Hazieta Łukašenki: Ruskija sałdaty vyzvalajuć Ukrainu ad banderaŭskich niedabitkaŭ, u tym liku i ŭ našych intaresach
«Ty Radzimu albo padtrymlivaješ, albo ty vorah», — piša «SB. Biełaruś siehodnia», hazieta Administracyi prezidenta.
Siamja idzie pa razburanaj vulicy ŭ Bučy, dzie stajać źniščanyja rasijskija tanki. Ukraina, 6 krasavika. Fota: Felipe Dana, AP Photo
Śledam za rasijskimi šavinistyčnymi vydańniami hazieta Administracyi prezidenta Biełarusi vystupiła z napadkami na rasijskich zorak, jakija vystupili z antyvajennymi zajavami.
Łukašenkaŭskaje vydańnie nazyvaje Maksima Hałkina «Maksimam Ałkinym».
«Ty Radzimu abo padtrymlivaješ, abo ty vorah, — piša «SB. Biełaruś siehodnia». — Zdradnik, jaki pradaŭ jaje za piačeńki, hanarary, karjeru abo za što tam jašče pradajuć. A varta kancerty takim zabaranić, jak lamantujuć: a nas za što? Dyk za toje samaje, za zdradu, dyviersijnuju infarmacyjnuju dziejnaść, — tłumačyć vydańnie i zaklikaje. — Treba jak z Maksimam Ałkinym, jakoha z «Pieršaha kanała» papierli».
«SB» čarhovy raz pieraličvaje biełaruskich artystaŭ, jakija ŭniesienyja łukašenkaŭcami ŭ čornyja śpisy.
«Ci jak z dudzinskimi i pierlinymi, im taksama ŭ dziaržSMI nie rady. A jakija patryjatyčnyja pieśni «Tiani-Tołkaj» śpiavali… i «Hołas» vyjaviŭsia nie takim užo i čystym («Čysty hołas»). Jak i Hannačka Šarkunova, i nie jenčy pad bajan, i Anžełka Ahurbaš», — pieraličvaje hazieta.
Vydańnie taksama źviartaje ŭvahu, što ŭ śpiavački Viery Brežnievaj, nasamreč, ukrainskaje proźvišča Hałuška.
Taksama śledam za maskoŭskaj prapahandaj raspaŭsiudžvajecca chłuślivaja infarmacyja pra Čułpan Chamatavu:
«A Čułpan Chamatava, jakaja vystupała pad ukrainskim ściaham i jakaja prasiła nie cisnuć nieafašystaŭ? Tak, taja samaja Chamatava, jakaja zdymałasia ŭ filmie, dzie hieraizavali armianskaha ahienta nacystaŭ, viarboŭščyka dla dyviersij u tyle našaha vojska, adkrytaha rasista, čyje paśladoŭniki abjadnoŭvajucca ŭ partyi z «aryjskaj» ideałohijaj. Taja samaja Chamatava… ciapier u Łatvii, spačuvaje nieanacystam…»
Dastajecca i hurtu «Bi-2», choć jany navat i antyvajennych zajaŭ nie rabili, prosta zapatrabavali źniać znak «Z» sa sceny.
«Dyk, Loŭčyk ich (jon ža Jahor Bortnik) pa nieparazumieńni byŭ narodžany ŭ Biełarusi», — z tym ža chamstvam piša łukašenkaŭskaje vydańnie.
«A jak vam afišy kancerta Basta? Pa ŭsim Minsku raźviešanyja», — praciahvaje vydańnie.
«Kakovo eto vidieť» «tym, chto paciarpieŭ u 2020-m» dy «ruskim sałdatam, jakija ciapier vyzvalajuć Ukrainu ad banderaŭskich niedabitkaŭ, u tym liku ŭ intaresach našaj nacyjanalnaj biaśpieki?» — piša «Biełaruś siehodnia».
«SB» taksama praciahvaje raspalvać varožaść da inšych narodaŭ Jeŭropy. U chod iduć nie vielmi pavažlivyja nazvy.
«Saviecki narod raźličvaŭ, što žmudziny, łathały i čuchoncy sami pastupova raźbiarucca sa svaimi vyludkami. Vyjšła naadvarot: mienavita vyludki, spadčyńniki esesaŭcaŭ i ŭ pieranosnym, i ŭ pramym sensie, uvajšli ŭ kirujučyja koły prybałtyjskich dziaržaŭ».
Pry hetym vydańnie narakaje na «sproby ŭciahnuć usich nas — i biełarusaŭ, i rasijan — u poŭnamaštabnuju vajnu».
«SB. Biełaruś siehodnia», jak i inšyja padobnyja ŚMI, farmalna ličycca dziaržaŭnym, ale ŭ realnaści nie adlustroŭvaje ŭsiaho śpiektra mierkavańniaŭ, a absłuhoŭvaje Alaksandra Łukašenku i jaho palityčnuju hrupoŭku.
«I čym bolš u ich nie atrymlivajecca, tym bolšaja ŭ ich nianaviść da nas. Da Biełarusi, Rasii, Sajuznaj dziaržavy. Što takoje ckavańnie suśvietnaha maštabu suprać našych spartsmienaŭ? Praciah hienacydu», — piša vydańnie.
