Kancler Hiermanii ličyć svaju palityku ŭ dačynieńni da pastavak zbroi Ukrainie pravilnaj. Ale apazicyja maje inšuju dumku
Fiederalny kancler Hiermanii Ołaf Šolc adchiliŭ paproki lidaraŭ apazicyi ŭ nierašučaści pa pytańni pastavak ciažkich uzbrajeńniaŭ Kijevu i zajaviŭ, što prymaje rašeńni ŭ kaardynacyi z sajuźnikami Hiermanii, piša Deutsche Welle.
Ołaf Šolc na kruhłym stale pa dapamozie ŭkrainskim biežancam
«Ja prymaju rašeńni chutka — i ŭ kaardynacyi z našymi chaŭruśnikami», — zajaviŭ Šolc u intervju vydańniu Bild am Sonntag, jakoje vyjdzie ŭ śviet u niadzielu, 1 maja.
Pa słovach Šolca, jon nie ŭchvalaje «zališniuju paśpiešlivaść i adzinkavyja dziejańni Hiermanii». Nastojvajučy na pravilnaści abranaha kursu, kancler padkreśliŭ, što «nie nastolki pałachlivy, kab padobnyja abvinavačvańni akazvali na jaho zanadta mocnaje ŭražańnie».
U toj ža čas jon padkreśliŭ, što žorstkaja krytyka jaho rašeńniaŭ całkam lehitymnaja, pakolki heta źjaŭlajecca «častkaj demakratyi». «Apazicyja kidaje surjozny vyklik. Dla hetaha jana i isnuje», — skazaŭ Šolc
Havoračy ab usio bolšaj kolkaści niezadavolenych jaho palitykaj žycharoŭ Hiermanii, kancler zaśviedčyŭ, što «na zamiery mierkavańniaŭ varta źviartać uvahu, ale nielha stavić svaje dziejańni ŭ zaležnaść ad ich, asabliva ŭ pytańniach vajny i miru heta mahło b stać vybuchovaniebiaśpiečnym».
Parłamienckaja apazicyja krytykuje kanclera. Napiaredadni premjer-ministr Bavaryi i staršynia apazicyjnaha Chryścijanska-sacyjalnaha sajuza (CHSS) Markus Zioder raskrytykavaŭ pazicyju Šolca i kiraŭničaj kaalicyi pa situacyi va Ukrainie. Jon abvinavaciŭ kanclera ŭ nierašučaści i sprobie syści ad dyskusii ab pastaŭkach ciažkich uzbrajeńniaŭ Kijevu.
«Heta nie adpaviadaje pretenzijam na lidarstva i cisku čakańniaŭ, jakija ŭskładajucca na FRH jak na najbujniejšuju i najmacniejšuju dziaržavu ŭ Jeŭropie», — zajaviŭ Zioder.
Jašče raniej pazicyju Šolca pa Ukrainie raskrytykavaŭ staršynia apazicyjnaha Chryścijanska-demakratyčnaha sajuza (CHDS) Frydrych Mierc. Pa jahonych słovach, svaimi pavodzinami kancler FRH stavić pad pahrozu zhurtavanaść usioj jeŭrapiejskaj supolnaści. My chočam viedać, jakaja zbroja pastaŭlajecca Kijevu, adznačyŭ lidar CHDS.
Jak vynikaje z sacyjałahičnaha apytańnia, praviedzienaha Instytutam Insa pa zamovie Bild am Sonntag, pracaj kiraŭnika hiermanskaha Kabinieta ministraŭ niezadavolenyja 54% respandentaŭ (32% zadavolenyja). Heta rekordna nizki ŭzrovień padtrymki Šolca z momantu jaho ŭstupleńnia na pasadu i pieršy raz, kali pra svaju niezadavolenaść kancleram zajaviła bolšaść apytanych.
Darečy, stała viadoma, što ŭ paniadziełak 2 tmaja lidar Chryścijanska-demakratyčnaha sajuza Hiermanii Frydrych Mierc naviedaje Kijeŭ. I heta važny krok u kantekście ŭnutrypalityčnaha zmahańnia Hiermanii. Šolc pakul što takoha kroku nie zrabiŭ.
