Napad Rasii zmusiŭ ukraincaŭ inšymi vačyma pahladzieć na Banderu
Da 2022 hoda rolu Ściapana Bandery ŭ historyi Ukrainy pazityŭna aceńvała tolki tracina ŭkraincaŭ. Ciapier — try čverci.
Ukrainskaja sacyjałahičnaja hrupa «Rejtynh» praviała daśledavańnie ideałahičnych markieraŭ ukrainskaha hramadstva va ŭmovach vajny.
Kali raniej, da pačatku vajny, fihura Ściapana Bandery vyklikała supiarečnaści, i pazityŭna jaho rolu ŭ historyi aceńvała tolki tracina ŭkraincaŭ (jašče tracina — niehatyŭna), to z pačatkam vajny va Ukrainie vakoł fihury Bandery ŭstanaviŭsia hramadski nacyjanalny kansensus — ciapier jaho rolu pazityŭna aceńvajuć try čverci ŭkraincaŭ.
Kali raniej Banderu ličyli hierojem na zachadzie Ukrainy, to ciapier pazityŭnaje staŭleńnie da ideołaha ŭkrainskaha nacyjanalizmu pieravažaje i ŭ paŭdniova-ŭschodnich rehijonach, u tym liku siarod ruskamoŭnych ukraincaŭ.
Admietna, što Pucin abhruntoŭvaje svaju vajnu suprać Ukrainy «denacyfikacyjaj». Pad tak zvanaj «denacyfikacyjaj» rasijanie razumiejuć deŭkrainizacyju, rusifikacyju, nasadžeńnie va Ukrainie svajoj, rasijskaj viersii histaryčnaj pamiaci i svaich pryncypaŭ dziaržaŭnaha ładu pa anałohii z tym, što adbyłosia ŭ Biełarusi, Prydniastroŭi i «DNR». U «denacyfikacyju» (jak jaje razumiejuć rasijanie) uvachodzić i dyskredytacyja Ściapana Bandery.
Ale, jak my bačym, pucinskija «šmatchadovački» pryviali da procilehłych vynikaŭ: Bandera stanovicca hierojem dla ŭsich ukraincaŭ.
Chto taki Bandera?
Ściapan Bandera byŭ stvaralnikam Arhanizacyi ŭkrainskich nacyjanalistaŭ, što ŭ 1930—50-ja hady viała ŭzbrojenuju baraćbu za niezaležnaść Ukrainy. Bandery ŭdałosia zrabić niezaležnicki ruch papularnym.
Postać Bandery vyklikaje rezkaje nieprymańnie ŭ Rasii, bo jon arhanizavaŭ masavy i paśpiachovy ŭzbrojeny supraciŭ savietam. Ukrainskija ž historyki ŭ acency Bandery padzialilisia. Nacyjanalisty i dziaržaŭniki vysoka aceńvajuć jaho postać, libierały i levyja staviacca da jaho niehatyŭna.
Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla — suprać nacystaŭ i savietaŭ. Z druhoha boku, jaho arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva.
U pieryjad da 1941 hoda AUN supracoŭničała ź niamieckimi nacystami. Adnak niemcy adpravili kiraŭnikoŭ arhanizacyi, u tym liku Banderu, u kancłahier, kali tyja 30 červienia 1941 hoda abviaścili Ukrainu niezaležnaj.
Raspaŭsiudžany fejk, što heta «banderaŭcy» palili vioski ŭ Biełarusi. Jon nie adpaviadaje histaryčnaj praŭdzie: Bandera na toj momant užo byŭ aryštavany nacystami. U źniščeńni Chatyni dy inšych zładziejstvach razam z esesaŭcami ŭdzielničali kałabaranckija padraździaleńni, składzienyja z pradstaŭnikoŭ roznych nacyjanalnaściej. U ich pieravažna ŭvachodzili byłyja savieckija vajennapałonnyja, pastaŭlenyja pierad vybaram: abo hałodnaja śmierć u łahiery, abo słužba nacystam.
Banderu ŭ 1959 hodzie zabiŭ ahient savieckaha KHB, jaki z časam raskaiŭsia ŭ svaim učynku i pierabieh na Zachad.
Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.
Ukrainskija nacyjanalisty šanujuć čyrvona-čorny ściah AUN naroŭni ź dziaržaŭnym, žoŭta-błakitnym.
Nacyjanalistyčnyja idei atrymali novaje raspaŭsiudžańnie va Ukrainie ŭ adkaz na zachop Rasijaj Kryma i častki Danbasa ŭ 2014-m.
Siońnia postać Bandery ŭšanoŭvajecca taksama va ŭkrainskich siłavych strukturach.
Čytajcie taksama:
Capkała zajaviŭ, što Ściapan Bandera vajavaŭ ź Piatrom I
