Nazvali «schilnym da ekstremizmu». Siastra staršyni AHP Mikałaja Kazłova raskazała pra jaho ŭtrymańnie ŭ turmie
Mikałaj Kazłoŭ z 28 śniežnia adbyvaje trochmiesiačny aryšt pa č. 1 art. 407 KK — za razhałošvańnie danych pa kryminalnaj spravie suprać Kaardynacyjnaj rady. Pakarańnie jon adbyvaje ŭ Baranavičach.
Jaho siastra, jakaja sustrełasia ź im niekalki dzion tamu, raspaviała, što Mikałaj znachodzicca ŭ kamiery adzin, paviedamlaje «Novy čas».
«Jaho nazvalii «schilnym da ekstremizmu» i paviesili tabličku nad łožkam. Umovy i staŭleńnie nielha nazvać dobrymi. Aśviatleńnie ŭ kamiery drennaje, čytać možna ź ciažkaściu. Mikałaj skardzicca na prablemy sa zrokam — mabyć, adbivajecca apiok, jaki jon atrymaŭ u minułym hodzie, kali ich na Akreścina zalivali chlorkaj. Ale ŭ ahladzie i dapamozie aftalmołaha jamu było admoŭlena.
Uvieś čas harłapanić radyjo. Karespandencyju addajuć daloka nie ŭsiu: telehramy [ź vinšavańniami] z dniom naradžeńnia ad mnohich nie dajšli, atrymaŭ tolki 3 štuki. Pazbavili mahčymaści adkazvać na listy, zabraŭšy papieru i asadki.
Paprasiŭ vypisać jamu presu. U Mikoły ŭžo jość spahnańnie ŭ vyhladzie vymovy za toje, što jen niešta zrabiŭ niesvoječasova — pry tym, što ŭ jaho niama hadzińnika, i čas udakładnić niama ŭ kaho. Jon ličyć, što prydzirlivaje staŭleńnie administracyi i achovy moža być abumoŭlenaje žadańniem znajści nahodu dla źmiaščeńnia jaho ŭ ŠIZA».
