Źjaviłasia videa rasstrełu dvaich mirnych žycharoŭ rasijskimi vajskoŭcami pad Kijevam
Rasijskija sałdaty zastrelili dvuch biazzbrojnych ludziej u aŭtacentry na ŭskrainie Kijeva. Ukrainskaja prakuratura rasśleduje hetuju padzieju jak vajennaje złačynstva.
Kadr ź videa. Krynica: CNN
Videa z zapisam rasstrełu apublikavała CNN, hety ž resurs vyśvietliŭ asoby achviar. Adna ź ich — uładalnik razrabavanaha dylerskaha aŭtacentra, jaho siamja nie choča nazyvać jaho imia. Druhaja achviara — 68-hadovy Leanid Alaksiejevič Plac, jaki pracavaŭ u hetym centry achoŭnikam.
Zdareńnie adbyłosia 16 sakavika. Da dylerskaha centra pryjechali piać rasijskich vajskoŭcaŭ, jany pasprabavali trapić na jaho terytoryju: pačali stralać pa zamkach i raźbivać šyby.
Da vajskoŭcaŭ padyšoŭ z uźniatymi rukami ŭładalnik sałona, tyja spynili jaho i, jak vyhladaje, pačali šukać u jaho zbroju.
Paźniej padyšoŭ Plac, jaho taksama abšukali. Padobna, dalej adbyłasia niejkaja razmova, paśla čaho vajskoŭcy adviarnulisia, a cyvilnyja pačali adychodzić.
Tady jak minimum dvoje vajskoŭcaŭ zzadu adkryli ahoń pa cyvilnych, tyja ŭpali na ziamlu. Paśla hetaha akupanty trapili ŭ dylerski centr i pačali jaho rabavać. Na videa bačna, što ŭnutry centra jany abšukvali šafy i stały. Dvoje vajskoŭcaŭ znajšli napoi i pačali vypivać, čokajučysia pry hetym.
Pakul akupanty rabavali centr, Plac byŭ jašče žyvy. Na videa bačna, jak jon ź ciažkaściu ŭstaje na nohi, zaviazvaje vakoł ściahna niešta padobnaje da žhuta i idzie na post achovy. Tam mužčyna pa telefonie vyklikaje dapamohu.
Ukrainskija dobraachvotniki sprabavali vyratavać jaho. Jany dabralisia da Placa i vyciahnuli jaho z budki achoŭnika, dzie toj chavaŭsia ŭ čakańni dapamohi, ale jon zahinuŭ, bo syšoŭ kryvioju.
Viadoma, što abiedźviuch achviar raniej papiaredžvali, što rasijskija vojski ŭžo blizka, ale jany admovilisia vyjazdžać.
Vyhladaje, što mužčyny nie ŭjaŭlali, jak da ich pastaviacca rasijskija vajskoŭcy, kali razmaŭlali ź imi. Dobraachvotniki, jakija sprabavali vyratavać Placa, ličać hetaje zabojstva biezumoŭnym vajennym złačynstvam, i hetak ža dadzienuju padzieju razhladaje ŭkrainskaja prakuratura, jakaja ŭžo pačała svajo rasśledavańnie zabojstva.
«Našu Nivu» finansujuć jaje čytačy — padtrymać prosta
Čytajcie taksama:
Rasija vymušanaja vykarystoŭvać u vajskovaj technicy kampjutarnyja čypy ad pasudamyjek
Washington Post: ZŠA abmiažoŭvajuć abmien raźvieddanymi z Ukrainaj, kab praduchilić bolš maštabnuju vajnu
