My niedaaceńvajem kałaryjnaść fast-fudu. Voś što možna čakać ad pačka čypsaŭ na dzień
Ludzi vielmi niedaaceńvajuć kolkaść kałoryj u fast-fudaŭskich pierakusach. Nasamreč, jak papiaredžvajuć ekśpierty, usiaho tolki pačak čypsaŭ štodzień moža vyklikać prybaŭku ŭ vazie na 6,4 kiłahramy za hod.
Fota: pixabay.com
U spravazdačy dabračynnaj arhanizacyi Nesta havorycca, što ludzi časta nie razumiejuć, jaki ŭpłyŭ na ich zdaroŭje mohuć akazać nievialikija źmieny ŭ charčavańni. Naprykład, dadatkovyja 240 kałoryj u dzień — prykładna stolki my atrymlivajem, kali źjadajem vialiki pačak čypsaŭ — vyklikajuć prybaŭku ŭ vazie na 6,4 kiłahramy na praciahu hoda, piša The Times.
Pry hetym apytańnie ad Nesta, u jakim uziali udzieł 2 tysiačy darosłych respandentaŭ, pakazała: kala troch čverciaŭ ź ich niedaacanili ŭpłyŭ na zdaroŭje maleńkaha abmiežavańnia ŭ kałaryjnaści. Kožny dziasiaty z respandentaŭ, naprykład, ličyŭ, što kali jany pačnuć štodzień užyvać na 200 kałoryj mienš, heta nijak nie paŭpłyvaje na ich vahu.
Padčas apytańnia jaho ŭdzielnikaŭ paprasili acanić kałaryjnaść šerahu praduktaŭ i napojaŭ, a potym paviedamić, jakoj mahła b być strata ŭ lišniaj vazie, kali trochi źnizić štodzionnaje ŭžyvańnie kałoryj. U asnoŭnym ludzi byli blizkija da praŭdy, ale ž prablemy pačynalisia, kali treba było acanić kałaryjnaść «niezdarovych» pierakusaŭ.
Naprykład, bolšaja častka ŭdzielnikaŭ paličyli, što kałaryjnaść sasiski ŭ cieście składaje 228 kałoryj, u toj čas jak sapraŭdnaja ličba dla hetaj stravy — 328 kałoryj. U vypadku z pačkam (90 hramaŭ) kukuruznych čypsaŭ roźnica akazałasia jašče bolšaj: 214 kałoryj suprać sapraŭdnych 447.
Jakija vysnovy robiać ekśpierty? Zhodna ź imi, ludzi nie nadta razumiejuć, nakolki kałaryjnymi źjaŭlajucca nasamreč «niezdarovyja» pradukty. Pry hetym takaja ježa zajmaje ŭ siarednim ad 300 da 500 kałoryj u štodzionnym racyjonie brytancaŭ, tamu, kali b ludzi zdoleli ad jaje admovicca, heta dapamahło b u zmahańni z prablemaj atłuścieńnia.
«Našu Nivu» finansujuć jaje čytačy — padtrymać prosta
Čytajcie taksama:
Ci sapraŭdy čałaviek pavinien jeści try razy na dzień?
