Łaŭroŭ zajaviŭ, što jaŭrei — «samyja zaŭziatyja antysiemity», a ŭ Hitlera «taksama była jaŭrejskaja kroŭ». U Izraili jaho słovy nazvali aburalnymi
Ministr zamiežnych spraŭ Izraila Jair Łapid nazvaŭ «niedaravalnymi» i «aburalnymi» vykazvańni svajho rasijskaha kalehi Siarhieja Łaŭrova pra jaŭrejaŭ.
«Vykazvańni ministra zamiežnych spraŭ RF Łaŭrova nie tolki niedaravalnyja i aburalnyja — jany taksama źjaŭlajucca žudasnaj histaryčnaj pamyłkaj. Jaŭrei nie zabivali siabie padčas Chałakostu. Abvinavačvańnie samich jaŭrejaŭ u antysiemityźmie — heta samy nizinny ŭzrovień rasizmu ŭ dačynieńni da jaŭrejaŭ», — napisaŭ Łapid u Tvitary ŭ adkaz na vykazvańni Łaŭrova.
1 maja Łaŭroŭ daŭ intervju italjanskaj telekampanii «Miedyjaset». Žurnalist zhadaŭ, što prezident Ukrainy Uładzimir Zialenski — jaŭrej i ličyć «denacyfikacyju» jaho krainy biessensoŭnaj, na što ministr zajaviŭ:
«Mnie zusim abyjakava, što abviarhaje ci nie abviarhaje prezident Zialenski. U jaho siem piatnic na tydni, jak u nas pryniata kazać. Na praciahu adnaho dnia moža pamianiać pazicyju niekalki razoŭ.
Čuŭ, jak jon skazaŭ, što my demilitaryzacyju i denacyfikacyju navat nie budziem abmiarkoŭvać na pieramovach. Pa-pieršaje, jany sabatujuć hetyja pieramovy, hetak ža, jak i vosiem hadoŭ Minskija damoŭlenaści.
Pa-druhoje, nacyfikacyja jość: zachoplenyja ŭ pałon bajeviki z bataljonaŭ «Azoŭ», «Ajdar» i inšych padraździaleńniaŭ, nosiać na ekipiroŭcy, svaim ciele simvały i tatuiroŭki svastyki, nacysckich bataljonaŭ Vafien-SS, adkryta čytajuć i prapahandujuć «Majn kampf». Jon vysoŭvaje arhumient: jakaja ŭ ich moža być nacyfikacyja, kali jon jaŭrej.
Mahu pamylicca, ale ŭ Adolfa Hitlera taksama była jaŭrejskaja kroŭ. Heta absalutna ničoha nie značyć. Mudry jaŭrejski narod kaža, što samyja zaŭziatyja antysiemity, jak praviła, jaŭrei. Niama rodu biez vyrodu, jak u nas kažuć.
