«My vośmy hod vajujem i pryvykli». Što va Ukrainie dumajuć pra mahčymaje rasijskaje i biełaruskaje ŭvarvańnie?
Voś užo niekalki miesiacaŭ napružanaj zastajecca situacyja na ŭkrainska-rasijskaj miažy. Rasija sabrała vakoł ukrainskich miežaŭ ahramadnuju vajskovuju hrupoŭku i pierakinuła samyja sučasnyja nastupalnyja ŭzbrajeńni, ad tankaŭ da «Iskanderaŭ». Adbyvajecca heta na fonie składanych pieramovaŭ Maskvy i Vašynhtona, na jakich Rasija patrabuje ad Zachadu tak zvanych «harantyj biaśpieki». Ale pakul na Zachadzie tema Ukrainy nie sychodzić ź pieršych pałos haziet, sama Ukraina pakazvaje stojki spakoj i adsutnaść paniki. Prezident Ukrainy Uładzimir Zialenski ŭ svaim videazvarocie zaklikaŭ ukraincaŭ nie panikavać, abiacaŭ viasnu, leta, vosień, zimu, šašłyki i svoj novy navahodni zvarot. Raźbirajemsia, ci hatovaja ŭkrainskaja dziaržava da rasijskaha ŭvarvańnia, čamu ŭkrainskija palityki ŭ hety čas zaniatyja ŭnutranymi razborkami, a taksama čaho čakać ad patencyjnaj vajny biełarusam, u tym liku tym, jakija znachodziacca va Ukrainie.
Ukrainskija vajskoŭcy. Fota: Minabarony Ukrainy.
Situacyja va ŭkrainskich haradach źniešnie zastajecca spakojnaj, tamu vielmi ciažka skazać pa vizualnaj karcincy, nakolki ŭkrainskija cyvilnyja i vajennyja słužby hatovyja na vypadak poŭnamaštabnaha ŭvarvańnia. Ci jość u ich płan dziejańniaŭ, ci budzie adpaviednaja jakasnaja kaardynacyja? My spytali ŭ publicysta, udzielnika rasijska-ŭkrainskaj vajny i eks-čynoŭnika Stanisłava Biazuški.
Usie ŭkrainskija kamandziry i aficery prajšli bai, brali niepasredny ŭdzieł u vajnie, tłumačyć Stanisłaŭ Biazuška, jaki i sam vieteran.
«Ja bolš, čym upeŭnieny, što z hetym nie budzie absalutna nijakich prablem, tamu što ŭ nas zaraz vielmi adekvatny i prytomny ministr abarony i jaho namieśniki. U nas z novaha hoda źmianiłasia ŭsio kamandavańnie Uzbrojenych siłaŭ, hałoŭnakamandujučy, načalniki štaboŭ. Usie hetyja aficery prajšli bai, brali niepasredny ŭdzieł u vajnie, adpaviedna, jany viedajuć, jak usio pracuje. Jość poŭny davier i padtrymka padnačalenych. Bataljony terytaryjalnaj abarony taksama razhortvajucca. Kiraŭniki albo ŭžo prystupili, albo ŭ najbližejšyja dni prystupajuć da vykanańnia svaich abaviazkaŭ. Atrymali techniku, zbroju, załučajuć ludziej», — kaža jon.
Ukrainskija vajskoŭcy. Fota: Minabarony Ukrainy.
Spadar Biazuška bačyć tolki adnu hałoŭnuju prablemu — pastajannaje nakručvańnie ŭ infarmacyjnym poli, praź jakoje ludzi niervujucca i stresujuć.
«A tak usio hatova. Tam, dzie orhany miascovaha samakiravańnia majuć adkazvać za publikacyju infarmacyi pra miesca schoviščaŭ, jany heta robiać, publikujuć infarmacyju. Adzinaje, što, mahčyma, nie ŭsie orhany miascovaha samakiravańnia ŭśviedamlajuć ryzyki pahrozy. I niekatoryja robiać heta pavolna i davoli kiepska kamunikujuć ź ludźmi», — praciahvaje jon.
«My hatovyja da vajny, my možam vajavać, i my hatovyja davać paŭnavartasny adkaz rasijanam u vypadku čarhovaj ahresii», — kaža publicyst i ŭdzielnik vajny.
Uładzimir Sałaŭjan, pradstaŭnik New Geopolitics Research Network, kaža, što palityčnaje kiraŭnictva, vajskovaje kamandavańnie, śpiecyjalnyja słužby nazapasili značny vopyt supraćdziejańnia vyklikam biaśpieki za hady hibrydnaha supraćstajańnia z Rasijaj.
«Havorka nie tolki pra bajavyja dziejańni na Danbasie. Dziejnaść rasiejskich śpiecsłužbaŭ pastajanna trymaje ŭ tonusie ajčynny siektar biaśpieki i abarony.
Akramia taho, uvarvańnie statysiačnaj hrupoŭki krainy-ahresara nie moža adbycca źnianacku — hetamu budzie papiaredničać peŭny pieryjad (prynamsi niekalki tydniaŭ) padciahvańnia hrupovak armii Rasii da ŭkrainskich miežaŭ. Va ŭmovach pastajannaha manitorynhu situacyi takija aktyŭnaści ŭtaić praktyčna niemahčyma. Tamu situacyja, pry jakoj kiraŭnictva krainy budzie zaśpieta rasijskim uvarvańniem źnianacku, źjaŭlajecca davoli małaimaviernaj», — kaža ekśpiert.
Čamu padčas pahrozy paŭnamaštabnaj vajny ŭkrainskija elity zaniatyja razborkami miž saboj?
Luboha čałavieka, jaki pahladzić na siońniašniuju Ukrainu, moža ŭrazić, nakolki nie adpaviadajuć nastroi ŭkraincaŭ paničnamu tonu zachodniaj presy i palitykaŭ, jakija padazrajuć Maskvu ŭ padrychtoŭcy poŭnamaštabnaha vajennaha ŭvarvańnia.
Na vulicach ukrainskich haradoŭ niama nijakaj paniki, ludzi nie skuplajuć zapałki i hrečku, a zaniatyja svaim zvyčajnym žyćciom i zaviaršajuć śviatkavańnie hałoŭnych zimovych śviataŭ. Viadoma, ludzi ŭ kursie pra rasijskija vojski na miažy, i rasijskuju pahrozu ličać absalutna realnaj, ale nie bolš za toje.
Nijakaha panikiorstva niama i ŭ infarmacyjnaj prastory. U miedyja roznych aliharchičnych hrup tema patencyjnaha rasijskaha ŭvarvańnia zastajecca važnaj, ale nie daminantnaj. U žyvym efiry telebačańnia pakazvajuć skandalnaje viartańnie eks-prezidenta Piatra Parašenki i sud ź jaho ŭdziełam — ciapierašniaja ŭłada padazraje jaho ŭ dziaržaŭnaj zdradzie. Zdajecca, mnohim ukraincam ciapier cikaviej nazirać za ŭnutrypalityčnymi razborkami, čym za ahresiŭnymi manieŭrami rasijskich vojskaŭ. U čym ža pryčyna?
Ukrainskija vajskoŭcy. Fota: Minabarony Ukrainy.
Voś što tłumačyć palityčny ekśpiert Alaksiej Rahavik, kiraŭnik analityčnaha centra Free Voice:
«Va Ukrainie realnaść vajny zrazumiełaja bolšaści ŭ hramadstvie nie pieršy hod. My štodnia sutykajemsia ź infarmacyjaj ab zahinułych voinach i abstrełach. Jość razumieńnie taho, što novyja akty rasijskich uvarvańniaŭ mahčymyja kožny dzień i heta razumieńnie ŭ nas jość nie adzin hod. Na žal, da hetaha adčuvańnia nam pryjšłosia pryvyknuć i być hatovymi.
Tamu infarmacyja ab ryzycy ŭvarvańnia ŭ hramadstvie ŭsprymajecca surjozna, ale nie jak niešta novaje, nie tak vostra, jak u zachodnich hramadstvach, jakija čas ad času padzabyvajuć, što vajna, ahresija Rasii suprać Ukrainy nikudy nie źnikała, a Danbas, Krym nie pierastavali być akupavanymi Rasijaj. Taksama my razumiejem, što vajenny šantaž źjaŭlajecca składnikam hieapalityčnaha cisku na Zachad i Ukrainu dla pierahavornych i inšych ustupak, u pryvatnaści, u kantekście cisku na Ukrainu adnosna vykanańnia tak zvanych Minskich damoŭlenaściaŭ.
Heta nie pieršy vypadak takoha šantažu z-za vajennych pahroz z boku Rasii. Adzinaja roźnica ŭ tym, što maštaby nieprymalnych ultymatumaŭ Rasii hłabalnyja i tyčacca nie tolki Ukrainy, ale i NATA, dziaržaŭ Uschodniaj Jeŭropy», — kaža spadar Rahavik.
Roźnica ŭ tym, što ciapier ultymatum Rasii hłabalny i tyčycca nie tolki Ukrainy, ale i NATA, dziaržaŭ Uschodniaj Jeŭropy, kaža ŭkrainski ekśpiert Alaksiej Rahavik.
Na dumku ekśpierta, infarmacyja ab patencyjnym maštabnym uvarvańni prysutničaje ŭ paradku dnia krainy, jość vostryja palityčnyja dyskusii adnosna hatoŭnaści Ukrainy siarod palitykaŭ i ŚMI.
«Žurnalisty i hramadskija dziejačy staviać jašče bolš pytańniaŭ da dziejańniaŭ, jakija ŭ hetych umovach ździajśniaje ŭkrainskaja ŭłada. Jak ułada, tak i ŚMI sprabujuć tut vytrymać peŭny bałans, kab nie siejać paničnych nastrojaŭ, jakija nie prynosiać karyści ni ekanamičnaj stabilnaści, ni hatoŭnaści krainy da adpaviednych padziej, a ŭnutranaja destabilizacyja źjaŭlajecca adnoj z metaŭ Rasii», — kaža kiraŭnik analityčnaha centra.
Mienavita tamu, na dumku ekśpierta, Ukraina sutykajecca z enierhietyčnym šantažom, kibieratakami i telefonnymi «miniravańniami» z boku Rasii, što razam z nahniatańniem pra ŭvarvańnie ŭžo niehatyŭna ŭpłyvaje na kurs hryŭni i ekanomiku ahułam.
«Prezident Zialenski niadaŭna źviarnuŭsia da ŭkrainskaha naroda z nahody patencyjnaha ŭvarvańnia i adkazaŭ na pytańnie, adpaviedny zapyt hramadstva. Akramia abaronnych zachadaŭ va ŭradzie ŭžo raspracavanyja i apublikavanyja śpiecyjalnyja brašury pa pavodzinach u vypadku nadzvyčajnaj situacyi abo vajny, praciahvajecca raźvićcio instytuta terytaryjalnaj abarony i inšyja mierapryjemstvy», — miarkuje ekśpiert.
Ukrainskija vajskoŭcy. Fota: Minabarony Ukrainy.
Na dumku spadara Rahavika, va ŭkrainskim hramadstvie i časam va ŭładzie jość razumieńnie, što vajna nie pavinna być padstavaj dla adkładańnia reformaŭ, pryciahnieńnia da adkaznaści ŭ rezanansnych kryminalnych spravach. Supraćdziejańnie prarasijskim, karupcyjnym abo aliharchičnym siłam nielha spyniać.
«Usio heta maje palityčnyja nastupstvy ŭ vyhladzie roznych pracesaŭ, dyskusij, jakija mohuć być uspryniatyja jak palityčnyja razborki. Vajna nie pavinna admianiać u hetaj situacyi ŭnutrany paradak dnia, ale tolki z papraŭkaj, što treba minimizavać toje, što moža być vykarystana ahresaram suprać našaj nacyjanalnaj biaśpieki. Adnaznačna lišnim u hetaj situacyi źjaŭlajecca šou-baraćba za ŭładu lubymi mietadami abo pravakavańnie ŭnutranych siłavych supraćstajańniaŭ ułady i apazicyi. U takija pieryjady najlepšym źjaŭlajecca jadnańnie ŭsich siłaŭ», — kanstatuje analityk.
Fota: Minabarony Ukrainy.
Ničoha dziŭnaha ŭ ciapierašniaj situacyi nie bačyć publicyst i ŭdzielnik vajny Stanisłaŭ Biazuška. Jon miarkuje, što ŭkrainskija palityki časta stavili ŭłasnyja intaresy vyšej za dziaržaŭnyja i raniej.
«Tak jany pavodzili siabie i ŭ 2014 hodzie, i ŭ 2015 hodzie, i štohod. Jany zaŭsiody staviać u pryjarytet svaju palityčnuju dziejnaść i svoj prychod da ŭłady. Jany ličać, što chtości dzieści za nas maje vyrašyć. Heta takaja biezadkaznaść ukrainskich palitykaŭ. Na nas napadali: było Debalcava, byŭ Iłavajsk, jany praciahvali kazać pra toje, chto dobry, a chto kiepski», — kaža spadar Biazuška.
«Taksama treba ŭličyć, što dla Jeŭropy i dla śvietu čarhovaja vajskovaja eskałacyja stanovicca čymści novym, niejkaj trahiedyjaj. A my vośmy hod vajujem. My prosta majem hety imunitet da vajny. My pryvykli, što ŭ nas pastajanna pra heta havorać. My pryvykli da strat, da taho, što iduć bai, što moža niešta zdarycca, tamu my na heta reahujem nie tak, jak u Jeŭropie», — kaža publicyst i ŭdzielnik vajny.
Taksama spadar Biazuška ličyć, što zachodniaja presa nie ŭličvaje niekatoryja važnyja momanty. Nahadajem, spačatku amierykanskija vydańni paviedamili ab pierakidvańni rasijskich vojskaŭ da ŭkrainskaj miažy: The Washington Post 31 kastryčnika napisała ab zasiarodžvańni vojskaŭ, a Politico apublikavała fota ad 1 listapada ŭ paćviardžeńnie hetaha.
Fota: Minabarony Ukrainy.
11 listapada Bloomberg napisaŭ, što ZŠA paviedamili sajuźnikam ź Jeŭrasajuza ab tym, što Rasija moža płanavać ŭvarvańnie va Ukrainu, uličvajučy ŭzmacnieńnie napružanaści z-za mihrantaŭ i prablem z pastaŭkami enierharesursaŭ.
Pavodle źviestak niamieckaha vydańnia Bild, Rasija razhladaje płan zachapić dźvie traciny terytoryi Ukrainy, uklučna z Kijevam.
«Bild nie ŭličyŭ, što hetyja vojski i tak znachodziacca na hetaj terytoryi ŭžo bolš, čym paŭtara hoda, nie ŭličyli kiłamietražy. Tyja, chto nie ŭmieje krytyčna myślić, naturalna, pačali mitusicca. Ale, uvohule, z druhoj pałovy śniežnia ŭkrainskaja raźviedka i Hienieralny štab Uzbrojenych sił Ukrainy prosta našmat lepš stali kamunikavać, davać bolš infarmacyi», — kaža ŭdzielnik vajny.
Na jaho dumku, najbolšuju napružanaść va Ukrainie stvarajuć palityki, jakija chočuć skarystacca ciapierašniaj situacyjaj. Z adnaho boku ŭłada, jakaja kaža, što kiepskaja apazicyja nahniataje abstanoŭku. Ź inšaha boku apazicyja, jakaja kaža, što ŭłada pradaje Ukrainu.
«Heta ŭ nas było, jość, i, na žal, napeŭna, budzie i dalej», — kaža spadar Biazuška.
Ci vierać ukraincy ŭ poŭnamaštabnaje ŭvarvańnie?
Z 2014 hoda ŭkraincy žyvuć u pastajannym asensavańni taho, što rasijskija vojski ŭ luby momant mohuć pačać nie proksi, a šyrokamaštabnuju vajnu, z vykarystańniem avijacyi i akupacyjaj značnaj častki terytoryi. Ale nakolki ciapierašniaja situacyja adroźnivajecca ad papiarednich? Ci sapraŭdy pahroza poŭnamaštabnaha ŭvarvańnia ciapier bolšaja?
Fota: Minabarony Ukrainy.
«Na žal, my nie možam razumieć, što adbyvajecca ŭ hałavie Uładzimira Pucina, nie možam być upeŭnienyja ŭ jahonaj racyjanalnaści, i hetym možna patłumačyć previentyŭnyja zajavy i kroki našych zachodnich partnioraŭ. Rasija vyjšła na biesprecedentny hradus vajennych pahroz,
jakija pieratvaryła ŭ nieprymalnyja ŭltymatumy, jakija pieratvarylisia ŭ mižnarodnyja kansultacyi i pieramovy z ZŠA i NATA. Mahčyma Rasija nie budzie pradprymać realnych mier, akramia sprobaŭ destabilizacyi Ukrainy, pa-pieršaje, pakul idzie pieramoŭny praces z Zachadam jak faktar strymlivańnia i ŭ ich jość nadzieja na reanimacyju Minska-2 u novanarmandskim farmacie, pa-druhoje, da zaviaršeńnia kitajskaj alimpijady 20 lutaha, a taksama, pa-treciaje, usio ž naša armija źjaŭlajecca dosyć mocnaj dla stvareńnia Rasii vialikich prablem u vypadku ŭvarvańnia, a našy zachodnija partniory prademanstravali šmat patencyjnych mier suprać Rasii. Chaciełasia b vieryć, što ŭsie hetyja faktary razam adciahnuć novuju pahrozu.
Ale z Rasijaj my nikoli i ni ŭ čym nie možam być upeŭnienyja, bo navat podpisy Rasii pad dakumientami biaśpieki ŭžo nie raz stanavilisia takimi, što ničoha nie harantujuć», — kaža analityk Alaksiej Rahavik.
Fota: Minabarony Ukrainy.
Ekśpiert Uładzimir Sałaŭjan miarkuje, što siarod ukrainskaha hramadstva pakul što niama adzinaj pazicyi pa acency situacyi.
Sacyjałahičnyja apytańni ŭ kancy minułaha hoda pakazali, što kala pałovy respandentaŭ ličać realnaj pierśpiektyvaj pahrozu ŭvarvańnia Rasii va Ukrainu. Pry hetym bolš za 40% nie bačać u situacyi značnych ryzyk. Čamu ž tak?
«Pieršy aśpiekt — stomlenaść ad vajny značnaj častki hramadstva. Hety chod hramadskaj dumki sfarmiravany strataj adčuvańnia prysutnaści vajny ŭ paŭsiadzionnym žyćci bolšaści ŭkraincaŭ. Bolš za toje, častyja śpiecapieracyi rasiejskich śpiecsłužbaŭ (kibierataki, epidemija telefonnych «miniravańniaŭ» i hetak dalej) stali nastolki častaj, navat štodzionnaj źjavaj, što ŭ častki hramadstva źjaviŭsia «imunitet» da ałarmisckich paviedamleńniaŭ adnosna rasijskaj pahrozy.
Urešcie, nie varta adkidvać faktar infarmacyjnaha ŭpłyvu prarasijskich miedyja, dziejnaść jakich nakiravana na dyskredytacyju ŭkrainskaj ułady i naviazvańnie mifałahiemy ab «źniešnim» kiravańni dziaržavaj», — kaža analityk.
Uładzimir Sałaŭjan miarkuje, što vajna — adzin ź imaviernych scenaryjaŭ, jaki lažyć na stale Pucina.
«Zrešty, ja liču, što ŭ najbližejšaj pierśpiektyvie, pa mienšaj miery najbližejšych miesiacaŭ Rasija nie rašycca na pramoje ŭvarvańnie», — kaža ekśpiert.
Metaj ciapierašniaj eskałacyi z boku Rasiei źjaŭlajucca pramyja pieramovy z Zachadam, z Vašynhtonam, miarkuje jon.
Što ž na samaj spravie ŭtojena pad maskaj rasijskich pahroz i zapałochvańniaŭ?
Fota: Minabarony Ukrainy.
«Dumaju, varta ŭvažliva sačyć za chodam pieramovaŭ. Pa stanie na siońnia my možam razhladzieć pieršyja parastki kampramisu.
Jon uklučaje damoŭlenaści ŭ śfiery kantrolu nad uzbrajeńniami, a taksama ŭzajemnyja abmiežavańni na raźmiaščeńnie rakiet u Jeŭropie, prahlad intensiŭnaści vučeńniaŭ NATA pa-za terytoryjaj arhanizacyi, u pryvatnaści va Ukrainie, pavyšeńnie ŭzroŭniu transparentnaści.
Zdajecca, zachodnija elity nie źbirajucca achviaravać asnovatvornymi pryncypami NATA, a kampramis mahčymy tolki pry ŭmovie ŭzajemnych sastupak.
Tamu Kramlu pryjdziecca albo pahadzicca na prapanavany ŭ adkaz pakiet damoŭlenaściej, albo pryznać svajo dypłamatyčnaje fijaska. Kali kiraŭnictva Rasii abiare druhi šlach — raście pahroza razhortvańnia vajskovaj infrastruktury Rasii ŭ Biełarusi i ŭzmacnieńnia cisku na Kijeŭ praz abvastreńnie bajavoj abstanoŭki na Danbasie.
Što tyčycca poŭnamaštabnaha ŭvarvańnia, to hety scenar utrymlivaje šerah istotnych pahroz dla Kramla, — pa-pieršaje, sankcyi kali nie razburalnyja, to, biez sumnievu, nadzvyčaj balučyja dla rasiejskaj ekanomiki; pa-druhoje, najaŭnaj pablizu ŭkrainskaj miažy hrupoŭki vojskaŭ Rasii niedastatkovaja dla zabieśpiačeńnia akupacyjnaha režymu va ŭmovach aktyŭnaha partyzanskaha ruchu, a naroščvańnie sił uvarvańnia abaviazkova pryviadzie da pasłableńnia stratehičnych pazicyj na inšych važnych dla Maskvy kirunkach; pa-treciaje, rasijskaje hramadstva nie hatovaje da značnych vialikich strat i rezkaha paharšeńnia ŭzroŭniu žyćcia.
Vajna z Ukrainaj nie ŭpisvajecca ŭ farmat «maleńkaj pieramožnaj»
i pry hetych abstavinach, całkam vierahodna, pryviadzie da padzieńnia rejtynhu ŭłady. U rešcie rešt, luty — miesiac praviadzieńnia zimovaj Alimpijady ŭ Piekinie. Naŭrad ci Maskva advažycca pieraklučyć uvahu ŭsiaho śvietu z Kitaja na padziei va Ukrainie. U svoj čas Majdan sapsavaŭ Kramlu «paślasmak» sočynskaj Alimpijady. Pucin vydatna razumieje pikantnaść situacyi», — kaža Uładzimir Sałaŭjan.
Fota: Minabarony Ukrainy.
Čaho čakać biełarusam?
Abvastreńnie situacyi na rasijska-ŭkrainskaj miažy supała ź biełaruska-rasijskimi vučeńniami.
Jak raspavioŭ Łukašenka, vajennyja adpracujuć «peŭnuju zadumu ŭ supraćstajańni ź siłami zachadu (Bałtyja i Polšča) i poŭdnia (Ukraina)».
Miarkujučy pa fota i videa ŭ sacsietkach, rasijskaja technika stała łahierami ź biełaruskaha boku niepasredna la miežaŭ Ukrainy. Techniku zaŭvažyli ŭ mnohich rajonach Homielskaj i Bresckaj abłaściej, dzie niama palihonaŭ, zajaŭlenych dla vučeńniaŭ.
Fota: Minabarony Ukrainy.
Dziarždepartament ZŠA adkryta zajaviŭ, što razhladaje pieramiaščeńnie rasijskich vajskoŭcaŭ u Biełaruś jak mahčymuju padrychtoŭku da ŭvarvańnia va Ukrainu.
«Paviedamleńni ab ruchach rasijskich vojskaŭ u kirunku Biełarusi, jakija, jak miarkujecca, ažyćciaŭlajucca pad prykryćciom rehularna zapłanavanych sumiesnych vajennych vučeńniaŭ, vyklikajuć niepakoj. Vybar času admietny, i, viadoma, vyklikaje aściarohi, što Rasija moža raźmiaścić vojski ŭ Biełarusi pad vyhladam sumiesnych vajennych vučeńniaŭ, kab, mahčyma, napaści na Ukrainu z poŭnačy», — zajaviŭ pradstaŭnik Dziarždepa ZŠA.
Ci ŭsprymajuć va Ukrainie napadzieńnie rasijan z terytoryi Biełarusi mahčymym varyjantam? Kali takoje ŭvarvańnie adbudziecca, čaho čakać biełaruskim palityčnym dysidentam i biežancam, jakija znachodziacca va Ukrainie? Ich buduć usprymać jak patencyjnych sajuźnikaŭ, ci ŭ pieršuju čarhu jak pradstaŭnikoŭ varožaj Ukrainie dziaržavy ź niedavieram i naściarožanaściu?
«Uvarvańnie z terytoryi Biełarusi, pa pryčynie niejkaj pravakacyi z boku «ŭłady» ŭ Biełarusi, razhladajecca jak adzin z patencyjnych scenaryjaŭ ŭvarvańnia. Na praciahu ŭžo doŭhaha času my bačym, što Alaksandr Łukašenka vykonvaje ŭsie mižnarodnyja kapryzy Pucina, ad mihracyjnych apieracyj suprać Jeŭropy da prapahandyscka-iłžyvych zajaŭ i dziejańniaŭ suprać Ukrainy», — miarkuje analityk Alaksiej Rahavik.
Fota: Minabarony Ukrainy.
Na dumku ekśpierta, va Ukrainie adździalajuć pazicyju łukašenkaŭcaŭ ad pazicyi biełaruskaha naroda.
«Ukraina zaŭsiody budzie ŭsprymać sajuźnikami ŭsich, chto budzie stajać na pazicyjach pavahi da normaŭ mižnarodnaha prava i terytaryjalnaj cełasnaści Ukrainy. Ukraincy vydatna adroźnivajuć dziejańni Łukašenki i pazicyju biełaruskaha naroda i biełarusaŭ, jakim daviałosia ŭciakać ad dyktatarskaha i prarasijskaha režymu Łukašenki. Biełaruskim palityčnym dysidentam i biežancam ad Ukrainy nikoli nie budzie nijakich pahroz. My sajuźniki ŭ baraćbie za pravy čałavieka, svabodu narodaŭ, demakratyčnyja pieraŭtvareńni. Pahrozy ŭ hetaj situacyi jość tolki ad rasijskaha ahresara i zaležnaha ad jaho Łukašenki», — kaža spadar Rahavik.
«Va Ukrainie jašče dva hady tamu dastatkova pazityŭna ŭsprymali Łukašenku, ale zaraz zusim inšaja situacyja.
Ja surjozna staŭlusia da taho, što ahresija moža być z terytoryi Biełarusi. Ale ja liču, što jana moža być nie na terytoryi Kijeŭskaj vobłaści, jak kažuć mnohija, bo heta niełahična. Mahčyma, što ŭdary adbuducca pa terytoryi Vałyni. Da hetaha rychtujecca ŭkrainskaja armija, Nacyjanalnaja hvardyja. My hatovyja da hetaha», — kaža udzielnik rasijska-ŭkrainskaj vajny, publicyst i eks-čynoŭnik Stanisłaŭ Biazuška.
Fota: Minabarony Ukrainy.
Biełaruskuju armiju va Ukrainie ŭsprymajuć jak adzin arhanizm z rasijskaj. Adpaviednym budzie i staŭleńnie ŭ vypadku ahresii z terytoryi Biełarusi. Ale biełarusaŭ jak narod, biełarusaŭ jak ludziej ukraincy ad ciapierašniaha režymu adroźnivajuć, pakul što.
Na dumku Biazuški, biełarusam, što znajšli prytułak va Ukrainie, ničoha nie pahražaje.
«My dakładna razumiejem, što tyja biełaruskija dysidenty, jakija siońnia va Ukrainie, nie majuć nijakaha dačynieńnia da taho, režymu, jaki stvaryŭ Łukašenka», — kaža publicyst.
«U maim atačeńni, žurnalistaŭ i ekśpiertaŭ, nichto dakładna da ich nie budzie niehatyŭna stavicca. Chacia i mahčymyja asobnyja palityčnyja pravakacyi dla taho, kab stvaryć dadatkovy kanflikt, kab dać Łukašenku dadatkovyja arhumienty», — kaža Stanisłaŭ Biazuška.
Brytanija adpraviła Ukrainie 2000 adzinak supraćtankavaj zbroi
Vajavać z Ukrainaj — varjactva. Dziaržsakratar Blinkien źviarnuŭsia da hramadzian Rasii
