Ci dapamoža rasijskaj armii mabilizacyja? Voś što kaža papularny amierykanski analityk
Staršy navukovy supracoŭnik amierykanskaha Instytuta daśledavańniaŭ źniešniaj palityki Rob Li dzielicca svaim mierkavańniem pra vajnu va Ukrainie. Publikujem častku jaho intervju «Mieduzie».
Źniščanaja rasijskaja technika va Ukrainie. Fota: Rodrigo Abd / AP
— Jak možna acanić toje, što ciapier adbyvajecca na vajnie va Ukrainie?
— Skončyłasia bitva za Kijeŭ — heta była samaja ambicyjnaja i niedastupnaja meta Rasii. Apošnija dva-try tydni [rasijskaja armija] sfakusavanaja na Danbasie i asobnych častkach poŭdnia Ukrainy. Rasija zachoplivaje niejkija terytoryi, ale niezrazumieła, što budzie adbyvacca ŭ dalejšym. Va Ukrainy pabudavanaja dobraja abarona va [ŭschodnim] rehijonie, a Rasija ŭžo paniesła surjoznyja straty, što ŭskładniaje nastup.
Jak budzie raźvivacca situacyja, nie da kanca zrazumieła, ale nie dumaju, što Rasija zachavaje značnuju častku [akupavanych] terytoryj. A dalejšy zachop moža ŭskładnicca z-za pastavak ad NATA [va Ukrainu]: vysokadakładnaja zbroja, baražyrujučyja bojeprypasy — usie jany vielmi efiektyŭnyja.
Ciapier kožny mahčymy chod Pucina źviazany z ryzykaj. Naprykład, pry rašeńni ab mabilizacyi jon niasie vialikija ŭnutrypalityčnyja ryzyki. Taksama niezrazumieła, nakolki efiektyŭnymi buduć reziervisty i navabrancy.
Ale biez abviaščeńnia ab mabilizacyi Rasii budzie ciažka pratrymać vajnu ŭ biahučym stanie [navat] da vosieni. Rasijskaja armija paniesła ciažkija straty i budzie praciahvać stračvać vojska.
Nie dumaju, što ŭ takich umovach Ukraina pojdzie na jakija-niebudź surjoznyja kampramisy. Nie fakt, što jana pahodzicca na deeskałacyju kanfliktu navat pry sprobie deeskałacyi z boku Rasii. Na moj pohlad, u hetym vypadku Ukraina, mahčyma, moža advajavać Danbas — navat razam z terytoryjami, jakija da 24 lutaha byli pad kantrolem Rasii.
Tak što ni adzin z hetych varyjantaŭ raźvićcia padziej nie budzie dobrym [dla Pucina]. Ale najbolš vierahodnaja situacyja ŭ bližejšy čas — heta praciah prykładna taho, što adbyvajecca ciapier. Na praciahu nastupnaha miesiaca linija frontu nie budzie značna zrušvacca, ale budzie vieścisia aktyŭny artyleryjski ahoń.
— Ci padobna ŭsio heta na toje, što Pucin vyrašyŭ vieści praciahłuju vajnu na źniasileńnie?
— Prablema Rasii ŭ tym, što kali b jana zasiarodziła ŭsie svaje vajskovyja siły i vykarystała efiekt niečakanaści padčas pieršych dvuch tydniaŭ vajny, a taksama vycisnuła maksimum sa svajho kamandavańnia, to, vierahodna, zmahła b dasiahnuć bolšaha pośpiechu. Usio heta vielmi mocna ŭdaryła b pa armii Ukrainy.
Razburanaje paśla rasijskaha napadu siało Byšaŭ pad Kijevam, 27 sakavika 2022 h. Fota: Rodrigo Abd / AP
Jašče adna prablema ŭ tym, što vojska RF užo cierpić ad prablem z pastaŭkami. I asabliva cierpiać padraździaleńni, jakija ździajśniajuć vajennyja manieŭry: PDV, marskaja piachota, śpiecnaz. Usie jany ŭžo panieśli vialikija straty.
Kali Rasija paniasie jašče bolš strat siarod hetych padraździaleńniaŭ, to ŭźnikaje pytańnie: jak jana budzie chacia b utrymlivać zaniatyja pazicyi pry nastupie ŭkrainskich sił? Najbolš vierahodny scenaryj — pabudova abarončych umacavańniaŭ z abodvuch bakoŭ i pačaščeńnie artyleryjskaha ahniu. I, chutčej za ŭsio, usio heta stanie vajnoj na źniasileńnie.
— Rasii ŭdałosia vyrašyć chacia b častku prablem u zabieśpiačeńni armii, jakija byli na pačatku ŭvarvańnia?
— Hałoŭnaj prablemaj na pačatku vajny stała toje, što bolšaści rasijskich vajskovych častak nie skazali zahadzia, što jany adpraŭlajucca na vajnu. Rašeńni, pryniatyja ŭ toj momant, nie ŭličvali płanavańnie pastavak na taki praciahły termin. Pastaŭki častak dla techabsłuhoŭvańnia, vady, ježy zvyčajna płanujucca zahadzia, ale času na płanavańnie, mabyć, nie dali. Taki chod vielmi paškodziŭ łahistycy.
Jašče adzin važny aśpiekt zaklučajecca ŭ tym, što płan ŭvarvańnia uklučaŭ u siabie vielmi šmat napramkaŭ nastupu, dla jakich ciažka padtrymlivać łahistyku adnačasova. U niejkim sensie, ssunuŭšy fokus na Danbas, Rasija zmahła vypravić łahistyku.
Mahčyma, jana stała lepšaj prosta za košt pamianšeńnia vobłaści vajennych dziejańniaŭ, ale ŭsio jašče moža mieć istotnyja niedachopy.
— U siecivie šmat infarmacyi pra drenny ryštunak rasijskaj armii — fatahrafii praterminavanych suchpajkoŭ i hetak dalej. Heta tak?
— Rasijskija vojski nie tak užo dobra padrychtavanyja. Naprykład, jany da hetaha času vykarystoŭvajuć vielmi sastarełyja tanki T-72. Jašče adna sa słabaściaŭ [rasijskaha vojska] u tym, što ŭ ich niedastatkova pryboraŭ načnoha bačańnia, asabliva ŭ asabovaha składu. U cełym mahu vykazać zdahadku, što ryštunak rasijskaha sałdata supastaŭny z ryštunkam ukrainskaha.
Jašče adna z prablem u armii RF, jakaja abmiarkoŭvajecca, — heta linii kamunikacyi. Jany nie ŭ lepšym stanie, jany nie mohuć efiektyŭna vykarystoŭvać zašyfravanyja radyjopieradačy. Akramia taho, u Rasii praktyčna niama vysokadakładnaj zbroi, tak što bambavańnie adbyvajecca z vykarystańniem niekiravanych rakiet. Ich treba puskać bližej da celi ŭ paraŭnańni z vysokadakładnaj zbrojaj, taksama ich prymianieńnie ŭskładniaje abo zatrymlivaje praviadzieńnie vajennych manieŭraŭ. Uźnikajuć pytańni, nakolki sučasna abstalavanyja vojski RF i nakolki mocna abstalavańnie vojskaŭ NATO ich pieraŭzychodzić.
— Zachodnija čynoŭniki i ŚMI kažuć, što 9 maja Rasija moža pačać mabilizacyju. Ci moža heta źmianić chod kanfliktu? Pa vašaj acency, ci dastatkova ŭ Rasii resursaŭ, kab zabiaśpiečyć usich navabrancaŭ zbrojaj i abmundziravańniem?
— Mabilizacyja dazvolić Rasii praciahnuć vajnu, ale niezrazumieła, ci dapamoža jana ŭ nastupalnych apieracyjach. Bo dla ich patrabujucca navučanyja vajskovyja padraździaleńni. [Paśla mabilizacyi] stanie mahčyma ŭtrymlivać zachoplenyja terytoryi, vykonvać pracu ŭ tyle, ale heta nie dazvolić vyjhrać vajnu.
Pry hetym ja ŭpeŭnieny, što ŭ Rasii jość nieabchodnaja zbroja. Ale ci chopić dobraha ryštunku, abutku? Akramia taho, pytańnie nie ŭ tym, jak šmat u Rasii tankaŭ, a jak efiektyŭna jany mohuć ich vykarystoŭvać. Tanki hatovyja vyjechać pa pieršym kličy? Abo dla vyjezdu im spatrebicca niekalki tydniaŭ? Heta niezrazumieła. Taksama niezrazumieła, z kaho budzie składacca kamandavańnie [mabilizavanymi].
<…>
Padraździaleńni RF nie vałodajuć vialikaj kolkaściu lohkaj piachoty. U rasijskich atradach nazirajecca pa dva piachotniki na kožny transpartny srodak suprać naležnych piaci-šaści.
Heta značyć, što kali vy traplajecie na terytoryju horada, to ŭźnikaje niedachop piachoty dla ruchu pa vulicach, a takim čynam pravodzić apieracyi ŭ haradskich zonach vielmi niaprosta. Mienavita tut moža spatrebicca apałčeńnie — kab zabiaśpiečyć vojska lohkaj piachotaj.
— Heta značyć, piechacincy najbolš važnyja padčas bajoŭ u haradach?
— Tak, asabliva ŭ haradach, ale nie tolki. Niedachop piachoty pavialičvaje ryzyki dla tankaŭ i inšaj ciažkaj techniki. Pry nastupie karysna raźmiaścić piachotu pierad transpartnaj adzinkaj, kab abaraniać jaje. Inakš transpart budzie vielmi ŭraźlivy dla ahniu «Džavielinaŭ», NLAW, RPH i inšych padobnych sistem.
