«Zierkało»: Padčas pravierki sił reahavańnia paciarpieli dvoje vajskoŭcaŭ. U Minabarony abviarhajuć
«Zierkało» sa spasyłkaj na čytačoŭ paviedamlaje, što ŭviečary 12 maja ŭ Hrodzienskuju ŭniviersiteckuju kliniku i Hrodzienski vajenny špital pastupili dvoje vajskoŭcaŭ. Pa papiaredniaj infarmacyi, jany atrymali traŭmy pry sčepcy tankaŭ ci beteeraŭ. Heta adbyłosia padčas pravierki sił reahavańnia, što ładzić Minabarony.
Fota: Minabarony
— U Hrodnie im akazvajecca dapamoha, — kaža čytač. — Adnamu z paciarpiełych było vydalenaje adno lohkaje. Apieryravali chłopcaŭ siońnia nočču. Adzin ź ich u reanimacyi ŭniviersiteckaj kliniki na ŠVŁ u ciažkim stanie. U jaho množnyja pierałomy, razryŭ lohkaha, traŭmy kišečnika. Uvohule, traŭmy i kaściej, i ŭnutranych orhanaŭ. Druhi — lahčejšy. Jon byccam by znachodzicca ŭ vajennym špitali.
Adzin z supracoŭnikaŭ Hrodzienskaj univiersiteckaj kliniki paćvierdziŭ hetuju infarmacyju. Pavodle jaho źviestak, paciarpieły pastupiŭ u miedustanovu ŭviečary 12 traŭnia.
— Adnaho vajennaha ŭ nas dakładna apieryravali. Zrabili reziekcyju lohkaha. Stabilny, — raspavioŭ surazmoŭca. — Niezrazumieła, čamu pryvieźli ŭ našu kliniku: vajskoŭcaŭ adpraŭlajuć zazvyčaj u hrodzienski vajenny špital. Nibyta beteeram prycisnuła.
Dzie dakładna ŭsio adbyłosia, pakul nieviadoma. Ale kala Hrodna jość adzin tankavy palihon. Jon znachodzicca ŭ Hrodzienskim rajonie niedaloka ad ahraharadka Hoža.
My patelefanavali na «haračuju liniju» Ministerstva abarony ŭ jakaści baćkoŭ pryzyŭnika. Dziažurny supracoŭnik paviedamiŭ, što «ničoha pra sałdat nie čuŭ» i heta «niapravilnaja infarmacyja».
— Ja vam dakładna kažu, što ni siońnia, ni ŭčora ni na jakim palihonie nichto nie paciarpieŭ. Drenna, što čutki ŭsiakija niapravilnyja raspaŭsiudžvajucca. Nie chvalujciesia, — skazaŭ supracoŭnik Ministerstva abarony.
Taksama žurnalisty dasłali zapyt u pres-słužbu viedamstva, ale adkazu pakul nie atrymali.
Kali vam viadomyja padrabiaznaści zdareńnia, napišycie nam u čat-bot @nasa_niva_bot.
