Napiaredadni 100 dzion z pačatku «śpiecapieracyi» Kreml zabaraniŭ dziaržaŭnym ŚMI «akcentavać uvahu» na praciahłaści vajny
Krynicy «Mieduzy» śćviardžajuć, što napiaredadni kruhłaj daty Kreml «paprasiŭ» supracoŭnikaŭ dziaržaŭnych ŚMI «nie akcentavać» uvahu na praciahłaści rasijskaha ŭvarvańnia. Zroblena heta, kab rasijanie mienš zadumvalisia ab tym, što za try miesiacy rasijskija vojski nie zmahli damahčysia nadta značnaha prasoŭvańnia.
Dzień Pieramohi ŭ Maskvie 9 maja 2022 hoda. Fota: Anton Karlinier / SIPA / Scanpix / LETA
Administracyja prezidenta Rasii «paprasiła» redakcyi dziaržaŭnych i praŭładnych ŚMI «nie tyražavać temu 100 dzion śpiecyjalnaj vajennaj apieracyi» i «nie akcentavać» uvahu čytačoŭ i hledačoŭ na praciahłaści vajny.
Takija patrabavańni pastupili ŭ redakcyi napiaredadni 3 červienia — sotaha dnia ŭvarvańnia. Pra heta «Mieduzie» raskazali adrazu čatyry krynicy: u adnoj ź dziaržaŭnych miedyja, u meryi Maskvy, u adnym z praŭładnych vydańniaŭ, a taksama ŭ samoj Administracyi prezidenta (AP).
U anłajn-tranślacyjach, pryśviečanych «śpiecapieracyi», u praŭładnych tabłoidach «Komsomolskaja pravda» i «Moskovskij komsomolec» sapraŭdy pakazanaja tolki biahučaja data.
U anłajnie dziaržaŭnaha infarmahienctva TASS praciahłaść uvarvańnia taksama nie paznačanaja.
Nie havorycca ab im i ŭ vypuskach navinaŭ na Pieršym kanale i kanale «Rasija 1», a taksama na hałoŭnych staronkach RIA Novosti i ruskamoŭnaj viersii Russia Today.
«Akcentavańnie ŭvahi na datach, źviazanych z vajnoj, moža prymusić rasijan zadumacca ab metach i paśpiachovaści ŭvarvańnia», — skazaŭ «Mieduzie» surazmoŭca ŭ Administracyi prezidenta.
Akramia taho, u Kramli «nie chočuć nahadvać», što ŭvarvańnie praciahvajecca ŭžo bolš za try miesiacy. Blizki da AP surazmoŭca «Mieduzy», spasyłajučysia na vyniki zakrytych sacyjałahičnych apytańniaŭ, padkreśliŭ, što mnohija rasijanie i tak upeŭnienyja: «śpiecapieracyja» zaciahnułasia.
Pres-sakratar prezidenta RF Dźmitryj Piaskoŭ u kamientary «Mieduzie» nie pahadziŭsia ź mierkavańniem ab tym, što «śpiecapieracyja» zaciahnułasia: «U padobnych apieracyj nie moža być dakładna vyznačanaha tajminhu».
Na pytańnie ab tym, ci byli z Kramla niejkija ŭkazańni adnosna aśviatleńnia ŭ ŚMI praciahłaści vajny, Piaskoŭ nie adkazaŭ.
