ŚMI: Vienhryja pahražaje zabłakavać sankcyjny pakiet, kali sa śpisa nie vyklučać patryjarcha Kiryła
Na pasiadžeńni pastajannych pradstaŭnikoŭ krain ES u Brusieli Vienhryja vykazała niekalki piarečańniaŭ adnosna šostaha sankcyjnaha pakieta, uzhodnienaha napiaredadni Jeŭrapiejskaj Radaj. Pra heta piša ahienctva Bloomberg sa spasyłkaj na krynicy, znajomyja z chodam pieramovaŭ.
U pryvatnaści, Budapiešt nastojvaje na vyklučeńni z sankcyjnaha pieraliku kiraŭnika patryjarcha Maskoŭskaha i ŭsiaje Rusi Kiryła. Raniej padčas pieramovaŭ lidaraŭ ES imia patryjarcha nie hučała.
Akramia taho, Vienhryja taksama zajaviła pra «drobnyja techničnyja pytańni», źviazanyja z uviadzieńniem častkovaha embarha na rasijskuju naftu.
U vyniku, jak kanstatujuć surazmoŭcy Bloomberg, čas zaćviardžeńnia šostaha sankcyjnaha pakieta JEZ zastajecca niezrazumiełym. Raniej prezident Jeŭrapiejskaj rady Šarl Mišel zajaviŭ, što praces uchvaleńnia šostaha sankcyjnaha pakieta suprać Rasii zavieršycca ŭ sieradu abo čaćvier.
Jašče raniej premjer-ministr Vienhryi Viktar Orban papiaredžvaŭ, što Vienhryja nie padtrymaje ŭklučeńnie ŭ sankcyjny śpis duchoŭnych asob, bo heta «zakranie pytańnie relihijnaj svabody vienhierskich supołak, jakaja źjaŭlajecca śviaščennaj i niedatykalnaj».
Kolkaść pravasłaŭnych viernikaŭ u Vienhryi składaje ŭ lepšym vypadku 10—15 tysiač čałaviek, heta niedzie kala 0,15% nasielnictva.
