Kiraŭnika sanatoryja «Biełaruś» u Jurmale ŭnieśli ŭ łatvijski «čorny śpis»
U «čorny śpis» Łatvii ŭnieśli dyrektara jurmalskaha sanatoryja «Biełaruś», jaki naležyć dziaržaŭnym strukturam Biełarusi, Alaksandra Hruzdova. Akramia taho, u pieralik uklučyli jaho kalehu — kiraŭnika rasijskaha sanatoryja «Burštynavy bierah». Pra heta paviedamlaje delfi.lv sa spasyłkaj na dziaržaŭnuju słužbu biaśpieki Łatvii.
Sanatoryj «Biełaruś» u Jurmale
U dziaržaŭnaj słužbie biaśpieki paćvierdzili — hramadzianin Rasii Viktar Daniłaŭ i hramadzianin Biełarusi Alaksandr Hruzdoŭ praciahły čas znachodziacca ŭ pole zroku słužby ŭ suviazi ź dziejnaściu, jakaja adpaviadaje rasijskim intaresam i moža pahražać nacyjanalnaj biaśpiecy Łatvii.
«U suviazi z hetym u sakaviku słužba dziaržbiaśpieki zaklikała ministra ŭnutranych spraŭ uklučyć uładalnikaŭ sanatoryjaŭ u čorny śpis — heta značyć u śpis zamiežnych hramadzian, jakim zabaronieny ŭjezd u Łatviju», — piša vydańnie.
Abodva sanatoryi znachodziacca pad sankcyjami Jeŭrapiejskaha Sajuza, a značyć, im nielha davać nijakija finansavyja ci ekanamičnyja resursy.
Sanatoryj «Biełaruś» naležyć Upraŭleńniu spravami prezidenta Biełarusi, heta značyć faktyčna kantralujecca Alaksandram Łukašenkam. Jon znachodzicca pad sankcyjami ES.
U krasaviku stała viadoma, što z-za abmiežavańniaŭ sanatoryj spyniŭ pracu. Dyrektar «Biełarusi» Alaksandr Hruzdoŭ źjechaŭ na radzimu. Jon śćviardžaŭ, što jaho pazbavili vidu na žycharstva, a napiaredadni departacyi łatvijskija śpiecsłužby nibyta prapanoŭvali jamu padpisać papiery ab niepryznańni Łukašenki lehitymnym prezidentam i asudzić vajnu Rasii suprać Ukrainy.
