Brytancy chočuć admovicca ad mietryčnaj sistemy i viarnucca da vykarystańnia uncyj, funtaŭ i jardaŭ
Urad Vialikabrytanii płanuje viarnucca da ŭžyvańnia tradycyjnych mier vahi i daŭžyni: funta, uncyi i jarda. Jak paviedamlaje Sunday Mirror, adpaviednyja hramadskija kansultacyi mohuć pačacca ŭžo ŭ najbližejšy čas.
Fota: AFP/Getty Images
Takim čynam, adznačaje vydańnie, premjer-ministr Borys Džonsan imkniecca pazbavicca ad praviłaŭ, jakija nakładaŭ na Brytaniju ŭdzieł u Jeŭrasajuzie. Abaviazkovaje vykarystańnie markiroŭki ŭ hramach i kiłahramach u roźničnym handli było ŭviedzienaje ŭ Brytanii ŭ 2000 hodzie, choć Łondan doŭha supraciŭlaŭsia sistemie pierachodu na jeŭrapiejskija standarty.
Ciapier ža prapanujecca dać rytejleram prava vybaru taho, u jakich adzinkach padavać vahu tavaru.
Akramia taho, raniej u Kansiervatyŭnaj partyi prapanoŭvali źmianić kalibroŭku jomistaściaŭ piva i vina ź litraŭ na pinty. Hetuju inicyjatyvu ŭžo krytykujuć lejbarysty. Na ich dumku, urad vartym žalu čynam choča pravodzić «palityku nastalhii».
