Ukraina spynić tracinu tranzitu rasijskaha hazu ŭ Jeŭropu
Apieratar hazatranspartnaj sistemy Ukrainy (AHTS) paviedamiŭ pra spynieńnie z 11 maja tranzitu traciny rasijskaha hazu ŭ Jeŭropu. Pryčynaj nazvany pierachod terytoryi, na jakoj raźmieščanaja adna z kampresarnych stancyj, pad kantrol łuhanskich sieparatystaŭ. «Hazpramu» prapanavana pieranakiravać tranzitnuju płyń. Adkaznaść za spynieńnie tranzitu ŭkrainski bok uskłaŭ na Rasiju, piša Radyjo Svaboda.
Śćviardžajecca, što apieratar nie moža ažyćciaŭlać apieratyŭny kantrol za kampresarnaj stancyjaj «Navapskoŭ». Pavodle zajavy AHTS, umiašańnie Rasii ŭ technałahičnyja pracesy i niesankcyjanavany adbor hazu «pastavili pad pahrozu stabilnaść i biaśpieku pracy ŭsioj ukrainskaj hazatranspartnaj sistemy».
AHTS Ukrainy taksama paviedamiŭ ab spynieńni ź sierady tranzitu hazu praz hazaraźmierkavalnuju stancyju «Sachranaŭka» ŭ Łuhanskaj vobłaści.
Dla pastavak hazu ŭ Jeŭropu mahčymy časovy pieranos «niedastupnych mahutnaściaŭ» z «Sachranaŭki» na punkt złučeńnia «Sudža», što na padkantrolnaj ukrainskim vojskam terytoryi, adznačyŭ apieratar. U AHTS dadali, što kampanija nieadnarazova papiaredžvała «Hazpram» ab spynieńni tranzitu z pryčyny «vajennaj apieracyi» i patrabavała spynić umiašańnie ŭ pracu abjektaŭ, ale hetyja patrabavańni byli praihnaravanyja.
U toj ža čas aficyjny pradstaŭnik «Hazprama» Siarhiej Kupryjanaŭ, kamientujučy zajavu AHTS Ukrainy, padkreśliŭ, što ŭ «Hazpramie» fors-mažornych abstavinaŭ nie bačać.
«Hazpram» zajaŭlaje, što nie atrymaŭ jakich-niebudź paćvierdžańniaŭ abstavinaŭ fors-mažoru, nie bačyć nijakich pieraškod dla praciahu pracy ŭ raniejšym režymie. Ukrainskija śpiecyjalisty, maŭlaŭ, uvieś hety čas spakojna pracavali na HRS «Sachranaŭka» i KS «Navapskoŭ» i praciahvajuć heta rabić, tranzit praz «Sachranaŭku» zabiaśpiečvaŭsia ŭ poŭnym abjomie, nijakich narakańniaŭ ad kontrahientaŭ nie było i niama», — skazana ŭ zajavie Kupryjanava.
U «Hazpramie» da taho ž ličać, što prapanavany ŭkrainskim bokam varyjant ź pieranosam abjomaŭ na HRS «Sudža», zychodziačy z Rasijskaj patokavaj schiemy, technałahična niemahčymy.
