Palitviaźnia-anarchista Mikitu Jemialjanava znoŭ sudziać — za parušeńni režymu ŭ turmie
Pačaŭsia sud nad Mikitam Jemialjanavym za parušeńni režymu ŭ turmie — jamu pahražaje da dvuch hadoŭ źniavoleńnia. Mikita admoviŭsia ŭstavać u sudzie i patłumačyŭ, što nie ličyć toje patrebnym: «Heta nie sud, a sudzilišča, bo ŭ našaj krainie spraviadlivaha i niezaležnaha suda nie isnuje».
27 studzienia na vyjaznym sudovym pasiadžeńni ŭ turmie №4 Mahilova pačaŭsia razhlad kryminalnaj spravy Mikity Jemialjanava pavodle č. 2 art. 411 Krymilnaha kodeksa, paviedamlajuć pravaabaroncy.
Mikita prysutničaŭ u zale, adnak admoviŭsia ŭstavać pry adkazie na pytańni suda. Aksana Ratnikava patrabavała, kab abvinavačany ŭstavaŭ, i papiaredziła jaho, što za niepavahu da suda palitviaźnia mohuć vydalić z pasiadžeńnia. Mikita Jemialjanaŭ patłumačyŭ, što nie ličyć patrebnym ustavać: «Heta nie sud, a sudzilišča, bo ŭ našaj krainie spraviadlivaha i niezaležnaha suda nie isnuje».
Pavodle abvinavačvańnia, Mikita Jemialjanaŭ nieadnarazova parušaŭ praviły ŭnutranaha rasparadku i akazaŭ złosnaje niepadparadkavańnie patrabavańniam administracyi papraŭčaj ustanovy, čym ździejśniŭ złačynstva pavodle č. 2 art. 411 Kryminalnaha kodeksa.
Pry začytvańni abvinavačvańnia i pry daśledavańni materyjałaŭ kryminalnaj spravy prakuror patłumačyŭ, što 25 traŭnia 2020 h. pastanovaj suda Babrujskaha rajona i horada Babrujska Mikita Jemialjanaŭ byŭ pieraviedzieny na turemny režym. A z 9 traŭnia 2020 hoda jon utrymlivajecca ŭ turmie h. Mahilova.
Zhodna z abvinavačvańniem, Jemialjanavu ŭ vinu staviacca 16 parušeńniaŭ režymu, jakija byli ŭčynienyja paśla amal 14-17 miesiacaŭ z momantu dyscyplijnaha spahnańnia ŭ vyhladzie pieravodu ŭ turmu, što supiarečyć dyspazicyi art. 411 Kryminalnaha kodeksa.
Zhodna z pravaprymianialnaj praktykaj, pastanovami Plenuma Viarchoŭnaha suda, aficyjnymi kamientaryjami da Kryminalnaha kodeksa Respubliki Biełaruś, abaviazkovaj prykmietaj złačynstva, praduhledžanaha art. 411 UK źjaŭlajecca dyscyplijnaja prejudycyja. Heta značyć, što pryciahvać da adkaznaści pa art. 411 UK možna tolki tuju asobu, jakaja parušyła režym utrymańnia ciaham adnaho hoda paśla dyscyplijnaha spahnańnia ŭ vyhladzie pieravodu ŭ pamiaškańnie kamiernaha typu, adzinočnuju kamieru ci ŭ turmu.
Takim čynam, možna skazać, što dyscyplijnaja prejudycyja pa hetaj kryminalnaj spravie adsutničaje, a značyć — adsutničaje i abjektyŭny bok złačynstva.
Sudovaje raźbiralnictva praciahniecca 11 lutaha.
***
19-hadovyja Mikita Jemialjanaŭ i Ivan Komar byli zatrymanyja jašče ŭ kastryčniku 2019 hoda. Pa viersii śledstva, jany ŭ vieraśni taho hoda zakidali budynak Minskaha haradskoha suda lampačkami z farbaj, a potym kinuli «kaktejl Mołatava» ŭ SIZA na Vaładarskaha. Chłopcam dali pa siem hadoŭ kałonii.
