I treba nahadvać historyju, naš vopyt», — zaznačyła Hrybaŭskajcie.
«Sankcyi ŭ pryncypie jak demanstracyja palityčnaha pakarańnia, heta sprabujuć rabić zachodnija krainy i my. Na žal, na Rasiju adnymi ekanamičnymi sankcyjami nie padziejničaješ, jana sama moža pieranieści vielmi surjoznyja ekanamičnyja sankcyi, i jaje žychary taksama», — praciahnuła eks-prezident Litvy.
Jana ličyć, što sankcyi nie daduć chutkaha efiektu.
«Pahatoŭ, što sankcyi «dziravyja», ich uvodziać nie adrazu i jašče z takimi brydkimi publičnymi sprečkami. Časam stvarajecca takaja karcina, što heta nanosić bolš škody, čym prynosić karyści našaj reputacyi, reputacyi Zachadu», — skazała Hrybaŭskajcie.
«Sankcyi buduć dziejničać u siarednieterminovaj i doŭhaterminovaj pierśpiektyvie, na chutki efiekt my nie možam raźličvać», — praciahnuła jana.
Hrybaŭskajcie krytykuje zachodnich lidaraŭ i za toje, što jany tak marudziać z akazańniem dapamohi Ukrainie zbrojaj. «Na žal, ciapier, asabliva ŭ Jeŭropie, daminuje azirańnie cierieaz plačo, bojaź svajho cieniu. Heta nastrojvaje na niepryjemny ład. Vidać, jak lidary sprabujuć niešta pramaŭlać, rastłumačyć, tolki tamu, što prymajucca śmiełyja rašeńni ŭ dapamohu susiedu. Tamu što Ukraina zmahajecca nie tolki za siabie, a za biaśpieku ŭsioj Jeŭropy. I heta pramy abaviazak jeŭrapiejskich lidaraŭ. Na žal, my bačym bajaźlivaść», — zaŭvažyła jana.
«Takija sastupki, bojaź pryniaćcia rašeńniaŭ kaštujuć kryvi, vialikich čałaviečych strat va Ukrainie, kaštujuć vialikaj škody našaj reputacyi, reputacyi Zachadu. Hetym karystajecca Pucin. Jon bačyć prajavu bajaźlivaści, bačyć adsutnaść supracivu. I praciahvaje rabić što choča. My heta bačyli i paśla akupacyi Kryma, i paśla akupacyi častki Hruzii ŭ 2008 hodzie. My, Zachad, svaim takim stracham i vyhadavali pucinskuju ahresiju», — ličyć eks-prezidentka.
