Rasijskija vojski pačali čarhovy šturm «Azoŭstali» ŭ Maryupali
Pra pačatak šturmu maryupalskaj «Azoŭstali» paviedamlajuć jak ukrainskija, tak i rasijskija krynicy.
Rasijskaja armija pačała šturm zavoda «Azoŭstal», paćvierdziŭ načalnik patrulnaj palicyi Maryupala Michaił Viaršynin u efiry ŭsieŭkrainskaha telemarafonu. Raniej pra pačatak šturmu zajaviŭ ukrainski vajenny karespandent Andrej Caplijenka.
«Prosta ciapier sprabujuć prarvacca na terytoryju zavoda», — napisaŭ jon u svaim telehram-kanale, dadaŭšy, što pierad hetym avijacyja niekalki hadzin bambiła «Azoŭstal».
«Uźnik maštabny pažar, dym ad jakoha bačny praktyčna va ŭsich rajonach Maryupala», — zajaviŭ Caplijenka.
Infarmacyju pra šturm vydańniu «Ukrainskaja praŭda» paćvierdziŭ i namieśnik kamandzira pałka «Azoŭ» Śviatasłaŭ Pałamar. «Usiu noč nas bambili avijabombami, zahinuli dźvie cyvilnyja žančyny, a ciapier adbyvajecca šturm «Azoŭstali», — cytuje jaho UP.
Rasijskaje Minabarony, u svaju čarhu, zajaviła, što «ŭkrainskija vajskoŭcy skarystalisia režymam cišyni na «Azoŭstali» i vyjšli na ahniavyja pazicyi».
«Padraździaleńni rasijskaj armii i «DNR», vykarystoŭvajučy artyleryju i avijacyju, pačynajuć źniščać hetyja ahniavyja pazicyi», — śćviardžajuć u hetym vajskovym viedamstvie.
Mer Maryupala Vadzim Bojčanka zajaviŭ ahienctvu «Rojters», što na terytoryi zavoda ŭsio jašče zastajucca kala 200 mirnych žycharoŭ.
